Nataine Kintu Kyanema mu Bwikalo

Byashimikizha ba Gaspar Martínez

Jishimikila jami jaamba kutendeka byo najinga kalombwana muyanji ku mpunzha imo ya ku muzhi ne byo naishile kwikala munonshi mu taunyi. Pano bino musakumona kuba’mba bunonshi bo naikele nabo kechi bo naketekejile ne.

NAKOMEJILE mu mpunzha mwabujile bunjimi bwa kine mu ma 1930 mu muzhi wa Rioja ku kabeta ka ku buyeke bwa Spain. Byo nafikizhe myaka ya kusemwa jikumi, nalekele sukulu, bino pa kyokya kimye nayukile kunemba ne kutanga. Nayanga mungye pamo na balongo bami batanu na umo babalume ne babakazhi na kujiisha mikooko ne kujima mpunzha yetu icheche.

Buyanji bwitulengejile kulanguluka’mba mali ne bintu bya ku mubiji byo byajinga byanema. Twaumvwijilenga kichima boba bajinga na byavula kwitukila. Nangwa byonkabyo, mukulumpe wa chechi waambile kuba’mba “muzhi wetu ye wajinga wa bupopweshi pa mizhi yo atangijilanga.” Kechi wayukile kuba’mba mu kuya kwa moba bantu bavula bakekileka Bukatolika ne.

Kukeba Kintu Kyawama

Nasongwele Mercedes, nsongwakazhi wa mu yenkawa muzhi. Kechi papichile ne kimye kyabaya ne, twaikele na mwana wa mulume. Mu mwaka wa 1957 twavilukijile mu muzhi wajinga pepi wa Logroño, kabiji mu kuya kwa moba kisemi kyami kyonse kyavilukile. Nayukile kuba’mba byonji wa mwingilo wabula kuyukisha nkito, kechi nakonsheshe kwikala na mali a kusungilamo kisemi ne. Nalangulukilenga kwa kutana bukwasho. Natendekele kukeba mu butala bwa mabuku, nangwa kya kuba kechi nayukile kyo nakebelengamo ne.

Palutwe kacheche, naumvwine saka bamba mutanchi wa pa waileshi wa kufunjisha Baibolo kupichila mu kunemba makalata. Byo napwishishe kufunda, ba Polotesitanti bamo bansolomokele. Panyuma ya kuyako bimye bibiji ko bapopwelanga, namwene bantangi babo byo bepachikilenga. Kechi nabweleleko jibiji ne, kabiji napwishishe mu muchima namba bupopweshi bonse byo byo buji byonkabye.

Naishile Kulabamo ne Kuyuka Bukine

Mu mwaka wa 1964 nsongwalume wa jizhina ja Eugenio waishile pa nzubo petu. Wajinga Kamonyi wa kwa Yehoba, bupopweshi bo nabujile kumvwapo kala ne. Bino nakebeshe bingi kwamba pa mambo a Baibolo. Nalangulukilenga namba nayuka bingi Binembelo. Nakumbwile kwingijisha Binembelo bicheche byo nafunjile mu lufunjisho lwa mu makalata. Nangwa kya kuba nasakile kuzhikijila mafunjisho amo aba Polotesitanti, mu muchima wami kechi ne aketekejile kya kine ne.

Panyuma ya kwisamba pa kimye kyabaya, naswile kuba’mba Eugenio wayuka kufunjisha Mambo a Lesa. Nakuminye bingi byo atainenga binembelo ne kwamba pa byo byafwainwa kwingila, nangwa kya kuba kechi wafunjile sukulu kunkila ne. Eugenio wamwesheshe kufuma mu Baibolo kuba’mba tubena kwikala mu moba apelako kabiji ne kuba’mba Bufumu bwa Lesa katatakatu bukalete paladisa panopantanda. Bino byambo byanzakwile bingi muchima.—Sala. 37:11, 29; Isa. 9:6, 7; Mat. 6:9, 10.

Naswile kufunda Baibolo. Byonse byo nafunjilenga byajinga bipya, kabiji byamfikile pa muchima. Mashuko akatataka ajinga kulutwe andengejile kwikala bwikalo bwalumbuluka. Nataine byo nakebelenga. Namwene kuba’mba byonse byo naubilenga mu kuwamishako bwikalo bwami byajingatu byatu, kabiji ne byo nebikilengako kukeba nkito kuba’mba mpwishe makatazho kechi kyajinga kintu kyanema ne. Nangwatu kubela ne lufu kechi bikekalako jibiji ne.—Isa. 33:24; 35:5, 6; Lum. 21:4.

Ponkapotu natendekele kubulako balongo bami byo nafunjilenga, nebalondolwejilenga na kizaku kuba’mba Lesa walaya kuleta paladisa panopantanda mukekala bantu bakishinka myaka ne myaka.

Kisemi Kyami Kyafunjile Bukine bwa mu Baibolo

Pa Mulungu mabanga kajibumba kafika ku bantu 12 kapwilanga mu nzubo ya batata babanyike na kwisamba pa milaye ya mu Baibolo. Twaikalanga maawala abiji nangwa asatu pa mulungu pa mulungu na kwisamba pa ino milaye. Eugenio byo amwene kuba’mba jino jibumba jikatampe ja balongo bami jakebelenga kufunda Baibolo, wanengezhezhe kuta muchima ku kisemi kimo kimo.

Najinga na balongo bakwabo ku Durango, ka muzhi kacheche kajinga kwalepele makilomita 120, kwabujile Bakamonyi. Panyuma ya bañondo basatu, natambwile lūsa lwa moba a kubula kwingila pa kuba’mba ngye na kwibalumbulwila lwitabilo lwami lwa katataka. Pa kyokya kimye, bantu bafika ku jikumi twapwilanga mabanga pa juba pa juba, kabiji nesambanga nabo kufikatu ne ku makya. Bonse batelekelenga na lusekelo. Moba ami byo apwile, nebashijile ma Baibolo ne mabuku alumbulula Baibolo. Kufumatu kyokya kimye ne moba a kulutwe, twatwajijile kwisamba.

Bakamonyi byo bafikile ku Durango kwabujile kusapwilapo muntu nangwa umo, bataine bantu bafika ku 18 bapembelejilenga lufunjisho lwa Baibolo. Bakamonyi bajinga ba lusekelo kunengezha kuba’mba kisemi kyonse bekifunjishenga.

Kufikatu ne kyokya kimye, Mercedes kechi waswile kufunda bukine ne, wajinga na moyo wa kuchina bantu kechi kuzhinauka mafunjisho a Baibolo ne. Pa kyokya kimye, mwingilo wa Bakamonyi ba kwa Yehoba bamukainye mu Spain, onkao mambo, walangulukilenga kuba’mba baana betu babiji bakebapanga masukulu kabiji ne atweba bonse kechi baketukebanga ne. Pano bino byo amwene kuba’mba kisemi kyonse kyafunjilenga bukine, ne aye wakebele kufunda.

Mu myaka ibiji, ba mu kisemi kyami bafika ku 40 baikele Bakamonyi kabiji bamwesheshe kwipana kwabo kwi Lesa kupichila mu kubatizwa. Ee, kisemi kyami kyaikele na kikonkwanyi kyonka kyo najingapo nakyo mu bumi. Neumvwine kuba’mba nauba kintu kyakilamo kunema. Betupesheshe na nsabo yavula ya ku mupashi.

Byo Nakotelenga Bwikalo Bwakijilengamo Kuwama

Pa myaka 20 yalondejilepo, natele muchima ku kukomesha baana betu babalume babiji ne kukwasha kipwilo kyetu. Amiwa ne Mercedes byo twavilukijile ku Logroño, mwajingatu Bakamonyi 20 mu yewa muzhi mwaikalanga bantu 100,000. Kechi papichile ne kimye kyabaya ne, natambwijile mashuko avula mu kipwilo.

Kabiji byo nafikizhe myaka ya kusemwa 56, kampanyi ye naingilangako washinkile munkinyi konaingijilanga kwa kubula kuketekela, kabiji naikele kwa kubula nkito. Kimye kyonse nakebeshanga kwikala mu mwingilo wa kimye kyonse, naingijishe kyokya kimye kyo nabulanga kwingila nkito kuba’mba ngikale painiya. Mali akulekelapo mingilo o natambwile ajingatu acheche, kabiji kechi kyapelele kujiilamo ne. Mercedes wakwashishenga kisemi kupichila mu mingilo ya kuwamisha bintu. Twakonsheshe kusunga kisemi kyetu kabiji kechi twabujilwe byakebewenga ne. Ne luno nkiji painiya, kabiji Mercedes wingila bupainiya bwa kukwasha, kabiji watemwa bingi mwingilo wa kusapwila.

Myaka icheche yapitapo, Mercedes kimye kyonse wapananga magazini etu ku mwanamukazhi wa kyanyike wa jizhina ja Merche, awo wafunjilepo Baibolo ku bwanyike. Merche watanganga mabuku etu na lusekelo, kabiji Mercedes wamwene kuba’mba Merche wayukile buneme bwa bukine bwa mu Baibolo. Kyapeleleko, Merche waswile lufunjisho lwa Baibolo kabiji wanungulukile bingi bulongo. Bino mwatawanji wa jizhina ja Vicente, wajinga kitomi, kabiji kechi wabandanga pa nkito ne. Kyafuminemo, kechi wakonshanga kumukebela bikebewa bya ku mubiji ne; bukitomi bwanji bwalengejile masongola abo kwikala mu kizumba.

Mukazhami waambijile Merche kuba’mba Vicente akesambe ne amiwa, kabiji ne kya kine twisambile. Panyuma ya kumwendela pa moba avula, waswile lufunjisho lwa Baibolo. Vicente watendekele kupimpula byubilo, waikelengako moba amo kwa kubula kutoma malwa ne. Kokyakayanga watendekele kwikala mulungu umo nangwa kukilapo kwa kubula kutomapo malwa ne. Kyapeleleko, wikilekele kutoma malwa. Watendekele kumweka bulongo, kabiji kisemi kyanji kyaikele kyakwatankana. Kisemi kyanji kyonse, kubikakotu ne bakazhi banji ne baana, batundaika bingi kipwilo kiji ku Jikuji ja Canary ko bekala.

Kulanguluka pa Bwikalo Bwawama bo Napitamo

Nangwa kya kuba balongo bami bamo bafunjile mafunjisho a mu Baibolo pa myaka yapitapo bafwa, bisemi byetu bikwabo bikikoma, kabiji Lesa witupesha. (Mana. 10:22) Kyawama bingi kumona kuba’mba aba bonse batendekele kufunda Baibolo pa myaka 40 yapitapo pamo na baana babo ne bankana babo, batwajijila kwingijila Yehoba mu bukishinka.

Pano luno nji na balongo bami ba ku mubiji Bakamonyi, kabiji bavula ke bakulumpe mu kipwilo, bankwasho ne bapainiya. Mwanami wa mukulumpe wamulume ne mukazhanji bengila pa ofweshi wa musampi wa Bakamonyi ba kwa Yehoba mu Madrid ku Spain. Byo naikele Kamonyi, twajingatu nobe Bakamonyi 3,000 mu Spain. Pano luno bakila pa 100,000. Natemwa bingi mwingilo wa kimye kyonse, kabiji mbena kusanchila bingi Lesa pa bimye byawama byo ñingila mwingilo wanji. Nangwa kya kuba kechi nafunda kufika palepa ne, ne nkwasho ku kalama wa mwanzo.

Pa myaka icheche yapitapo, natana kuba’mba mu muzhi mo nakomejile mwashalatu masala. Buyanji bwalengela bantu bonse kusha majimi ne mizhi yabo kuya na kukebako bwikalo bwawama. Kya lusekelo ke kya kuba’mba, bantu bavula bavilukile kubikakotu ne amiwa twatana nsabo ya ku mupashi. Twafunjile kuba’mba bumi buji na nkebelo kabiji amba kwingijila Yehoba kuleta lusekelo lukatampe bingi.

[Kipikichala pa peja 32]

Pepi nobe bonse ba mu kisemi kya Mulongo Martínez bafunda bukine