Mulaye Wanema Bingi

NJI na mulaye wanema bingi. Akishai ndondolole kyalengejile amiwa nsemi wa mukazhi wa kina Spain, kwikala na iwe mulaye.

Mu nzubo ya bansemi kechi mwajinga mutende ne kukwatankana ne. Mu kisemi kyetu mwajinga bulanda bukatampe kimye nkasami wa mulume wa myaka ya kusemwa ina kyo afwile mu mapuso. Kununga pa kino, byubilo byatama byajinga na batata byalengejile bamama kubula kwiyowa mutende uji mu masongola. Nangwa byonkabyo, alwe lukatazho kechi lwalengejile bamama kuleka kufunjisha byubilo byawama kwi kolojami wa mulume ne kwi amiwa ne.

Mu kuya kwa moba, kolojami wa mulume wasongwele, kabiji ne amiwa nasongwelwe. Byo papichiletu kimye kicheche, bamama bebakwachile na kikola kya kansa, akyo kyafikenejiletu kwibepaya. Bino saka bakyangye kufwa ne, betushijile bunonshi.

Wamukazhi umo wisambile ne bamama pa luketekelo lwa lusanguko luji mu Binembelo, kabiji ne bamama baswile lufunjisho lwa Baibolo. Mu moba apeleleko a bwikalo bwabo, byambo bya luketekelo biji mu Baibolo bibakwashishe kuyuka biji bwikalo ne kutana lusekelo.

Byo twamwene Baibolo byo ibakwashishe bulongo bamama, kolojami ne amiwa twatendekele kufunda Byambo bya Lesa. Nabatizhiwe ne kwikala Kamonyi wa kwa Yehoba saka kwakishala ñondo umo kuba’mba mwanami wa bubiji asemwe. Naishile kusema mwana wa mukazhi walamba bingi ye twatumbile jizhina amba Lucía.

Juba jo nabatizwe janemene bingi kwi amiwa. Kishinka kimo kyalengejile ke kya kuba’mba najinga muntu wa Yehoba, byo nepaine kumwingijilanga mu bwikalo bwami bonse. Kishinka kikwabo kyalengejile ke kya kuba’mba nakonsheshe kubulangako baana bami bo natemwa wa mulume ne wa mukazhi bintu byo naitabijilemo.

Nangwa byonkabyo, lusekelo lo najinga nalo pa uno mwana lwapwile. Lucía byo afikizhe myaka ya kusemwa ina, munda mwatendekele kumukatazha bingi. Panyuma ya kumupima bimye byavula, dokotala walondolwele amba kuji kintu kyatumba ku machima kiji nobe jiolenji. Kabiji watwajijile kulondolola amba akye kintu kiji na Lucía kibena kukoma bingi bukiji. Lucía watendekele kuyandakana na kikola kya kansa pa myaka itanu na ibiji, akyo kyavwangilemo ne kwikala moba avula mu kipatela.

Muchima wa Kwipana

Mu iye myaka yakatezhe, Lucía wantundaikanga ne kupwisha bulanda bwami byo ankumbachilangamo ne kumfyompa. Kuchinchika kwanji ku kikye kikola kwakumishe bamingilo mu kipatela. Kimye kyonse waingijilanga pamo na banasi, kwibakwashako kutwala kajo ne bintutu bikwabo ku baana bakwabo bajinga mu kipatela ku bibamba byajinga ku bwipi. Banasi bamupele Lucía munkukumba utoka ne kakikachi ko avwalanga, kakumuyukisha’mba “nkwasho wa banasi.”

Wa mwingilo umo mu kipatela uvuluka’mba, “byaubanga Lucía byamfikile bingi ku muchima. Wajinga mwanyike wabambakana, ulanguluka kabiji watemenwe kulenga bipikichala. Wakasulukile bingi na bantu kabiji wakomene bingi mu maana.”

Lucía wajinga na bukose ne butekanye bo afunjile mu Mambo a Lesa. (Hebe. 4:12) Wayukishetu amba mu ntanda ipya, “lufu kechi lukekalako jibiji ne; nangwa mabingo, nangwa kujila, nangwa misongo, kechi bikekalako jibiji ne,” byonka byalaya Mambo a Lesa. (Lum. 21:4) Byo ajinga wa butemwe, waingijishanga kimye kyonse kwisamba na bakwabo byambo biji mu Baibolo. Luketekelo lwa lusanguko lwamukwashishe Lucía kukasuluka mu milanguluko ne kutwajijila kwikala wa lusekelo nangwa kya kuba kechi pajingapo kiji kyonse kyamwesheshe amba kikola kyanji kikapwa ne. (Isa. 25:8) Watwajijile kwikala wakosa kufikatu ne kimye kyo afwile ku kikola kya kansa.

Pa joja juba po po nalayile mulaye wanema bingi. Lucía wakankelwe kulabamo. Bashanji bamukwachile ku kuboko kumo ne amiwa namukwachile ku kuboko kukwabo. Namunongotwejile namba: “Kwakamwa ne, kechi nsakukusha bunke ne. Pemangatu pachepache. Umvwe wasangulwa ukekala na butuntulu bwa mubiji bwawama. Kechi ukayanda ku bikola jibiji ne, kabiji nkekala ne obewa.”

Pano nafwainwa nkafikizhe iwe mulaye. Nayuka namba kupembelela lusanguko kechi kwapela ne. Bino nayuka namba umvwe naketekela mwi Yehoba ne kutwajijila kwikala wakishinka kwi aye, nkekalako byo akasangulwa kufuma ku bafu.

Kya Buswanyi Kyashile Lucía

Byachinchikile Lucía, kubikapotu ne bitukwashishe kipwilo, bibafikile bingi ku muchima bamwata wami babujile kwikala Bakamonyi ba kwa Yehoba. Juba jo afwile Lucía, bamwata wami bambujile amba babena kukeba kwalulula milanguluko yabo. Byo papichiletu milungu icheche, baipwizhe mukulumpe mu kipwilo amba ebafunjishenga Baibolo. Ponkapotu bamwata wami batendekele kutanwa ku kupwila konse. Na bukwasho bwa Yehoba balekele kupepa fwanka, kintu kyo bakankelwe kuleka patanshi.

Bulanda bonji nabo pa kufwisha Lucía kechi bwa kipwa ne, bino mbena kusanchila bingi Yehoba pa kya buswanyi kyashile Lucía. Bamwata wami ne amiwa twitekenesha bingi pa mambo a luketekelo lwa lusanguko, ne kufwanyikizha kimye kyo tukamona Lucía jibiji, awo wajinga wakasuluka, meso anji awama ne tubofwa twanseko pa mabuta anji.

Makatazho apichilemo mwanami alengejile muntu ye twaikala nanji kinkalankulo kubapo kimo. Pa Kibelushi lukelo byo kwanokelenga mvula, pa nzubo yetu paishile mwanamukazhi wajinga na mwananji wa mulume mo bafunjilanga ne Lucía pa sukulu umo. Uno mwanamukazhi wafwishishe mwananji mukwabo wa mulume, kabiji wabwela wafwisha ne mwana mukwabo wajinga na myaka ya kusemwa jikumi na umo ku kikola kintutu kimo. Byo ayukile kyamwekele kwi Lucía, uno mwanamukazhi waipwizhe mpunzha ko twikela kepo etufwakashijile. Wakebele kuyuka byo nachinchikilenga na lufu lwa kwa Lucía ne kumbulako amba tulenge kabungwe ka bukwasho kakutekenesha bainetu baji mu lukatazho lwa iwe musango.

Nalondolwele namba amiwa natana lutekenesho lwa kine mu milaye ya mu Baibolo, kabiji lwanema kechi lwakonsha kwesakana pamo na lutekenesho lwa bantu ne. Waishile kwikala na luketekelo byo na mutangijile byambo byaambile Yesu byanembwa mu Yoano 5:28, 29. Waswile lufunjisho lwa Baibolo kabiji ponkapotu watendekele kwikala na ‘mutende wa Lesa ubula kuyukanyika, ulama michima ne milanguluko.’ (Fili. 4:7) Javula inge twafunjila pamo Baibolo, tutulumana ne kufwanyikizha byo kikekala mu ntanda ipya byo tukatambulwilanga batemwe betu bakasangulwa.

Ee, bwikalo bwa kwa Lucía bwa pa ka kimyetu kacheche bwitushila kya buswanyi kya myaka ne myaka. Luketekelo lwanji lwitukwasha kukwatankanya kisemi kyetu mu kwingijila Lesa, kabiji wandengela amiwa kukosela mu byo nafuukulapo ne kutwajijila kwikala wakosa mu lwitabilo. Kwa kubula nangwa kuzhinaukatu ne, atweba bonse twafwishapo kala batemwe betu abo bakakonsha kusangulwa tuji na mulaye wanema bingi.

[Kipikichala pa peja 20]

Awe ye paladisa wafwanyikizhe Lucía