Sawakya Kufuma ku Bataya Mbila ya Bufumu

“Bantu Bapusana-pusana Bakwatankana Pamo” mu India

“BANTU bapusana-pusana bakwatankana pamo “ yo ñambilo yamba bavula ilumbulula buumo bwa bantu mu India. Pano bino, mu kino kyalo kiji na bantu bapusana-pusana mu bisho, milaka, bupopweshi, bikota, mvwajilo ne mu njiilo, kechi kyapela kukwatankena pamo ne. Nangwa kiji byonkabyo, pa ofweshi wa lutangijilo wa Bakamonyi ba kwa Yehoba mu India, ba mingilo bekalapo bepana kwingila, bakwatankana pamo, nangwa kya kuba bafuma mu byalo ne manyaunda avula kabiji bamba milaka yapusana-pusana.

• Twayai tumone byaubile nsongwakazhi umo wa jizhina ja Rajrani wafumine ku Punjab kwine ku yabilenga, ku buyeke-muzhika bwa India. Kimye Rajrani kyo ajinga pa sukulu, mukwabo umo mobafunjilanga watatwile kufunda Baibolo na Bakamonyi ba kwa Yehoba. Uno mukwabo ye wakwashishe ne Rajrani kufunda Baibolo. Mambo a kuba’mba uno mukwabo mobafunjilanga kechi wayukishe Kizungu ne, kabiji kechi kwajingapo Kyamba kya Usopa mu Punjabi pa kyo kya kimye ne, walombele Rajrani amba amutuntulwilengako biji mu magazini. Bintu byo atangilenga Rajrani mu Kyamba kya Usopa byamukwashishe bingi kya kuba wanungulukile ne kufika pa kwipana kwi Yehoba Lesa, nangwa kya kuba bansemi yanji bamukainyenga. Pa kino kimye Rajrani wingijila pa Betele ya India. Wingila yenka mwingilo wamulabishe meso ne kumona bukine. Utuntulula mabuku a bwina Kilishitu mu mulaka wa Punjabi!

• Mukwabo naye wa jizhina ja Bijoe ufuma ku lubaji lukwabo lwa India—ku bulenge-muzhika bwa nyaunda ya Kerala. Bijoe bamupangile sukulu pa sukulu mukatampe, mambo akubula kwitumpa mu bya bumulwila ntanda. Pa nyuma ya mambo mu kochi abingishe bupopweshi bwa kine, Bijoe bamubwezhezhe mu sukulu.a Kepo ayile ne ku koleji. Pano na mambo a byubilo byabula kufwainwa byajinga pa yewa koleji, kechi wasekejilemo ne, onkao mambo, mu temutu mutanshi wikilekele kufunda. Pa nyuma ya kwikala myaka jikumi mu Betele, aye mwine wiambila’mba wamwenamo pakatampe mu kwikala ke umo wa bantu bapusana-pusana kabiji bakwatankana ba kisemi kya Betele, kyoafwainwe kubula kumonapo inge wakebele kufunda sukulu wa peulu.

• Ba Norma ne ba Lily bakoma kukila pa myaka 70, kabiji baikala saka bafwilwa pa myaka yavula bingi. Bonse bwabo baingila mwingilo wa kimye kyonse kukila pa myaka 40. Lily waingila pa musampi myaka 20 mu mwingilo wa kutuntulula mu mulaka wa Tamil. Papita myaka 13 kufuma kimye Norma kyo aishile mu Betele pa nyuma ya kufwa bamwata wanji. Kunungapo pa kwingila kwabo na ngovu, ke bamo batundaika buumo mu kisemi kyonse kya Betele. Batemwa bingi kutambwila benyi ne kwisamba na bakyanyike ba mu kino kisemi saka babena kwibashimikizha lusekelo lwa bwikalo bwabo bwa bwina Kilishitu pa myaka yavula. Bakyanyike nabo batemwa bingi kwibeta ku bibamba byabo na kwisamba nabo ne kwibakwasha inge kyakebewa. Bya kumwenako byawama bingi!

Byo bashinda kwitala bibi kuleta lutobo ne kubula kumvwañana kuji mu mapunzha avula, bano baji mu kisemi kya Betele mu India basangalela pamo mu kwingijila bakwabo.—Masalamo 133:1.

[Tubyambo twa mushi]

[Picture credit line on page 18]

Ku nyuma ya Byo: Mountain High Maps® Copyright © 1997 Digital Wisdom, Inc.