Bumpanyi Busangajika Lesa
YESU pamo na batumwa banji ne balunda nanji bamo ba Maliya, Mata ne Lazalasa wasangwilwe, baikele pamo mu Betani na kuja kajo kawama. Kimye Maliya kyo ashikwile paunji umo wa manyi ne kushinga maulu a Yesu, Yudasa Isakaliota wazhingijile bingi ne kwamba’mba: “Mambo ka ano manyi abujilwe kupotwa na mali bitota bisatu, ne kupana ku balanda?” Bakwabo nabo bejizhañenye byonkabyo.—Yoano 12:1-6; Mako 14:3-5.
Bino Yesu wibakumbwile’mba: “Mulekai; . . . Mambo balanda, mukelwa nabo, kabiji monse mo musaka mwayuka kwibobila byawama, pakuba amiwa kechi nkelwa nenu ne.” (Mako 14:6-9) Bantangi ba bupopweshi bwa Bayudea bafunjishanga amba bupe bwapanyiwanga kechi bwakwashangatu balanda bonka ne, bino bwaingijishiwanga ne mu bumfuto bwa kukuula bantu mu mambo. Pano Yesu walumbulwile bingi bulongo kuba’mba bumpanyi busangajika Lesa kechi bwaimenatu pa kupana bupe ku balanda bonkatu ne.
Kufundako pacheche pa mpaino ya mu kipwilo kitanshi kya bwina Kilishitu, kusakwitukwasha kuyukapo mashinda amo asangajika Lesa otwakonsha kumwesheshamo butemwe bwetu bwa kutemwa balanda. Kabiji tusakufunda ne jishinda jingi jawamisha ja kwibakwashishamo bingi bulongo.
‘Panainga ku Balanda’
Pa bimye byavula, Yesu wakambizhenga baana banji ba bwanga ‘kukwasha balanda.’ (Luka 12:33) Bino Yesu wibajimwineko kubula kupana bumpanyi bwa kwitumbijikilamo abo bene mu kifulo kya kutumbijika Lesa. Waambile’mba: “Pa kupana bya bupe, ke kwimba ntolompita palutwe yobe ne, byo boba bakamfutumfutu mu mashinagoga ne mu mikwakwa, amba bantu betutote” ne. (Mateo 6:1-4) Kulondela luno lujimuno, bena Kilishitu batanshi bachinuzhukile kupana bupe bwapanangapo bantangi ba bupopweshi bwa kwitumbijikilamo abo bene. Onkao mambo, abo bakwashangatu balanda abo bene nangwa kwibapa bupe ku mbaji.
Kya kumwenako, mu Luka 8:1-3 betubula amba Maliya Mangadala, Yoana, Susana, ne bakwabotu baingijiilenga Yesu ne batumwa banji kwingijisha “bya mu bunonshi bwabo” kwa kubula kulolobwela ku bantu ne. Nangwa kya kuba bano banabalume kechi bajinga bayanji ne, bashile mingilo yabo mobamwenanga bunonshi ne kutesha muchima wabo ku mwingilo. (Mateo 4:18-22; Luka 5:27, 28) Byo bebakwashishenga kuba’mba bengile bulongo mwingilo wabo wibapele Lesa, bano banabakazhi batumbijikilenga Lesa. Kabiji Lesa pa kusunga byambo bya lusa lwabo lwa bumpanyi mu Baibolo kimweshatu patoka kuba’mba bumpanyi bwabo kine bwajinga bwaitabilwa kwi aye ne kuba’mba aba bakekalako kulutwe bakatangenga.—Byambo bya Mana 19:17; Bahebelu 6:10.
Dokasi wajinga mwanamukazhi mukwabo “wavujile mingilo yawama ne kupana wapaine bya bupe byavula ku balanda.” Wasonenanga balanda banabakazhi bafwilwa bivwalo mu muzhi moaikalanga wa Yopa. Kana aye mwine bunke yewapotanga tonge yense wakupikwila ne kwibobilatu byonse, kechi twayuka ne. Bino nangwa byonkabyo, bantu bo akwashanga bamutemenwe bingi pa mambo a mwingilo wanji wawama, ne Lesa naye mu lusa lwanji wamukwashishe.—Byubilo 9:36-41.
Mpaino Yafwainwa Yanema Bingi
Kika kyatundaikanga bano bantu kupana? Kechi bapananga na mambo a kumvwatu lusa lwa kukeba kukwashañana ne. Pa juba pa juba balangulukilenga bya kukwasha bayanji, bajinga mu malwa, balwazhi, ne bajinga mu makatazhotu akwabo. (Byambo bya Mana 3:27, 28; Yakoba 2:15, 16) Awe ke mutundu wa mpaino itokesha Lesa pa muchima. Itundaikwa na mambo a kutemwa Lesa ne kukeba kulonda lusa ne bumpanyi bwanji.—Mateo 5:44, 45; Yakoba 1:17.
Mutumwa Yoano walumbulwile buneme bwa kupana amba: “Aye uji na bya panopantanda, wamona mulongo wanji wakajilwa, kabiji washinka muchima wanji wa lusa ne kumutana, butemwe bwa Lesa bwaikala mwi aye byepi?” (1 Yoano 3:17) Mukumbu kechi wa kuluba ne. Kutemwa Lesa kulengela bantu kwikala bampanyi. Lesa usanta bingi kabiji ulambula boba bonse baji na muchima wa bumpanyi byonka byoaji aye mwine. (Byambo bya Mana 22:9; 2 Kolinda 9:6-11) Nanchi bumpanyi bwa uno mutundu twibumona ano moba nyi? Monai kyamwekele katatakatu mu kipwilo kimo kya Bakamonyi bakwa Yehoba.
Nzubo ya mwanamukazhi umo mukote mwina Kilishitu yaonaikile bingi. Waikalangatu bunke kabiji kechi wajingapotu nangwa na kisemi kya kumukwasha ne. Pa myaka yavula, nzubo yanji yaingijishiwanga kupwilamo kupwila kwa bwina Kilishitu, kabiji javula watemwanga bingi kujiila pamo kajo na bantu umvwe bakeba kuja. (Byubilo 16:14, 15, 40) Ba mu kipwilo byobamwene kuba’mba wajinga mu malwa, bepaine kumukwasha. Bamo bapaine mali, bakwabo bepaine kwingila mwingilo. Mu milungutu icheche, bepaine kwingila mwingilo, bapwishishe kubika mutenge wakatataka pa nzubo, batungile ne kibamba mwakowela kyakatataka monka mukachi, babwela babika ne pulasita, kupenta bibamba byonse kabiji ne kunengezha mwa kusungila bipe mu kibamba kya kutekelamo. Kwingijiwa kwa uno mwingilo kechi kwakwashishetu uno mwanamukazhi yenka ne, bino kwalengejile ne kipwilo kukwatankana kabiji kwamwesheshe bantu ba mu kinkalankulo kumwenako amba kine bo bumpanyi bwa bwina Kilishitu bwa kine.
Mashinda otwakonsha kukwashishamo bakwetu avula bingi. Twakonsha kumonapo kimye kya kwisamba na kalombwana nangwa kashimbi wabula bashanji. Twakonsha kupotelako mukote mwanamukazhi wafwilwa bintu nangwa kampe kumusonenako bivwalo. Twakonsha kumutekelapo kajo muntu wabulako nangwa kumupapo ka jali. Nangwatu kechi twibanonshi ne, twakonsha kukwashañana. Mutumwa Paulo wanembele’mba: “Umvwe kuswa ko kuji, kya bupe kitabilwa monka mwayila byo aji nabyo muntu, kechi mwayila byo abula nabyo ne.” (2 Kolinda 8:12) Nanchi kukwashañana kwa uno mutundu ko konka kwaitabilwa kwi Lesa nyi? Ine.
Nga Bupe bwa Kupana Bavula?
Kimye kimo kwipanatu kukwasha kwingila yewo mwingilo kechi ko konkatu kukebewa ne. Yesu ne batumwa banji basungangapo mali a kukwasha bayanji, kabiji kechi bakananga bupe bwa mali bwapananga bantu baji na lusa bobatananga mu mwingilo wabo ne. (Yoano 12:6; 13:29) Ne bipwilo bya mu myaka kitota kitanshi nabyo byanengezhezhepo bipe byavula byakukwasha bakwabo bakebewenga bukwasho.—Byubilo 2:44, 45; 6:1-3; 1 Timoti 5:9, 10.
Bukwasho bumo bwa uno mutundu bwamwekele nobe mu 55 C.E. Ba mu kipwilo kya mu Yudea bajinga bingi na buyanji, kampe na mambo a kipowe kya nzala kikatampe kyajingako. (Byubilo 11:27-30) Mutumwa Paulo wanembejile bipwilo byavula makalata kukafika ne ku Makedonya akunengezha bukwasho bwa kukwasha bayanji. Watambwile bipe ne kutuma banabalume boaswile kwibitwala. (1 Kolinda 16:1-4; Ngalatiya 2:10) Pano bino kafwapotu nangwa umo watambwilepo malipilo ne, kikale Paulo nangwatu bakwabo baingijile uno mwingilo.—2 Kolinda 8:20, 21.
Bakamonyi bakwa Yehoba nabo lelo jino benengezha bingi kukwasha bakwabo bukiji bukiji umvwe kwamweka malwa. Kya kumwenako, kimye kya mayoo mu 2001, mu Houston, Texas, U.S.A. mwanokele mvula mukatampe bingi wamukwe waletele muyulo. Mazubo a Bakamonyi 723 aonaikileko, kabiji akwabo aonaukilwetu shata papita ne mema laa. Bukiji bukiji, kometi ikwasha baponenwa na bya malwa muji bakulumpe ba bwina Kilishitu bafikapo yapangilwe kuba’mba iyuke bulongo bibena kukebewa ne kumonapo mali akukwashishamo Bakamonyi ba ku ino mpunzha kuyuka mwakwisungila na ano malwa ne kuwamisha mazubo abo. Bakwabo bepaine mu bipwilo bya kipikipi kwingila mwingilo yense. Kamonyi umo wasanchile bingi pa buno bukwasho kya kuba’mba kimye kyo bamupele mali ku kampanyi ka inshuwalansi a kushimukulwilamo nzubo yanji, aku wiatambulatu watolele onse ne kwiapana amba bakwashishemo ne bakwabo bakajilwa.
Pano bino, twafwainwa kujimuka inge kyakuba tubena kupana ku kipamo kikwasha balanda kimye kyo beya na kusashijila amba twibapepo bukwasho. Bipamo bimo biji na bamingilo bavula bingi, onkao mambo bingijisha mali avula bingi pa kwibafweta bonse kabiji akwabo beengijisha kusampenyamo mbila ya kutundaika bantu kupana mali, ne kushapotu mali acheche a kwingijisha mu kintu kyobeakebejile. Byambo bya Mana 14:15 byaamba kuba’mba: “Kitabilambijinga witaba byambo byonse; pakuba wajimuka utalatala ko aya.” Onkao mambo, kyawama bingi kutalatala bishinka byonse bulongo.
Bumpanyi Bwawamisha
Kobuji bumpanyi bwanema kukila ne bwa kupana ku balanda. Yesu watelele buno bumpanyi kimye nsongwalume munonshi kyoaipwizhe byakuba pa kuba’mba amone bumi bwa myaka. Yesu wamubujile’mba: “Kapotololai byonse byo muji nabyo, ne kupana ku bayanji, kabiji mukekala na nsabo mwiulu: kabiji bino mwiye, mundondele.” (Mateo 19:16-22) Monai kuba’mba Yesu kechi wamwambijiletu amba ‘kapanai ku bayanji bino apa mukamone bumi’ ne. Bino, wanungilepo’mba “Mwiye, mundondele.” Mu ñambilo ikwabo, ko kuba’mba nangwa kyakuba kupana ku balanda ke kintu kimo kyawamisha kabiji kileta mfweto, kwikala mwana wa bwanga wa bwina Kilishitu kwakila ne pa kino.
Kintu kine kyanemesha Yesu kyoasakishanga ke kukwasha bantu ku mupashi. Byo kwashajiletu pacheche kuba’mba afwe, Yesu waambijile Pilato amba: “O mambo o nasemenwe, ne o naishijile panopantanda, namba nshimune bya bukine.” (Yoano 18:37) Nangwa kyakuba Yesu wakwashanga bayanji, kubuka balwazhi, ne kujisha bajinga na nzala, kikatakata kyanemeshe kyoaubile ke kufunjisha baana banji ba bwanga kusapwila. (Mateo 10:7, 8) Kabiji pa mikambizho yanji yakupelako waambile’mba: ‘Onkao mambo yainga na kwibasambisha ba mu mikoka yonse ya bantu baluke ke baana ba bwanga.’—Mateo 28:19, 20.
Kya kine kuba’mba kusapwila kechi kukapwisha makatazho onse a panopantanda ne. Pano bino, kusapwila mambo awama a Bufumu bwa Lesa ku bantu bonse kutumbijika Lesa, mambo mu kusapwila mo mufikizhiwa kyaswa muchima wa Lesa ne kushinkwila boba batambwila mambo anji jishinda ja kumwenamo bumi bwa myaka ne myaka. (Yoano 17:3; 1 Timoti 2:3, 4) Nga mambo ka ne kutelekako ku byambo bya Bakamonyi bakwa Yehoba kimye kikwabo kyo bakemufwakashisha? Baleta bupe bwa ku mupashi. Kabiji bayuka’mba kino kyo kintu kyawamisha kyobakonsha kwimupa anweba.
[Bipikichala pa peja 6]
Mashinda otwakonsha kumwesheshamo amba tukwashañana avula bingi
[Kipikichala pa peja 7]
Byotusapwila mambo awama ku bantu, tutumbijika Lesa ne kushinkula jishinda ja kumwenamo bumi bwa myaka ne myaka