Baoloka Bakatotanga Lesa Myaka Ne Myaka

“Mololoke bakamuvulukanga myaka . . . Bololoke bwanji bukakulayila myaka.”—SALA. 112:6, 9.

1. (a) Bwikalo bwa bantu baoloka kwi Lesa bukekala byepi kulutwe na lwendo? (b) Bwipuzho ka bwiya mu milanguluko?

BANTU bonse baoloka kwi Lesa batengela bwikalo bwawama bingi bwa kulutwe! Bakatwajijila myaka ne myaka kufunda byubilo byawama bya kwa Yehoba. Kutwajijila kufunda bintu byalenga Lesa kukalengela kumutotanga. Pa kuba’mba tukamwenemo mu bwikalo bwawama bwa kulutwe twafwainwa kwikala ‘baoloka’ kwesakana na byaamba Salamo 112. Pano nga Yehoba, Lesa wazhila kabiji waoloka, ubingisha byepi bantu bandengamambo ke baoloka? Nangwa kya kuba twibikako kuba kyaoloka, bino monka twalengela bilubo, kimo kimye ne mambotu akatampe.—Loma 3:23; Yako. 3:2.

2. Na mambo a butemwe, ñanyi bya kukumya bibiji byaubile Yehoba?

² Na mambo a butemwe, Yehoba wanengezhe jishinda bantu bandengamambo jo bakonsha kwikelamo baoloka. Ñanyi jishinda ajo? Patanshi, mu jishinda ja kukumya watuntulwijile bumi bwa Mwananji ye atemwisha munda ya kamwale wabula kusambakanapo na mwanamulume pa kuba’mba akakonshe kusemwa walumbuluka. (Luka 1:30-35) Kabiji panyuma ya kumwipaya ku balwanyi, Yehoba waubile kya kukumya kikwabo. Lesa wamusangwile Yesu ne kwikala kilengwa kya mupashi jibiji.—1 Pe. 3:18.

3. Ki ka kyalengejile Yehoba kufweta Mwananji bumi bwa mwiulu?

³ Yehoba wamufwetele Yesu bumi bubula kupwa bo abujile kimye kyo ajinga mwiulu saka akyangye kwiya panopantanda. (Hebe. 7:15-17, 28) Yehoba kyamutokejile bingi ku muchima pa kumufweta mambo Yesu watwajijile kwikala wa kishinka mu meseko akatazha. Kya kine Yesu walengejile Shanji kwikala na mwa kumukumbwila mwafikilamo Satana pa bubela bwanji bwa kuba’mba bantu bamwingijila Lesa na mambo a kajilo, kechi na mambo a butemwe ne.—Mana. 27:11.

4. (a) Yesu byo abwelele mwiulu, witubijile ka, kabiji Yehoba waubile byepi? (b) Mumvwa byepi mu muchima wenu pa bimubila Yehoba ne Yesu?

⁴ Yesu wakobile kyakilamo kunema mwiulu. ‘Witumwekejile ku meso a Lesa’ na kufikizha buneme bwa “mashi anji mwine.” Tata wetu wa mwiulu waswile mulambo wa kwa Yesu wa “mfuto ya mambo etu.” Onkao mambo byo ‘etutokesha michima’ twafikilamo ‘kumwingijila Lesa mumi.’ Kino kitulengela kwamba byambo bitanshi biji mu Salamo 112 bya kuba’mba: “Totai Yehoba anweba bonse.”—Hebe. 9:12-14, 24; 1 Yoa. 2:2.

5. (a) Twakonsha kuba byepi pa kuba’mba twikale baoloka kwi Lesa? (b) Byambo biji mu Salamo 111 biswañana byepi na byambo biji mu Salamo 112?

⁵ Pa kuba’mba twikale baoloka kwi Lesa twafwainwa kwitabila mu mashi akwa Yesu. Twafwainwa kusanchilanga Lesa moba onsetu mambo witutemwa bingi. (Yoa. 3:16) Kabiji twafwainwa kutanganga mambo a Lesa ne kwibikishako kwialondela mu bwikalo. Mu Salamo 112 muji lufunjisho lwanema bingi kuboba bakeba kwingijila Lesa na jiwi ja mu muchima jatoka. Byambo biji mu uno Salamo biswañana bingi na biji mu Salamo 111. Mu mulaka wa Kihebelu ano masalamo abiji atendeka na byambo bya kuba’mba: “Totai Yehoba anweba bonse” nangwa’mba “Aleluya,” bino palondela mikuku ya byambo 22, yonse yatendeka na byambo biji mu ndonda ya bisopelo bya Kihebelu.a

Kine Kintu Kileta Lusekelo

6. “Awa” waakamwanga Lesa ye batongola mu Salamo 112 ukobilwa byepi bibusa?

⁶ “Ye mwine wa lusekelo awa waakamwa Yehoba. Yenka usangalesha mu mikambizho yenu. Ne ba nkunwa yanji bakekala ke babilobo panopantanda: Kisemi kya baoloka kikobilwa bibusa.” (Sala. 112:1, 2) Patanshi nyimbi wa masalamo watongola “awa” muntu umo amba “ye mwine wa lusekelo” bino wabwela watongola bavula amba “baoloka” ku mpelo ya kyepelo 2. Akye kibena kumwesha’mba Salamo 112 waamba ne pa jibumba ja bantu bavula. Mutumwa Paulo waingijishe byambo bya Salamo 112:9 kwamba pa bena Kilishitu ba mu myaka kitota kitanshi. (Tangai 2 Kolinda 9:8, 9.) Awe salamo wamwesha kine kintu kiletela lusekelo baana ba bwanga ba kwa Yesu baji panopantanda.

7. Bakalume ba Lesa mambo ka o bafwainwa kwikela na moyo wa kumwakamwa, kabiji mwafwainwa kubanga byepi na mikambizho ya Lesa?

⁷ Byonkatu byaamba Salamo 112:1, bena Kilishitu bakine batana lusekelo lukatampe mu kwikala ‘bakamwa Yehoba.’ Awe moyo wa kuchina kumufichisha ku muchima wibakwasha kuchinuzhuka mupashi wa panopantanda wa kwa Satana. Abo ‘basangalela’ mu kutanga byambo bya Lesa ne kukokela mikambizho yanji. Ino mikambizho yavwangamo ne kusapwila mambo awama a Bufumu panopantanda ponse. Bebikako kufunjisha ba mu mikoka yonse ya bantu kwaluka ke baana ba bwanga, akwe na kujimunako bangubabibi pa mambo a kwiya kwa juba ja bukaji bwa Lesa.

8. (a) Bantu bepana kwi Lesa lelo jino baubilwa byepi bibusa pa kwingila kwabo na mukoyo? (b) Baji na luketekelo lwa kwikala panopantanda bakobilwa byepi bibusa kulutwe na lwendo?

⁸ Na mambo a kuba’mba bakokela ino mikambizho kyafumamo ke kya kuba’mba lelo jino, jibumba ja bakalume ba Lesa panopantanda jabailako kufika ku mamilyoni atanu na abiji. Ñanyi wakonsha kukana kya kuba’mba bano bantu pano ke “babilobo panopantanda”? (Yoa. 10:16; Lum. 7:9, 14) Kabiji “bakobilwa bibusa” Lesa byo akafikizha nkebelo yanji. Jibumba ja baji na luketekelo lwa kwikala panopantanda jikazhikijilwa ku “malwa akatampe” abena kwiya, kabiji jo jikatwela mu “ntanda ipya,” “mo bwaikala bololoke.” Kikapelako bakapuluka pa Amagedonyi ‘bakobilwa bibusa’ byavula bingi. Bakatengelanga kutambwila bakasangulwa. Alwe luketekelo byo lwawamapo! Aba ‘basangalela’ mu mikambizho ya Lesa bakatendeka kulumbuluka pachepache kufikatu ne byo bakekala na ‘bwana bwa bene bwa lukumo bwa baana ba Lesa.’—2 Pe. 3:13; Loma 8:21.

Kwingijisha bya Bunonshi Bulongo

9, 10. Bena Kilishitu bakine bengijisha byepi bunonshi bwabo bwa ku mupashi, kabiji bololoke bwabo bukakulayila myaka mu ñanyi jishinda?

⁹ “Nsabo ne bya bunonshi biji mu nzubo yanji; Ne bololoke bwanji bwakulayila myaka. Kwi aye waoloka kyeya kimumwekela mu mfishi: Ye wa bupe, ne wa kuba lusa, ne waoloka.” (Sala. 112:3, 4) Mu kimye kya kala, bakalume ba Lesa bamo bajinga bingi na bunonshi. Mu ñambilo ikwabo, bonse baitabilwa kwi Lesa bekala bingi na bunonshi nangwa kya kuba kechi bunonshi bwa ku mubiji ne. Kwambatu kine, bavula basalapo kwikepesha ku meso a Lesa ke bantu bakajilwa balengululwa byonkatu byo kyajinga mu moba akwa Yesu. (Luka 4:18; 7:22; Yoa 7:49) Nangwa byonkabyo muntu kikale munonshi nangwa wakajilwa wakonsha kunonka ku mupashi, ko kuba’mba kwikala na maana akuyuka Lesa.—Mat. 6:20; 1 Timo. 6:18, 19; tangai Yakoba 2:5.

¹⁰ Bena Kilishitu bashingwa ne balunda nabo kechi belamina bunonshi bwa ku mupashi ne. Pa kuba abo kyo ‘kyeya kimwekela’ mu mfishi iji mu ntanda ya kwa Satana ‘kya baoloka.’ Basama nobe kyeya kupichila mu kubulako bakwabo kuba’mba nabo bamwenemo mu bya buneme bya ku mupashi biji mu maana akuyuka Lesa. Bakajimbuluzhi beseka na ngovu kulekesha mwingilo wa kusapwila, pano bino bakankalwa. Bipangwa bya mwingilo waoloka ‘bikakulaila myaka.’ Umvwe bakalume ba Lesa bachinchika mu bololoke, bakonsha kusumininwa amba bakekala na bumi “bwakulayila myaka.”

11, 12. Mashinda ka amo engijishishamo bakalume ba Lesa bintu byabo?

¹¹ Bantu ba Lesa, kikale jibumba ja bashingwa nangwa ba mu “jibumba jikatampe” bampanyi bingi. Salamo112:9 waamba’mba: “Aye wibipalañanya, wapana ku bayanji.” Bena Kilishitu bakine ano moba babingula mibingu ya kukwasha bena Kilishitu bakwabo ne bantutu bo bekala nabo kinkalankulo bakajilwa. Kabiji bapana bupe bwakukwasha baponenwa na bya malwa. Kwesakanatu na byaambile Yesu, kuba bino kuleta bingi lusekelo.—Tangai Byubilo bya Batumwa 20:35; 2 Kolinda 9:7.

¹² Kikwabo, akilangulukai pa mali engila pa kunembwa kwa uno magazini mu milaka 172 yavula yamba bakajilwa. Kabiji vulukai kuba’mba uno magazini bamunengezha ne mu mulaka wa kwamba na maboko wa bashinka matwi ne mu mulaka utanga ba bampofu.

Uji na Lusa Kabiji Waoloka

13. Bañanyi bakumwenako bawama mu kupana na muchima wa lusa, kabiji twakonsha kulonda byepi kya kumwenako kyabo?

¹³ “Awa uba lusa ne kukwashañana na byanji ukamona byawama.” (Sala. 112:5) Ne anweba mwafwainwa mwayuka kino kuba’mba kechi bonse bapana baji na lusa ne. Bamo bapaina kwitota nangwa’mba mambo baji na byavula. Kechi kitokesha ku muchima kutambula bukwasho ku muntu witota nangwa umona nobe mwamukondola ne. Kiwama bingi kutambula bukwasho ku muntu uji na lusa. Yehoba ye mwine wa kumwenako wawama mu kuba lusa ne mu kupana na lusekelo. (1 Timo. 1:11; Yako. 1:5, 17) Yesu wamwesheshetu suka lusa lwa Shanji. (Mako 1:40-42) Onkao mambo, pa kuba’mba Lesa emumone amba mwaoloka, mwafwainwa kupananga na lusekelo ne na lusa, kikatakata mu mwingilo wa kukwasha bantu kuyuka Yehoba.

14. Mashinda ka amo akonsha kulengela ‘mambo etu kulumbuluka bulongo mu kije’?

¹⁴ “Mambo anji akalumbuluka bulongo mu kije.” (Sala. 112:5) Byonkatu byo kyaambijilwe jimo, jibumba ja kalama wa kishinka jata bingi muchima ku bintu bya Nkambo yabo monka mwayila bololoke bwa Yehoba. (Tangai Luka 12:42-44.) Kino kimweka kupichila mu mikambizho ya mu Binembelo yanembelwa bakulumpe mu bipwilo abo kimye kimo bachiba mambo akatampe auba ba mu kipwilo. Kabiji kwingila mu bololoke kwa jibumba ja kalume kumwekela mu mikambizho yo bapana ya bya kwingila mu bipwilo, mu mazubo a bamishonale, ne a Betele. Bololoke kechi bumweshatu bakulumpe mu kipwilo bonka ne, bino bena Kilishitu bakwabo nabo bebumwesha mu byo boba na bakwabo, na bantu babula kwitabila, ne mu bya busulu.—Tangai Mika 6:8, 11.

Mapesho a Baoloka

15, 16. (a) Jiwi ja byatama bya mu ntanda jibalengela kumvwa byepi baoloka? (b) Kabiji ki ka bakalume ba Lesa kyo basa kutwajijila na kuba?

¹⁵ “Mambo aye kechi ukatenkena nangwa pacheche ne; Mololoke bakamuvulukanga myaka. Kechi ukachina pa kumvwa jiwi ja byatama ne: Muchima wanji wata kumo konka, saka aketekela Yehoba. Muchima wanji waikajikwatu po! kechi ukoba moyo ne, Poso akamone byo asaka pa balwanyi banji.” (Sala. 112:6-8) Kala mu ntanda nangwa mwamwekanga byatama bino kechi byonka byo byavula luno ne, mambo lelo jino makondo, bumpupabizhila, bikola byabujileko kala, ne byakala bibena kubwela jibiji, bumbanzhi, buyanji ne kutamisha mwela byauba ne woo. Baoloka ku meso a Lesa nabo bafikilwa na bino bya malwa pano bino kechi bakakilwa na moyo wa kuchina bya kulutwe ne. Michima yabo ‘yaikajikwatu po,’ batala kulutwe na luketekelo lwakosa, kabiji bayuka kuba’mba mu ntanda ipya ya kwa Lesa mukekala bololoke ijitu pepi. Umvwe bya malwa bibafikila bachinchika mambo baketekela mwi Yehoba na muchima yense. Waoloka “kechi ukatenkena nangwa pacheche ne” mambo Lesa umukwasha ne kumupa bulume bwa kuchinchika.—Fili 4:13.

¹⁶ Bantu ba Lesa baoloka bebashikwa bingi kabiji bebabepela ku bakajimbuluzhi, pano bino bakankalwa kwibalekesha kusapwila. Kabiji kino kechi kikalengela bena Kilishitu bakine kuleka kusapwila ne. Bakalume ba Lesa bakosa mu mwingilo wibapa Lesa wa kusapwila mambo awama a Bufumu ne kulenga batambwila ano mambo ke baana ba bwanga. Kechi kyalubwa kuba’mba bantu baoloka babena kupita mu lumanamo lwavula bingi mpelo byo yafwenya kala pepi ne. Aluno lupato lukafika pa kankomo kimye kya kulukukwa kwa ntanda yonse na Satana Diabola, po akelumbulula bu Gogi wa Magogi. Kikapelako ‘tukamona balwanyi betu’ byo bakebavizha. Byo kikawamapo kwimwena bikazhijikwa jizhina ja Yehoba!—Ezi. 38:18, 22, 23.

“Ukatumbijikwa na Buneme”

17. Baoloka ‘bakatumbijikwa na buneme’ mu ñanyi jishinda?

¹⁷ Kikawama bingi kutota Yehoba mu buumo, kwakubula kumanyikwa kwi Diabola ne ntanda yanji. Bonse baoloka kwi Lesa bakamutotanga Yehoba na lusekelo myaka ne myaka. Kechi bakebashinda nangwa kwibalengesha bumvu ne, mambo Yehoba wibalaya’mba “lusengo” wa baoloka “ukatumbijikwa na buneme.” (Sala. 112:9) Bantu ba Yehoba baoloka bakatumbijikwa pa kuzhiya kwa bonse basatukila bumfumu bwa kwa Yehoba.

18. Byambo byapelako bya Salamo 112 bikafika byepi?

¹⁸ “Mubi ukekimona ne kufitwa ukafitwa ku muchima; Ukashenka ku meno ne kuzhimañana: Ne kusaka kwa babi kukonaika.” (Sala. 112:10) Bonse baji na michima yayula na bubi ne lupato batwajijila na kumanyika bantu ba Lesa katatakatu ‘bakazhimañane.’ Kusaka kwa babi kwa kukeba kulekesha mwingilo wetu kukazhiya pamo nabo pa “malwa akatampe” abena kwiya.”—Mat. 24:21.

19. Luketekelo ka lo muji nalo?

¹⁹ Nanchi mukatanwa pa boba bakapuluka bakekala na lusekelo lukatampe mu kimye kya kushinda nyi? Kikale mwafwa na mambo a bikola nangwa a bukote mpelo ya ntanda ya kwa Satana saka ikyangye kufika, nanchi kine mukatanwa pa “baoloka” bakasangulwa nyi? (Byu. 24:15) Mukumbu ke wa kuba’mba ee umvwe mwatwajijila kwitabila mu bukuzhi bwa kitapisho kya kwa Yesu ne kulonda Yehoba, byonka byuba bantu bemenwako na “mwanamulume” waoloka watongolwa mu Salamo 112. (Tangai Efisesa 5:1, 2.) Yehoba ‘ukebavuluka’ bantu ba uno mutundu, nangwatu mingilo yabo yaoloka kechi ukeilengulula ne. Kabiji Yehoba ukebavulukanga ne kwibatemwa myaka ne myaka.—Sala. 112:3, 6, 9.

[Tubyambo twa mushi]

Mepuzho a Kulangulukapo

• Ñanyi bishinka byakonsha kwitulengela kwamba’mba: “Aleluya”?

• Ki ka kibena kumweka mu ano moba etu a lelo kyalengela bena Kilishitu bakine kusekela?

• Yehoba watemwa muntu upana na muchima wa mutundu ka?

[Kipikichala pa peja 25]

Pa kuba’mba twikale baoloka kwi Lesa twafwainwa kwitabila mu mashi a kwa Yesu

[Bipikichala pa peja 26]

Mibingu ibingulwa kwakubula kukanjikizha ikwasha baponenwa na bya malwa ne kusampanya kwa mabuku alumbulula Baibolo