Lesa Wimuta Bingi Muchima

JAVULA umvwe twaponena mu malwa tukeba Lesa amba etukwashe. Mambo ‘ye mukatampe, ne bulume bwanji bo bwakatazha; maana anji ka kuji ne ko apela ne.’ (Masalamo 147:5) Ye yenkatu wakonsha kwitukwasha mwakubila na makatazho etu. Kabiji, Baibolo witubula ‘kupungulwila michima yetu’ mu kyenyi kyanji. (Masalamo 62:8) Pano, mambo ka bantu bavula kyo balangulukila amba Lesa kechi ukumbula milombelo yabo ne? Nanchi kino kilumbulula’mba kechi watako muchima nenyi?

Mu kifulo kya kwikala wa kanswatu kuzhachisha Lesa amba kechi waubapo kimo bukiji ne, vulukai kimye kyo mwakijinga banyike. Umvwe bansemi babula kwimupa kyo mwakebanga, abya mwibazhachishanga kuba’mba kechi bemutemwa nenyi? Banyike bavula byo byo balanguluka. Bino, inge mwakoma, muyuka kuba’mba butemwe bumweshiwa mu mashinda avula bingi kabiji ne kuyuka amba kwitaba kubila mwana kyonse kyo akeba kechi bo butemwe bwa kine kine ne.

Byonkabyo, umvwe Yehoba kechi wakumbula milombelo yetu monka mo tukebela ne, kechi kilumbulula’mba witulengulula ne. Mwafwainwa kuyuka amba Lesa wituta bingi muchima atweba bonse.

“Mwi Aye mo mo Tumwena Bumi”

Kusanchila Lesa kyo kintu kitanshi pa byonse mambo mwi aye “mo mo tumwena bumi bwetu, mo mo tupitañena, mo mo twikela.” (Byubilo 17:28) Byo etupa bumi, kine umwesha butemwe kwi atweba!

Kabiji, Yehoba witupa byonse byo tukeba pa kuba’mba twikale na bumi. Tutanga’mba: “Aye umenesha nsono ya kuja banyama, ne bijimwa bya mu mingilo ya bantu; amba akalupule kajo mu mushiji.” (Masalamo 104:14) Kishinka ke kya kuba’mba Mulenga wetu kechi witunengezhezhatu bintu byanema mu bumi ne. Bino witutumina ne “mvula mwiulu ne myaka ya kuba kajo kavula, kasa ekusha michima [yetu] na kajo ne lusekelo.”— Byubilo 14:17.

Nangwa byonkabyo, bamo bakonsha kulanguluka’mba, ‘Umvwe Lesa witutemwa kya kine kine, mambo ka o etulekela na kumanama?’ Nga mukumbu wa jino jipuzho mwamuyuka nyi?

Lesa Kechi ye Ulengela Ne?

Javula muntu mwine ye wiletela lumanamo. Kya kumwenako, bintu byatama bifuma mu bimo byo tuba, byalaalatu patoka. Bantu boba bulalelale, bakizhamo kutoma maalwa ne kwingijisha bizhima, kupepa fwanka, kukaya bisela bibika bumi mu kizumba, kwendesha motoka masekenyi, ne bintutu bikwabo. Umvwe mu bino byonse mwafuma lumanamo, ñanyi walengela? Lesa nyi, inyi kubula maana kwa mwine muntu? Byambo byanembeshiwa kwi Lesa byaamba’mba: “Kechi mujimbaikwe ne; Lesa kechi ukosamikwa ne: mambo kyonkakya kyo abyala muntu kyo kyonka kyo akanowa.”—Ngalatiya 6:7.

Kunungapo, javula bantu bemanyika bene na bene. Umvwe bantu babusha nkondo, kechi kyafwainwa kubepela Lesa amba ye walengela kuno kumanama ne. Umvwe mbanzhi walukuka mukwabo muntu, abya Lesa ye walengela lumanamo nangwa lufu lwa yewo muntu nyi? Kechi byo byo kiji ne! Inge kya kuba ndamakyalo watama muchima kakatazhe bangikazhi banji, kwibamanyika ne kwibepaya, abya Lesa ye walengela nyi? Kulanguluka bino kechi kwayilamo ne.—Musapwishi 8:9.

Nangwa byonkabyo, nga bantu bavula babena kuyanda ne kufwa ku nzala, nanchi Lesa ye ulengela nyi? Ine. Ntanda yetu iji bingi na kajo kavula kakonsha kukumana bantu bonse. (Masalamo 10:2, 3; 145:16) Bino kubula kwabana bulongo bino bintu byavula Lesa byo apana ko kulengela nzala ne kipowe. Ne lwiso lwa bantu lo lulengela luno lukatazho kubula kupwa.

Kine Kishina Kyalengela

Ñanyi ulengela bantu kubela nangwa kufwa na mambo a bukote? Nanchi mwakonsha kukumya inge mwayuka amba Lesa kechi ye ulengela bino nenyi? Lesa kechi walengele muntu kuba’mba akotenga ne kufwa ne.

Kimye bantu batanshi ba Adama ne Evwa babikilwe mu bujimi bwa Edena, Yehoba wibalengele amba bekalenga myaka ne myaka mu paladisa panopantanda. Kabiji wakebeshe bingi ntanda kuyulamo bantu bafwanyijile kwiilama bulongo. Onkao mambo, wibapele mukambizho wa kulondela mu bwikalo bwabo bonse bwa kulutwe. Ba Adama ne Evwa bafwanyijilwetu kutwajijila kwikala mu Paladisa inge batwajijile kukokela Mulenga wabo.—Ntendekelo 2:17; 3:2, 3, 17-23.

Kya bulanda, ke kya kuba’mba ba Adama ne Evwa basatukile. Evwa wasajilepo kumvwina Satana Diabola. Diabola wamubepele ne kumulumbulwila amba Lesa wakanyishe kintu kyawama bingi. Onkao mambo, waikajile na mupashi wa bukitolwele ne kukeba kwikala “pamo nobe Lesa mwine kukeba kuyuka byawama ne byatama.” Kabiji Adama naye wasatukile byonka byasatukile mwanamukazhi.—Ntendekelo 3:5, 6.

Byo balengele mambo mu jino jishinda, ba Adama ne Evwa baikajile babula kufwainwa bwikalo bwa myaka ne myaka. Bamwene malwa akatampe afumine mu bundengamambo. Butuntulu bwabo bwa mubiji ne bulume bwabo byatendekele kupwa ne kyapeleleko bafwile. (Ntendekelo 5:5) Onkao mambo, bunsatuki bwabo bwaletele malwa akatampe. Ne luno tukimanama na mambo a bundengamambo bwa ba Adama ne Evwa. Mutumwa Paulo wanembele’mba: “Bundengamambo byo bwatwelele panopantanda ku muntu umo, ne lufu nalo lwatwelele na bundengamambo, kabiji byonkabyo ne lufu lwakumbene ku bantu bonse mambo bonse balengele mambo.” (Loma 5:12) Ee, bundengamambo ne lufu byakumbana nobe kikola kileta lufu ku mikoka yonse, na mambo a bunsatuki bwa ba Adama ne Evwa.

Kintu Kikatampe Kimwesha Amba Lesa Wituta Muchima

Nanchi kilumbulula amba bantu baonawinwe kikupu nyi? Ine. Kino kisolola kintu kikatampe kimwesha kuba’mba Lesa wituta muchima. Aye mwine Lesa wapaine kintu kikatampe, wanengezhezhe jishinda ja kukujilamo bantu kufuma ku bundengamambo ne lufu. Bumi bwa kwa Yesu bo bukuzhi bwapainwe pa mambo a atweba. (Loma 3:24) O ene mambo mutumwa Yoano kyo anembejile’mba: “Lesa byo ebatemwisha ba panopantanda, wapaine Mwananji yenkawa umo amba, bonse bamwitabila kechi bonaike ne, poso amba bekale na bumi bwa myaka.” (Yoano 3:16) Na mambo a buno butemwe bukatampe, tuji na luketekelo namba bumi bwa myaka ne myaka bukekalako byonka byo kyajinga ku ntendekelo. Paulo wanembele ku bena Loma amba: “Lubingisho luleta bumi nalo lwaishile ku bantu bonse mu bololoke bwa umo.”—Loma 5:18.

Twakonsha kuketekela kuba’mba mu kimye kyanji mwine Lesa kyatongolwa, kechi kukekala kumanama ne lufu panopantanda ne. Bwikalo bwatongolwa mu buku wa Lumwekesho bukeya. Waamba’mba: “Tala, kya kwikalamo Lesa kiji mu bantu, ne aye ukekala nabo, ne abo nabo bakekala ke bantu banji, ne aye Lesa mwine ukekala nabo, ne kwikala ke Lesa wabo: kabiji aye ukashimuna mipolo yonse ku meso abo; ne lufu kechi lukekalako jibiji ne; nangwa mabingo, nangwa kujila, nangwa misongo, kechi bikekalako jibiji ne: bintu bitanshi byapichijila.” (Lumwekesho 21:3, 4) Mwakonsha kwamba’mba, ‘Kechi nkatanyiwako ku bino byonse ne.’ Bino, kishinka ke kya kuba’mba mwakonsha. Kabiji umvwe mwafwa, Lesa wakonsha kwimusangula kufuma ku bafu. (Yoano 5:28, 29) Akino Lesa kyo kyo akeba, kabiji byo byo kikekala. Kwamba kuba’mba Lesa kechi wata muchima bantu ne, kechi kine ne!

“Fwenyai Kwipi ne Lesa”

Tutekeneshiwa bingi kuyuka amba Lesa watatulako mwingilo wanji wa kupwisha makatazho a bantu kikupu. Nga ano moba ubena kuba byepi? Twakonsha kuba byepi umvwe mutemwe wetu wafwa nangwa mwanetu wakolwa? Kine, kino kechi kyo kimye kya Lesa kya kufumyapo bikola ne lufu ne. Baibolo ulumbulula kuba’mba kwakishala pacheche kuba’mba kino kikafikizhiwe. Bino Lesa kechi witulekatu kwa kubula bukwasho ne. Mwana wa bwanga aye Yakoba waambile’mba: “Fwenyai kwipi ne Lesa, kabiji ne aye ukafwenya kwipi ne anweba.” (Yakoba 4:8) Kine, Mulenga wetu ukeba’mba twikale balunda nanji, ne boba bekala ke balunda nanji kechi bakankalwa kumona bukwasho bwanji nangwatu mu kimye kyo baji na makatazho akatampe ne.

Tufwenya byepi kwipi ne Lesa? Mfumu Davida washikishe jipuzho jintutu jimo myaka biumbi bisatu byapitapo, amba: “Anweba Yehoba . . . ñanyi ukekalanga pa mutumba wenu wazhila?” (Masalamo 15:1) Kabiji wakumbwile jipuzho janji byo atwajijile na kwamba’mba: “Yenkaye wenda bulongotu ne kuba byaoloka, ne kwamba byakine na muchima wanji yense; ubula kubabañana na lujimi wanji, nangwa kumuba kibi mulunda nanji ne.” (Masalamo 15:2, 3) Kwambatu kine, Yehoba utambwila bonse balondela jishinda jakaine ba Adama ne Evwa. Ufwenya kwipi ne boba bonse boba kyaswa muchima wanji.—Mpitulukilo ya mu mizhilo 6:24, 25; 1 Yoano 5:3.

Twakonsha kuba byepi kyaswa muchima wanji? Twafwainwa kufunda “kyawama ne kyaitabilwa ku meso a Lesa Mupulushi wetu,” ne kusalapo kwingijila monka mo kyaila. (1 Timoti 2:3) Kino kyavwangamo kuyuka kwalumbuluka kwa Mambo a Lesa, Baibolo. (Yoano 17:3; 2 Timoti 3:16, 17) Kechi kutanga Baibolo kya byonkabyotu ne. Twafwainwa kumwena ku Bayudea ba mu Beliya baumvwine byambo byasapwijile Paulo. Tutanga’mba: “Batambwile mambo na maboko abiji, ne kubalaulabalaula mu binembelo pa juba pa juba, amba, tumone kana bino bintu bya kine.”—Byubilo 17:11.

Byonkabyo, ne atweba lelo jino kutanga Baibolo kukosesha lwitabilo lwetu mwi Lesa ne kwitukwasha kukosesha bulunda bwetu ne aye. (Bahebelu 11:6) Kabiji kwitukwasha ne kuyuka Yehoba byo akwasha bantu—kechi kumwenamotu bicheche ne, bino kikatakata kumwenamo byavula bya myaka bya bonse batambwila bukine.

Akilangulukai pa byambo byaambapo bena Kilishitu bamo balunda na Lesa. Daniella wa myaka ya kusemwa 16, waamba’mba: “Yehoba namutemwa bingi, kabiji byavula bingi bintu byo nkelwa kumusanchilapo. Wampele bansemi baji na butemwe batemwa [Lesa] kabiji bamfunjisha monka mwayila mambo anji.” Mwina Kilishitu umo mu Uruguay wanembele’mba: “Muchima wami wayula na lusanchilo, kabiji natundaikwa kusanchila Yehoba pa lusa lwanji ne bulunda bwanji.” Lesa utambwila ne banyiketu bonse. Gabriela uji na myaka ya kusemwa itanu na ibiji, waamba’mba: “Lesa namutemwa bingi kukila bintu byonse bya panopantanda! Nji ne na Baibolo wami. Natemwa kufunda pe Lesa ne Mwananji.”

Lelo jino, bantu bavula baitabizha na muchima yense byambo byaambile nyimbi wa masalamo amba: “Kyangwamina amiwa kufwenya kwipi kwi Lesa.” (Masalamo 73:28) Bakwashiwa kumona mwakubila na makatazho o bapitamo luno, kabiji baji na luketekelo lwa kine kuba’mba bakekala myaka ne myaka mu Paladisa panopantanda. (1 Timoti 4:8) Mambo ka ne kubula kwitendekelako anweba bene ‘kufwenya kwipi ne Lesa’ ne? Betubula’mba: “Kechi uji kwalepa ne atweba bonse ne.” (Byubilo 17:27) Kine, Lesa wituta bingi muchima!

[Bipikichala pa peja 5]

Kwituta muchima kwa Yehoba kumwekela mu mashinda avula bingi

[Kipikichala pa peja 7]

Nangwatu banyike bakonsha kufwenya kwipi ne Lesa

[Bipikichala pa peja 7]

Lelo jino, Yehoba witukwasha kuchinchika, kabiji mu kimye kyanji mwine kyatongolwa ukafumyapo bikola ne lufu