Bipamo Bikwasha Balanda Bibena Kwingila Byepi?

PANYUMA ya kulukukwa kwaubiwe pa September 11, 2001 mu muzhi mukatampe wa New York ne Washington, D.C., bantu bavula bapaine bingi bukwasho ku bantu bapulukile mu oa malwa. Bipamo bikwasha balanda byatambwijile bupe bwa mali $2.7 bilyonyi akukwashishamo bisemi bya bantu batanyiwe mu malwa. Bantu ku mapunzha onse bakebeshe bingi kukwashañana mambo baubile bingi bulanda.

Pano nangwa kikale byonkabyo, bantu kibakolele bingi ku muchima pa kuyuka’mba bipamo byayukanyikwa bulongo bikwasha balanda byaingijishe mali mu jishinda jingi. Bantu bazhingijile bingi pa sawakya umo waumvwanyikile kuba’mba kipamo kimo kikatampe kikwasha balanda kyanengezhe kwingijisha pepi na kichika kya mali $546 milyonyi o kyatambwijile a kukwashishamo batanyiwe mu malwa, kiengijisha ku bintu bingi. Nangwa kyakuba kino kipamo kyalekele kwiengijisha mu jino jishinda ne kulomba lulekelo lwa mambo, munembeshi wa byambo umo waambile’mba: “Bantu bekilengulula bingi nangwa kyakuba kyaleka kwingijisha mali ku bintu bingi” kabiji kyashupa kwikiketekela byonka byobekiketekejile kulukukwa kasa kukyangye kubiwa. Nanchi nga anweba? Abya mwaleka kuketekela bipamo bikwasha balanda nyi?

Nanchi Bukwasho Bupanyiwa ku Bipamo Bikwasha Balanda Bonaikatu nyi, Inyi Bwingila?

Kupana bukwasho ku kipamo kikwasha balanda kutakaikwa bingi. Pano bino kechi bonse bekimona mu jino jishinda ne. Myaka kukila pa 200 yapitapo, Samuel Johnson, munembeshi wa mashimikila, wanembele’mba: “Kwikala bingi kutemwa inge wafweta bantu mali pa mwingilo ye bakwingijila, kukila kwiapanatu ku bipamo bikwasha balanda.” Bamo nabo lelo jino bezhinausha bingi pa kubatu’mba bapane mali ku kipamo kikwasha balanda na mambo a masawakya o bomvwa kuba’mba bino bipamo byonauna mali obebipa akukwashishamo balanda. Monai bimo bibiji byamwekele.

Mukulumpe umo wa kipamo kya bupopweshi kikwasha balanda bamupangile nkito panyuma yakuba watuma pepala ku ofweshi mukatampe wa kipamo kyoengilako amba bamupenga mali akwiwamishishangamo amwekenga kipale kabiji amba bamupenga ne mali $500 akujilangamo pa mulungu pa mulungu pa myaka ibiji. Mu Britain, kibobile bingi bumvu bantangi banengezha byubiwa mu kipamo kikwasha balanda bya kumwesha pa televizhonyi mukatampe, byo kyayukanyikilwe kuba’mba mali $10 milyonyi apanyiwe kuba’mba batunge bibamba byakatataka bya baana bakishale mu Romania, batungilemotu tubibamba 12 twatama tamatu twabula munda ne munyuma kuyuka nekwaya mali akwabo avula ne. Masawakya atama a uno mutundu alengela bampanyi kujimuka pa kupana mali, kukeba kuyuka bobapa, ne koaya.

Kupana Nangwa Kubula Kupana

Bino kuba kyawama kuswisha miteeto ya bantu bamo nangwa bipamo bimo kwitulengela kubula kubila lusa bantu ne. Baibolo yaamba’mba: “Bwina Lesa bwa kine ne bwa kubula bubi ku meso a Lesa Tata wetu bo bo buno, bwa kupempula banabanshiwa ne banabakazhi bafwilwa mu malwa abo.” (Yakoba 1:27) Ee kine, kukwasha bayanji ke kintu kyanema bingi mu bwina Kilishitu.

Nangwa byonkabyo, kampe mwakonsha kukizhinauka’mba: ‘Kana nakonsha kutwajijila kupananga mali ku bipamo bikwasha balanda nyi, inyi kana nebapengatu balanda amiwa mwine?’ Bumpanyi bwa mutundu ka Lesa boakeba? Mutwe walondelapo ukakumbula ano mepuzho.