Nanchi Lesa Yeuleta Malwa Etuponena Nyi?

KIMYE mwananji wa mukazhi kyo akolelwe kikola kya mu bongo, Marion waubile byonse byo akonsheshe kuba byonka byo twakonsha kupapala ne atweba bavula.a Walombele kwi Lesa amba amukwashe. Waambile’mba: “Kechi mvulukapo kimye kikwabo kyo napelejilwe nobe kino ne.” Mwananji byo aubile wabelesha, Marion watendekele kwikala na luzhinauko amba kampe Lesa kafwako. Wilangulwishenga’mba: “Nga mambo ka kino o kibena kumwekela?” Wilangulushile bingi amba nga aye Lesa wa butemwe kabiji wata muchima bantu wakonsha kundekelela byepi.

Kyapichilemo Marion kechi kyenyi ne. Bantu bavula mwaya ntanda yonse inge baikala na makatazho, balanguluka amba Lesa wibalekelela. Byo baipaile munkananji wa mulume, Lisa waambile’mba: “Nkankalwa kuyuka ene mambo Lesa o alekela bintu byatama kubiwanga. Luketekelo lwami mwi Lesa kechi lwakosa byonka byo lwajinga kala ne.” Mu jishinda jimotu, mwanamukazhi mwina mwana ye baipailetu kya nshiji, waambile’mba: “Lesa kechi wantekeneshepo pa kyamwekele ne. Kechi wamwesheshepo lusa nangwa pachechetu ne.” Wanungapo ne kuba’mba: “Lesa kechi nkamulekelako mambo ne.”

Bakwabo bamushikwa Lesa umvwe batala biji ntanda ibazhokoloka. Bamona bantu baji mu buyanji bukatampe, babula kajo, babipuluka bapelelwa na mambo a nkondo, kibelengelo kyabula kuyukanyikwa bulongo kya baana bakishale bafwisha bansemi na kikola kya AIDS, ne bantu babena kuyanda na bikola bikwabotu. Pa kumona ano makatazho ne malwa akwabotu, bavula bapamo Lesa mambo na mambo a kumona’mba kafwapo kyo aubapo ne.

Nangwa byonkabyo, kishinka ke kino: Lesa kechi ye uleta makatazho afikila bantu ne. Kabiji kuji ne bishinka byavula bingi byo twafwainwa kwitabila kuba’mba katatakatu Lesa akafumyepo malwa aletelwe ku bantu. Twimutundaika kutanga mutwe walondelapo, mwimwene bishinka byalumbulula Lesa byo etuta bingi muchima.

[Tubyambo twa mushi]