Mambo Ka O Mwafwainwa Kwipaina kwi Yehoba?

“Bufuku bwa lelo kwajikuñimena malaika wa Lesa, aye, amiwa ne wanji.”—BYU. 27:23.

1. Bintu ka byuba boba bakeba kubatizwa, kabiji mepuzho ka o twakonsha kwipuzha?

“NA MAMBO a kitapisho kya kwa Yesu Kilishitu, nanchi mwalapila ku bundengamambo bwenu ne kwipana anwe bene kwi Yehoba kuba kyaswa muchima wanji nyi?” Buno ke bwipuzho bumo pa mepuzho abiji akumbula boba baya ku lubatizhilo o bebepuzha ku mpelo ya jashi ja lubatizhilo. Mambo ka bena Kilishitu o bafwainwa kwipaina abo bene kwi Yehoba? Kwipana kwi Lesa kwitulengela byepi kumwenamo? Mambo ka muntu o akonsha kubula kupopwela Lesa bulongo inge kechi wipana kwi Lesa ne? Pa kuba’mba tukumbule bulongo ano mepuzho, twafwainwa patanshi kuyuka mwatala kwipana.

2. Kwipana kwi Yehoba kulumbulula ka?

² Kwipana kwi Lesa kulumbulula ka? Akimonai mutumwa Paulo byo alumbulwile bulunda bwanji ne Lesa. Bwato mwajinga bantu bavula saka bukyangye kuloba, Paulo wamutelele Yehoba amba: “Lesa, aye, amiwa ne wanji.” (Tangai Byubilo 27:22-24.) Bena Kilishitu bakine bonse ke bantu ba kwa Yehoba. Pakuba byonse bya panopantanda “biji mu bulume bwa kwa aye mubi.” (1 Yoa. 5:19) Bena Kilishitu bekala bantu ba kwa Yehoba umvwe bepana bulongo kwi aye mu lulombelo. Kuno kwipana ke luchipo lo achipa muntu pabunke. Apa bino wabatizwa mu mema.

3. Lubatizhilo lwa kwa Yesu lwamwesheshe ka, kabiji baana banji ba bwanga bakonsha kumulondela byepi?

³ Yesu witushijile mwakulondela byo asajilepo kuba kyaswa muchima wa Lesa. Na mambo a kuba wasemekejilwe mu mukoka wa bena Isalela wipaine, wipanyijile jimo kwi Lesa. Nangwa byonkabyo, pa lubatizhilo lwanji waubile kintu kyakijile kyokya kyakebewenga mu Mizhilo. Mambo a Lesa amwesha byo aambile amba: ‘Talai amiwa naiya ... mu kuba kyaswa muchima wenu anweba Lesa.’ (Hebe. 10:7; Luka 3:21) Onkao mambo, lubatizhilo lwa kwa Yesu lwamwesheshe byo epaine kwi Lesa kuba kyaswa muchima wa Shanji. Baana banji ba bwanga balonda aye byo bepana abo bene kubatizwa. Pano bino, lubatizhilo lwabo lumwesha patoka kuba’mba bepana kwi Lesa mu lulombelo.

Kwipana byo Kwitulengela Kumwenamo

4. Bulunda bwa kwa Davida ne Yonafwanyi bumwesha ka pa mambo a kuswikwa?

⁴ Kwipana kwa bena Kilishitu kwanema bingi. Kechi ke kuswikwatu ne, mwavwangwa ne bikwabo. Pano nanchi kwipana kwitulengela byepi kumwenamo? Twayai tumone kuswikwa na bakwetu bantu byo kwitulengela kumwenamo. Kya kumwenako, twayai twambe pa bulunda. Pa kuba’mba mwiyowe bulunda na bakwenu, mwafwainwa kuswa kusenda mitembo ya kwikala mulunda. Kino kikebewa kuswikwa, ko kuba’mba kuta mulunda nenu muchima. Bulunda bumo bwawamisha bwanembwa mu Baibolo ke bobwa bwa kwa Davida ne Yonafwanyi. Balayañene lulayañano pa mambo a bulunda bwabo. (Tangai 1 Samwela 17:57; 18:1, 3.) Nangwa kya kuba bulunda bwa kuswikwa kwa uno mutundu bantu kechi bebumwesha mwesha ne, bulunda bukosatu umvwe bantu besampa bulunda baswikwa, nangwa kwisendela mitembo.—Mana. 17:17; 18:24.

5. Muzha wakonsheshe byepi kwikala kikupu na nkambo yanji wawama muchima?

⁵ Mizhilo yapaine Lesa ku bena Isalela imwesha bulunda bukwabo bwiyowele bantu kupichila mu lulayañano. Umvwe muzha wakeba kuba’mba akekalengatu kikupu na nkambo yanji wawama muchima, wafwainwe kulayañana nanji kuba amba bakatwajijila kwikala pamo. Mizhilo yaambile amba: ‘Inge awa muzha waamba patoka amba: Namutemwa nkambo yami, ne mukazhami, ne baana bami, kechi nkasuluke mfumemo ne, apa bino nkambo yanji ukamuleta ku mitonyi, kabiji ukamuleta ku kinzhilo nangwa ku jishiki ja kibelo ne kumusaba kutwi kwanji na kyela kya kusabako, kabiji ukamwingijilanga kikupu.’—Lupu. 21:5, 6.

6, 7. (a) Lulayañano lulengela byepi bantu kumwenamo? (b) Kino kimwesha ka pa mambo a bulunda bwetu ne Yehoba?

⁶ Masongola ke bulunda bukebewa lulayañano lwa kine. Luno lulayañano kechi lwa pa kipepalatu ne, bino ke lwa kulayañana na muntu mukwenu. Bantu bekala pamo kwa kubula kwisongola mu jifunde kechi bekala na lusekelo lwa kine pamo ne baana babo ne. Pakuba bamulume ne mukazhi besongola mu jifunde baji na bishinka bya mu Binembelo bibalengela kwibikako kupwisha makatazho mu butemwe o bekala nao.—Mat. 19:5, 6; 1 Ko. 13:7, 8; Hebe. 13:4.

⁷ Mu kimye kya kala, bantu bamwenangamo bingi mu lumvwañano pa kuba busulu ne mingilo. (Mat. 20:1, 2, 8) Ne lelo jino byobyo kiji. Kya kumwenako, tumwenamo mu kunemba lulayañano nangwa’mba lumvwañano, saka tukyangye kutendeka busulu nangwa mingilo pa kampanyi. Onkao mambo, umvwe kya kuba lulayañano lukosesha bulunda, nabiji bobwa bo muji nabo na bakwenu, mu masongola, mu nkito, ko kuba’mba mwakonsha ne kukizhamo kumwenamo mu kwipana kwikala balunda na Yehoba! Pano twayai tumone bantu ba kala byo bamwenejilemo mu kwipana kwi Yehoba Lesa, kabiji kuba bino byo kwavwangilemo byavula, kechi kuswikwatu ne.

Kwipana kwi Lesa byo Kwalengejile Bena Isalela Kumwenamo

8. Kwipana kwa bena Isalela kwi Lesa kwalumbulwilenga ka?

⁸ Mukoka yense wa bena Isalela wipaine kwi Yehoba byo balayañene nanji. Yehoba wibakonkenye kwipi na Mutumba wa Sinai ne kwibambila amba: “Inge kine mukomvwa jiwi jami ne kulama lulayañano lwami, mukekala ke kya bunonshi bwami ami mwine kyapatulwa mu mikoka yonse.” Kepo bantu bonse bamukumbwiletu kya mumo amba: “Byonse byaamba Yehoba tukebyuba.” (Lupu. 19:4-8) Kwipana kwa bena Isalela kechi kwalumbulwilengatu kuswikwa na mingilo ne. Kwalumbulwilenga amba bajinga bantu ba kwa Yehoba, kabiji baikele ke “kya bunonshi” kyanji.

9. Bena Isalela bamwenejilemo byepi mu kwipana kwi Lesa?

⁹ Bena Isalela bamwenejilemo bingi mu kwikala bantu ba kwa Yehoba. Waikele wakishinka ne kwibata muchima byonkatu nsemi wa butemwe byo ata muchima mwananji. Lesa waambijile bena Isalela amba: “Nanchi mwanamukazhi wakonsha kuvulama mwananji ukyamwanyi? aleke kumubila lusa mwananji ye asemanyi? ee kine, aye kampepo wakonsha kumuvulama bino amiwa kechi nkakuvulama obewa ne.” (Isa. 49:15) Yehoba wibatangijilenga na Mizhilo, kwibatundaika na bangauzhi ne kwibazhikijila na bamalaika. Nyimbi wa masalamo wanembele amba: “Umwesha byambo byanji kwi Yakoba, Ne malamuna anji ne mafunde anji kwi Isalela. Kechi wamubila mukoka mukwabo byonkabyo ne.” (Sala. 147:19, 20; Tangai Salamo 34:7, 19; 48:14.) Byonkatu Yehoba byo atele muchima mukoka wanji wa kala, ne lelo jino byo byo ata muchima boba bepana kwi aye.

Ene Mambo o Twafwainwa Kwipaina kwi Lesa

10, 11. Nanchi tusemenwa mu kisemi kya Lesa kya bilengwa byonse nyi? Londololai.

¹⁰ Byo balanguluka pa kwipana kwa bwina Kilishitu ne kubatizwa, bamo bakonsha kwipuzha amba, ‘Mambo ka a kubujilatu kupopwelanga Lesa kwa kubula kwipana kwi aye?’ Twiya kumvwisha kino kishinka bulongo umvwe twapesapesa bulongo bulunda bwetu byo buji ne Lesa. Vulukai kuba’mba, na mambo a bundengamambo bwa kwa Adama, atweba bonse kechi tusemenwa mu kisemi kya Lesa ne. (Loma 3:23; 5:12) Kwipana kwi Lesa kwanema bingi pa kuba amba twikale mu kisemi kya bilengwa byanji byonse. Twayai tumone ene mambo o kyaikela bino.

¹¹ Kafwako shetu wa bumuntu wakonsha kupana bumi bwa myaka kwesakana na nkebelo ya Lesa ne. (1 Timo. 6:19) Kechi twasemenwe kwikala baana ba Lesa ne, mambo bantu batanshi byo balengele mambo, baabene ne Shabo, Mulenga wabo wa butemwe. (Esakanyaiko Mpitulukilo ya mu mizhilo 32:5.) Kufumatu kyokya kimye, bantu ba panopantanda, abo bepatwile kwi Lesa kechi bajinga mu kisemi kya Yehoba kya bilengwa byonse ne.

12. (a) Bantu bambulwa kulumbuluka bakonsha kwikala byepi ba mu kisemi kya Lesa? (b) Bintu ka byo twafwainwa kuba saka tukyangye kubatizwa?

¹² Nangwa kikale byonkabyo, pa muntu pa muntu twakonsha kulomba Lesa kuba’mba twikale mu kisemi kyanji kya bakalume baitabilwa.a Twakonsha kuba byepi bino byo tuji bandengamambo? Mutumwa Paulo wanembele amba: “Byo twakijinga balwanyi, twapwaine ne Lesa mu lufu lwa Mwananji.” (Loma 5:10) Pa kubatizwa tulomba Lesa kwitupa jiwi ja mu muchima jawama pa kuba amba twitabilwe kwi aye. (1 Pe. 3:21) Nangwa byonkabyo, kuji bintu bimo byo twafwainwa kuba saka tukyangye kubatizwa. Twafwainwa kuyuka Lesa, kufunda bya kumuketekela, kulapila ne kupimpula byubilo byetu. (Yoa. 17:3; Byu. 3:19; Hebe. 11:6) Kabiji kuji ne kintu kikwabo kyo twafwainwa kuba pa kuba’mba tutambwilwe mu kisemi kya Lesa. Kintu ka kyonkakyo?

13. Mambo ka o kyawamina muntu kuchipa luchipo lwa kwipana kwi Lesa pa kuba amba ekale wa mu kisemi kyanji kya bapopweshi baitabilwa?

¹³ Muntu witolwela kwi Lesa saka akyangye kwikala wa mu kisemi kya bakalume baitabilwa ba Lesa, patanshi wafwainwa kuchipa pa kulayañana ne Yehoba. Pa kuba’mba tumvwishe kino kishinka, fwanyikizhai nsemi wa mulume wanemekwa umwesha lusa ku mwana wakishale kabiji wakeba kuba’mba ekale mwananji. Uno nsemi wayukanyikwa amba ke muntu wawama bingi. Pano bino, uno mwana wamulume saka akyangye kumwalula ke mwananji, uno nsemi wakeba kuba’mba uno mwana achipe. Onkao mambo uno nsemi waamba amba, “Saka nkyangye kukwalula ke mwanami, nkeba umbujile jimo inge kya kuba ukantemwa ne kunnemeka inge naikala shobe.” Mwana wafwainwa kuchipa pa kuba’mba uno nsemi amwalule ke mwananji. Nanchi bino kechi byo byo kyafwainwa kwikala nenyi? Po pamotu, Yehoba utambwilatu mu kisemi kyanji boba bachipa pa kwipana kwi aye. Baibolo waamba’mba: “Mulambule mibiji yenu, ke kitapisho kyumi, kyazhila [kipana], kyaitabilwa kwi Lesa.”—Loma 12:1.

Kwipana ke Kyubilo kya Butemwe ne Lwitabilo

14. Mu ñanyi jishinda kwipana mo kwaikela kyubilo kya butemwe?

¹⁴ Kuchipa luchipo lwa kwipana kwi Lesa ke kayukilo kamwesha amba twamutemwa Yehoba kufuma panshi ya muchima. Luno luchipo lwipashako na lolwa lo bachipa pa masongola. Musongoshi mwina Kilishitu umwesha butemwe bwanji kupichila mu kuchipa kuba’mba ukekala wakishinka ku musongwa wanji nangwa kya kuba pakafwe nzovu. Kuno kechi ke kwilayatu kwa byonkabya ne, wafwainwa kufikizha mulaye wanji. Musongoshi mwina Kilishitu wafwainwa kuyuka kuba’mba kechi wakonsha kwikala na musongwa wanji inge wabula kuchipa kimye kyo babena kwisongola ne. Po pamotu, ne atweba kechi twakonsha kwiyowa mfweto iji mu kwikala mu kisemi kya kwa Yehoba inge twabula kuchipa luchipo lwa kwipana ne. Onkao mambo, nangwa kya kuba twibambulwa kulumbuluka, bino twipana kwi Lesa, mambo tukeba kwikala bantu banji kabiji twakebesha bingi kwikala bakishinka kwi aye nangwa bintu bishupepotu byepi.—Mat. 22:37.

15. Kwipana kwaikala byepi kyubilo kya lwitabilo?

¹⁵ Inge twipana atweba bene kwi Lesa, tumwesha amba tuji na lwitabilo. Mambo ka o kyaikela bino? Mambo lwitabilo lwetu mwi Yehoba lwitulengela kusumininwa amba kufwenya kwipi ne Lesa kyo kintu kyawama kyo twafwainwa kuba. (Sala. 73:28) Twayuka amba kechi kimye kyonse kyo tukakonshanga kwenda na Lesa byo tubena kwikala mukachi ka “kisemi kyatama ne kyaluwankana” ne, pano bino twaketekela bitulaya Lesa kuba’mba uketukwashanga byo twibikako kwenda nanji. (Fili. 2:15; 4:13) Twayuka kuba’mba twibambulwa kulumbuluka, bino twaketekela’mba Yehoba uketubilanga lusa nangwatu twalenga bilubo. (Tangai Salamo 103:13, 14; Loma 7:21-25.) Twaketekela kuba’mba Yehoba uketufweta byo tukebesha kutwajijila kwikala bakishinka kwi aye.—Yoba 27:5.

Kwipana kwi Lesa Kuleta Lusekelo

16, 17. Mambo ka kwipana kwi Yehoba kyo kuletela lusekelo?

¹⁶ Mu kwipana kwi Yehoba mufuma lusekelo mambo mwavwangwa ne kwilambula atweba bene. Yesu waambile bukine byo aambile amba: “Lusekelo lo bamona aba bapana lwakila lo bamona aba batambula.” (Byu. 20:35) Yesu wamwene lusekelo lufuma mu kupana byo aingijile mwingilo wanji panopantanda. Kimye kimo kechi wakokolokanga, kuja ne kwikala bulongo ne, na mambo a kukeba kukwasha bantu kutana jishinda ja ku bumi. (Yoa. 4:34) Yesu wasekelanga mu kusangajika muchima wa Shanji. Yesu waambile’mba: “Mbenakuba bya kumutokesha pa muchima moba onse.”—Yoa. 8:29; Mana. 27:11.

¹⁷ Onkao mambo, Yesu wabujile baana banji ba bwanga pa mambo a jishinda ja ku bumi jawama byo aambile amba: “Umvwe muntu wasaka kundondela, ekane mwine.” (Mat. 16:24) Nanchi twakonsha kwipana ku muntu mukwabo wakonsha kukizhamo kwitulama mu butemwe nyi?

18. Mambo ka kwikela mwayila kwipana kwetu kwi Yehoba kyo kuletela lusekelo lukatampe kukila kwipana ku kintu kiji kyonse nangwa ku muntu mukwabo?

¹⁸ Kwipana atweba bene kwi Yehoba ne kwikela mwayila kwipana kwetu kupichila mu kuba kyaswa muchima wanji kuleta lusekelo lukatampe kukila kwipana ku kintu kiji kyonse nangwa ku muntu mukwabo. Kya kumwenako, bantu bavula bengijisha bumi bwabo kusaka bya bunonshi bya ku mubiji bibula kwibaletela lusekelo lwa kine. Pano aba bepana bene kwi Yehoba batwajijila kwikala balusekelo. (Mat. 6:24) Munema wa kwikala “ba mu mwingilo umo ne Lesa” wibalengela kwikala balusekelo, mambo kwipana kwabo kechi kwa mwingilotu ne, bino bepana kwi Lesa wa lusanchilo. (1 Ko. 3:9) Kafwako muntu nangwa umo wakonsha kwibasanchila kukila byo ebasanchila Lesa pa mwingilo wabo wa kwipana ne. Kabiji ukebapa bulume bwa ku bwanyike pa kuba’mba bakamwenengamo mu byo akebalamanga myaka ne myaka.—Yoba 33:25; Tangai Bahebelu 6:10.

19. Jishuko ka jiji na boba bepana kwi Yehoba?

¹⁹ Kupana bumi bwenu kwi Yehoba kwimulengela kwikala na bulunda bwakosa ne aye. Baibolo waamba amba: “Fwenyai kwipi ne Lesa, kabiji ne aye ukafwenya kwipi ne anweba.” (Yako. 4:8; Sala. 25:14) Mu mutwe walondelapo tukesamba pa ene mambo o twakonshesha kuketekela kufuukulapo kwikala bantu ba kwa Yehoba.

[Tubyambo twa mushi]

Musakukumbula’mba Ka?

• Kwipana kwi Lesa kulumbulula ka?

• Kwipana kwi Lesa kwitulengela byepi kumwenamo?

• Mambo ka bena Kilishitu o bafwainwa kwipaina kwi Yehoba?

[Kipikichala pa peja 6]

Kwikela mwayila kwipana kwetu kwitulengela kutwajijila kwikala balusekelo