Kusampanya Mambo Awama Mu Ntanda Ya Mitumba Ya Andes

TWAJINGA bantu 18, kabiji ko twakaile twakalajiletu panshi. Byo twalajile twizakamijilengatu mu myemba yo balenga nobe byola, akwe na kuteleka kumvula mukatampe byo aubilenga kyongo peulu ya malata. Byamwekelenga ka kimpampa kacheche ko twafikijilemo, twakuminye bingi amba kana yetu bantu batanshi kwikalamo nangwa ne.

Mambo ka bantu 18 kyo bafwakashijile ino mpunzha? Mukumbu waimenejile pa kizaku kyetu kya kukeba kubila monka mwayila mukambizho witupele Yesu wa kusapwila mambo awama “monse mwapela ntanda.” (Byubilo 1:8; Mat. 24:14) Twajinga pa lwendo lwa kuya na kusapwila ku mpunzha yajinga mwine munkonkoso mu Bolivian Andes.

Kyakatezhe Bingi pa Kuba’mba Tufike ku Andes

Kintu kitanshi kyakatezhe ke pa kuba’mba tufike ku yoya mpunzha. Twaishile kuyuka amba myotoka iya ku ano mapunzha kechi iyako kimye kyatongolwa ne. Sakya wa kuyamo byo afikile, twataine kuba’mba wakepa kukila byo twaketekejile, kino kyalengejile bamo ba mwi atweba kubula pa kwikala. Bino bonse twafikile ko twayilenga.

Kintu kyo twakebeshenga ke kusapwila bantu bajinga mu mizhi iji mu mitumba ya Bolivian Andes. Panyuma ya lwendo lwetu lwa na sakya, aba bonse bajinga mu jibumba jetu, basendele mpao ketuyile ne pamo ku matelo a mu kalolo kapita ku mutumba.

Nangwa kya kuba mizhi yamwekele kukepa, mazubo abalañene bingi, o ene mambo o kyasendejile kimye kyabaya pa kuba’mba tufike mu mizhi yonse. Nangwa kya kuba twaendele musinso walepa byepi, mazubo aubilengatu saka amweka kulutwe yetu. Twalubijilengamo javula na mambo a kuvula kwa tulolo mu majimi.

“Mambo ka o Mwabujijile Kwiya Patanshi?”

Mwanamukazhi umo wasangalele bingi pa kumona musinso walepa ye twaendele, wituswishishe kwingijisha kibamba kyanji kya kutekelamo ne nkunyi yanji pa kuba’mba tunengezhe kajo ka pachaile. Mwanamulume umo byo aishile kuyuka Baibolo byo afunjisha pa kimwekana umvwe muntu wafwa, waipwizhe amba, “Mambo ka o mwabujijile kwiya patanshi?” Wamwesheshe bingi lusekelo lukatampe kya kuba’mba byo twafuminenga pa muzhi wanji, witushinjikinyeko saka epuzha ne mepuzho akwabo. Kwajingapo ne muntu mukwabo ukyangye kumonapo Bakamonyi ba kwa Yehoba wamwesheshe bingi lusekelo pa mabuku etu alumbulula Baibolo. Witusanchijile bingi pa ku mufwakashisha kabiji witupele ne kii ya kushinkwila mu kishimikwa mo twakonsheshe kulaala kimye kya bufuku.

Juba jimo na kimye kya bufuku, twafikile matente etu pakachi ka muzhi wa nyeu kwa kubula kuyuka. Yafikenejiletu kuzhingila ne kutatula kwitusumauna. Pano twakokele bingi pa kuba’mba tutatule kutuntuluka, olo, nobe mu kukopa kwa jiso, nyeu yalekele kwitusuma.

Pa kutendekatu misana ne mbavu yetu yakolelenga bingi na mambo a kulaala panshi, bino ko kyakayanga kimye kya bufuku twapijijilwe. Byonse byakolelenga bufuku twaishile kwibilubako mu kimye kya lukelo po twatambilenga makumbi saka abena kwenda pachepache munsa ya kinkunenke, kabiji kwakalepa byobya twamwenenga mitumba ya sino yawamisha. Kyongo kyaumvwanyikilenga kyajingatu kya mpota ya mema a mu kakola ne nyimbo ya tuñonyi.

Panyuma ya kowa mu kakola, twabalawile kinembelo kya juba bonse pamo, twabwela twisongezha ne kutatulako kuya mu mitumba ku mizhi yaikejile kwalepa. Kwibikako kwetu pa kukanjila mitumba kwayijilemo. Twataine inetu wakikulumpe awo wajijile byo aishile kuyuka amba jizhina ja Lesa, ja kuba’mba Yehoba, jitanwa mu Baibolo. Kino kintu kyamufikile bingi ku muchima. Kufumatu lolo, watendekele kutela pa jizhina ja Lesa mu lulombelo.

Mwanamulume wakikulumpe waambile’mba Lesa wafwainwa wamuvulukile, kabiji ponkapo watendekele kwimba lwimbo amba bamalaika bo betutumine. Wamulume mukwabo, waumvwine bibi byo twafumine pa nzubo yanji, witubujile amba kafwako nangwatu muntu umo wa ku muzhi kwanji wamufwakashijilepo kala ne. Wakuminye bingi pa kuyuka amba twafumine ku muzhi wa La Paz. Kabiji ne mukwabo wamulume waumvwine bingi bulongo amba Bakamonyi ba kwa Yehoba bafwakashisha bantu pa mazubo abo, bino machechi akwabo eta bantu kupichila mu kujizha ngengele.

Mazubo onse aji ku iye mpunzha kafwamo malaichi, umvwe pafita bantu balaala kabiji babukatu inge bwakya. Onkao mambo, pa kuba’mba tutane bantu pa mazubo, twatendekanga kusapwila na kimye kya 6 koloko ya lukelo. Umvwe twakelwa twatananga bantu bavula baya kala na kwingila mu majimi. Bamo bo twatainenga na kwingila baimenenga ne kuteleka ku Byambo bya Lesa byo twasapwijilenga. Kino kyapanangako ne kimye ku bañombe bakokelenga lukasu wa kujiminako kuba’mba bakokolokeko. Bantu bavula bo twatananga pa mazubo betwanshikilanga biseba bya mikooko panshi amba twikalepo ne kwita kisemi kyonse amba bateleke ku byambo. Banjimi bamo betupelenga masaka akatampe a mataba na mambotu a kumvwa bulongo pa kutambula mabuku alumbulula Baibolo o twibashijilenga.

“Kechi Mwandubileko Ne”

Ee, bantu pa kuba’mba baileko palutwe mu kuyuka maana aji mu Baibolo, bakebewa kwibafwakesha javula. Bavula betusashijile amba tukabweleko na kwibafunjishanga. Na mambo a kino, twafwakashijile ino mpunzha ya Bolivia pa bimye byavula bingi.

Pa lwendo lukwabo, wamukazhi umo wakikulumpe waumvwine bingi lusekelo byo twabwelele, ne kwamba’mba: “Mujitu nobe baana kwi amiwa. Kechi mwandubileko ne.” Mwanamulume umo witusanchijile bingi pa mwingilo wetu kabiji witwambijile amba twakasuluka kufikila ku nzubo yanji pa lwendo lukwabo. Mfweto yo twamwenejilemo pa kwibikako kwetu yajinga ya kumvwa amba mwanamukazhi ye twisambile nanji pa lwendo lwafumineko wayile ku mpunzha ya ku taunyi, kabiji wasapwijilenga ne mambo awama.

Juba japeleleko pa lwendo lutanshi, palafinyi yo twaingijishanga mu kitofu kya kutekelapo kajo yapwile kabiji kwashajiletu kajo kacheche. Twachabile nkunyi yavula ya kubanzhilako mujilo, twatekele kajo kashajilepo ne kutendekako kubwelamo panshi. Palepele bingi na taunyi ko twakonsheshe kupatama mu sakya. Twakafikilenga bufuku bwine.

Kimye kya Kubwela ku Nzubo

Lwendo lwa kubwelamo ku nzubo lwakatezhe mambo sakya yafwile. Mu kuya kwa kimye, twaishile kukanjila mu kimbayambaya mwajinga bantu bavula.

Kino kitupele jishuko ja kusapwila ku bantu bo twajinga nabo mu kimbayambaya mambo bakebelenga kuyuka ene mambo o twaijile kokwa. Nangwa kya kuba bantu ba kuyoya mpunzha bajinga na bumvu, bino bakasuluka bingi kabiji baseka na bakwabo.

Panyuma ya kwenda mu kimbayambaya pa maawala atanu na ana, twafikile ku nzubo saka twazoba ne kushiya na mashika. Bino lwendo lwetu kechi twapulwijilemotu mabula ne. Byo twajinga pa lwendo, twakonsheshe kunengezha lufunjisho lwa Baibolo na mwanamukazhi wikala konka ku taunyi ko twailenga.

Jajinga jishuko jawama bingi ja kusapwila mambo awama ku bantu bekala ku mapunzha aji kwalepa. Twasapwijile mu mizhi ikatampe ina ne mu icheche yavula. Twalangulukile pa byambo bya kuba’mba: “Byo auba buya maulu a muluwe ubenakwiya pa mitumba na kuleta mambo awama, ne kutaya mbila ya mambo a mutende, yenka uleta mambo awama a lusekelo ne kusapwila bya lupulukilo.”—Isa. 52:7; Loma 10:15.

[Kipikichala pa peja 17]

Benengezhezhe kusapwila mambo awama