Mweshainga Amba Mwibaana ba Bwanga Bakine ba kwa Kilishitu

“Bichi byonse byawama bipanga bipangwa byawama; kabiji kyabipa kipanga bipangwa byabipa.”—MAT. 7:17.

1, 2. Baana ba bwanga bakine ba kwa Kilishitu bapusana byepi na boba ba bubela, kikatakata mu kino kimye kya ku mpelo?

YESU waambile amba aba bebepekezha kumwingijila bakayukanyikilwa ku bipangwa byabo, ko kuba’mba ku mafunjisho abo ne byubilo byabo, kupusanako na biji baana banji ba bwanga bakine. (Mat. 7:15-17, 20) Kya kine, bantu bongolwa na bintu byo balama mu milanguluko ne mu michima yabo. (Mat. 15:18, 19) Aba bo bafunjisha bya bubela bapanga “bipangwa byabipa,” pakuba aba bo bafunjisha bukine bwa ku mupashi bapanga “bipangwa byawama.”

² Mitundu ibiji ya bipangwa yamweka patoka mu kino kimye kya ku mpelo. (Tangai Danyela 12:3, 10.) Bena Kilishitu ba bubela baji na mweno yatama pe Lesa kabiji javula bamwesha munema wa kunemeka Lesa mu bujimbijimbi, pakuba aba bamona ku mupashi bapopwela Lesa “na Mupashi ne na bukine.” (Yoa. 4:24; 2 Timo. 3:1-5) Bebikako bingi kumwesha byubilo bya Kilishitu. Pano kiji byepi kwi atweba pa muntu pa muntu? Byo musakumonanga biyukilo byalondelapo bitanu bya kuyukilako bwina Kilishitu bwa kine, iipuzhai anweba bene amba: ‘Nanchi byubilo byami ne byo mfunjisha byakwatankana na Mambo a Lesa nyi? Nanchi byubilo byami ne byo mfunjisha bilengela bantu kufunda bukine nyi?’

Ikelainga Mwayila Mambo a Lesa

3. Ki ka kitokesha Yehoba ku muchima, kabiji kino kyavwangamo ka ku bena Kilishitu bakine?

³ Yesu waambile’mba: “Kechi bonse bañambila’mba, Nkambo! Nkambo! Bakatwela mu bufumu bwa mwiulu ne; poso awa uba kyaswa muchima wa Tata wa mwiulu.” (Mat. 7:21) Ee, kwitelatu amba ne mwina Kilishitu kechi ko kutokesha Yehoba ku muchima ne, kana kuba byafwainwa mwina Kilishitu. Ku baana ba bwanga bakine ba kwa Kilishitu, kino kyavwangamo bwikalo bwabo bonse, kubikakotu ne byo bamona mali, nkito ya ku mubiji, bya kisangajimbwe, bisho bya ino ntanda ne bya kusekelela, kabiji ne masongola ne bintutu bikwabo byo boba na bakwabo bantu. Pano bino bena Kilishitu ba bubela bekala na milanguluko ya ino ntanda ne kwenda mu mashinda a ino ntanda ibena kuba bintu bibula kutokesha Lesa ku muchima mu ano moba apelako.—Sala. 92:7.

4, 5. Twakonsha kwingijisha byepi byambo bya kwa Yehoba biji mu Malakai 3:18 mu bwikalo bwetu?

⁴ Ngauzhi Malakai wanembele’mba: “Mukayuka jibiji mo bapusena baoloka ne babi, ne aye umwingijila Lesa, ne yewa ubula kumwingijila.” (Mala. 3:18) Byo mubena kulanguluka pa bino byambo, iipuzhai anweba bene amba: ‘Nanchi nepapika na bantu ba ino ntanda nyi, inyi nepatulako? Abya kimye kyonse nguba bintu byuba bakwetu ba ku mubiji, kikale ku sukulu nangwa ku nkito nyi, inyi nkakachila ku mafunde a mu Baibolo, ne kwambatu na kuchinchika inge kyakebewa?’ (Tangai 1 Petelo 3:16.) Kya kine kuba’mba kechi tukeba kumweka nobe twaoloka ne, bino twafwainwa kupusanako na boba babula kutemwa Yehoba kabiji babula kumwingijila.

⁵ Inge mwamona kuba amba mwafwainwa kupimpulako byubilo byenu, nanchi kechi mwakonsha kulomba pa kino kintu ne kukeba bukwasho kupichila mu lufunjisho lwa Baibolo lwa kimye kyonse, lulombelo ne kutanwa ku kipwilo nenyi? Inge kemwingijishe Mambo a Lesa, kikemulengela kupanga “bipangwa byawama,” kubikakotu ne “bipangwa bya pa bya tunwa byetu bitota jizhina [ja Lesa].”—Hebe. 13:15.

Sapwilainga pa Mambo a Bufumu bwa Lesa

6, 7. Kwesakana na mambo a Bufumu, lupusano ka luji pa bena Kilishitu bakine ne babubela?

⁶ Yesu waambile’mba: “Nafwainwa nsapwile mambo awama a bufumu bwa Lesa ku mizhi ikwabo: mambo kyo kyo natuminwe.” (Luka 4:43) Mambo ka Yesu o alengejile Bufumu bwa Lesa kwikala kishina kyo aambilengapo mu mwingilo wanji? Wayukile amba aye byo aji Mfumu wa mu buno Bufumu, kubikako ne balongo banji ba ku mupashi basangwilwe, bakafumyapo bine bintu bileta malwa ku bantu, ko kuba’mba bundengamambo ne Diabola. (Loma 5:12; Lum. 20:10) Onkao mambo, wakambizhe baana banji ba bwanga kusapwila pa mambo a buno Bufumu kufikatu ne ku mpelo ya buno bwikalo. (Mat. 24:14) Bantu betela amba baana ba bwanga ba kwa Kilishitu kechi bengila uno mwingilo ne, kabiji ne kwingila kechi bakonsha kumwingila ne. Mambo ka? Mambo a bishinka bisatu: Kitanshi, kechi bakonsha kusapwila bintu byo babula kuyuka mo byatala abo bene ne. Kya bubiji, bavula kechi bakonsha kwipelula ne kuchinchika umvwe kebebendeleke ne kwibamanyika na mambo a kusapwila mambo a Bufumu ku bakwabo bakinkalankulo ne. (Mat. 24:9; 1 Pe. 2:23) Kabiji kya busatu, bena Kilishitu babubela kechi baji na mupashi wa Lesa ne.—Yoa. 14:16, 17.

⁷ Pano baana ba bwanga bakine ba kwa Kilishitu bayuka Bufumu bwa Lesa byo buji kabiji ne byo bukoba. Kabiji basambila kukebesha buno Bufumu mu bwikalo bwabo, kwibusapwila mwaya ntanda na bukwasho bwa mupashi wa Yehoba. (Zeka. 4:6) Nanchi ne anweba musapwilako kimye kyonse uno mwingilo nyi? Nanchi mubena kwibikako byo muji bataya mbila ya Bufumu, kampe kupichila mu kwingilako kimye kyabaya mu mwingilo nangwa kuyuka bya kwingila uno mwingilo nyi? Bamo bebikako kuyuka bya kwingila uno mwingilo kupichila mu kwingijisha bulongo Baibolo. Mutumwa Paulo awo wajinga na muteeto wa kwipuzhañana mu Binembelo wanembele amba: “Mambo a Lesa o omi, ne kwingila engila.”—Hebe. 4:12; Byu. 17:2, 3.

8, 9. (a) Bya kumwenako ka bimwesha buneme bwa kwingijisha Baibolo mu mwingilo wetu? (b) Twakonsha kwikala byepi basendwe mu kwingijisha Mambo a Lesa?

⁸ Mulongo umo kimye kyo asapwijilenga ku nzubo ku nzubo, watangile Danyela 2:44 ku mwanamulume umo Katolika ne kumulumbulwila Bufumu bwa Lesa byo bukaleta mutende ne luzhikijilo. Uno mwanamulume wakumbwile amba: “Nasanta kya kine kine byo mwazhikula Baibolo ne kummwesha byaamba kinembelo kukila kumubulatu.” Mulongo umo byo atangile kinembelo ku mwanamukazhi umo Mungiliki wa mu bupopweshi bwa Orthodox, uno mwanamukazhi wamwipwizhe mepuzho awama bingi. Kabiji uno mulongo pamo ne mukazhanji bakumbwile kwingijisha Baibolo. Kepo uno mwanamukazhi aambile’mba: “Nanchi mwayuka kyakulengela amba nesambenga ne anweba nyi? Mwakwiya kwi amiwa na Baibolo, kabiji mwakutanganga monka.”

⁹ Mabuku etu nao anema bingi kabiji akebewa kwiasha mu bujimi. Pano bino Baibolo ye twingijisha kyabaya. Onkao mambo, umvwe kechi ye muteeto wenu wa kwingijisha Baibolo kimye kyonse mu mwingilo ne, nanchi kechi mwakonsha kwibikila kikonkwanyi kya kumwingijishanga nenyi? Kampe mwakonsha kusalapo binembelo bimo byalondolola Bufumu bwa Lesa byo buji kabiji ne byo bukapwisha makatazho amo akatazha bantu mu kimasamasa kyenu. Apa bino mwinengezha kutanga bino binembelo pa kusapwila ku nzubo ku nzubo.

Shimunainga Jizhina ja Lesa na Lusekelo

10, 11. Pa mambo a kwingijisha jizhina ja Lesa, lupusano ka luji pe Yesu ne bantu bavula betela amba bamulondela?

¹⁰ “Anweba mwi batumonyi bami, kabiji amiwa ne Lesa byo byaamba Yehoba.” (Isa. 43:12) Kamonyi wa kwa Yehoba wa kine, aye Yesu Kilishitu wamwene kuba’mba ke jishuko bingi kushimuna jizhina ja Lesa ne kwijiyukanyikisha. (Tangai Kulupuka 3:15; Yoano 17:6; Bahebelu 2:12.) Na mambo a kuba Yesu watayile mbila pa mambo a jizhina ja Shanji, watelelwe amba ‘Kamonyi Wakishinka.’—Lum. 1:5; Mat. 6:9.

¹¹ Kupusanako ne aye, bavula betela amba bemenako Lesa ne Mwananji bamwesha muchima watama pa mambo a jizhina ja Lesa, ne kwijifumyatu mu ma Baibolo abo. Mu kumwesha uno yenka muchima, bantangi ba mu Katolika bebakambizhe amba, “jizhina jiji na bisopelo bina ja kuba’mba YHWH kechi jafwainwa kwijingijisha nangwa kwijitela” kimye kya kupopwela ne.a Ino ndangulukilo yatama bingi!

12. Bakalume ba Yehoba bayukanyikilwe byepi kuba’mba baji ku lubaji lwa Yehoba mu mwaka wa 1931?

¹² Pano bena Kilishitu bakine batemwa bingi kwingijisha jizhina ja Lesa mu kulondela Kilishitu ne “jibumba jikatampe ja batumonyi” jajingako saka akyangye kwiya. (Hebe. 12:1) Mu mwaka wa 1931, bakalume ba Lesa bayukanyikilwe bingi kuba’mba baji ku lubaji lwa Yehoba kupichila mu kutelwa pa jizhina ja kuba’mba Bakamonyi ba kwa Yehoba. (Tangai Isaya 43:10-12.) Mu jino jishinda jawama, baana ba bwanga bakine ba kwa Kilishitu batendekele ‘kutelwa na jizhina [ja Lesa].’—Byu. 15:14, 17.

13. Twakonsha kwikela byepi mwayila jizhina jetu jitupa Lesa?

¹³ Nga atweba pa muntu pa muntu twakonsha kumona byepi amba tubena kubila bintu monka mwayila bantu batelwa na jizhina ja Lesa? Twafwainwa kushimuna bukine pe Lesa mu bukishinka. Paulo wanembele amba: “Bonse baketa pa jizhina ja Nkambo [Yehoba] bakapuluka.” “Lelo bakamwita byepi ye babula kwitabila? kabiji bakamwitabila byepi ye babula kumvwa? kabiji bakomvwa byepi kwa kubula musapwishi? Kabiji bakasapwila byepi kwa kubula kwibatuma?” (Loma 10:13-15) Kabiji twafwainwa kuyuka mwakwambila pa kuba’mba tusolole bubela bwa mu bupopweshi bo babepela Mulenga wetu, nabiji lufunjisho lwa mujilo wa helo, lumwesha Lesa wa butemwe amba uji na byubilo byatama bya kwa Diabola.—Yele. 7:31; 1 Yoa. 4:8; esakanyaiko Mako 9:17-27.

14. Pa kuyuka jizhina ja Lesa ja kyanji kyanji, bamo bobapo byepi?

¹⁴ Nanchi ne anweba mwatemwa pa kutelwa na jizhina ja Shenu wa mwiulu nyi? Nanchi mukwasha bantu kuyuka jino jizhina jazhila nyi? Mwanamukazhi umo mu Paris, ku France, waumvwine amba Bakamonyi ba kwa Yehoba bayuka jizhina ja Lesa, onkao mambo, waipwizhe Kamonyi umo ye asambakene kuba’mba amubule panembwa jino jizhina mu Baibolo. Byo atangile Salamo 83:18, kyamufikile bingi pa muchima. Watendekele kufunda Baibolo kabiji luno ke nyenga wakishinka ubena kwingijila mu kyalo kingi. Kimye mwanamukazhi umo Katolika wikala mu Australia kyo amwene jizhina ja Lesa kimye kitanshi saka janembwa mu Baibolo, wajijile mipolo ya lusekelo. Pano waingila myaka yavula bingi bupainiya bwa kimye kyonse. Katatakatu papo, Bakamonyi ba mu Jamaica byo bamwesheshe mwanamukazhi umo jizhina ja Lesa mu Baibolo wanji, ne aye wajijile mipolo ya lusekelo. Onkao mambo, ne anweba ikalai balusekelo kushimuna jizhina ja Lesa, kabiji byonka byajinga Yesu, nenuwa yukanyikishainga jino jizhina janema ku bantu bonse.

“Inge Mutemwe ... bya Panopantanda Ne”

15, 16. Bena Kilishitu bakine bamona byepi ino ntanda, kabiji mepuzho ka o twakonsha kwiipuzha atweba bene?

¹⁵ “Inge mutemwe panopantanda nangwa bya panopantanda ne. Umvwe muntu watemwa panopantanda, butemwe bwa kutemwa Tata kechi buji mwi aye ne.” (1 Yoa. 2:15) Ino ntanda ne mupashi ujipo bimena kuntundwa Yehoba ne mupashi wanji wazhila. Onkao mambo, baana ba bwanga ba kwa Kilishitu kechi bachinuzhukatu kya byonkabya kwikala lubaji lwa ino ntanda ne. Bakana kufuma panshi ya michima yabo, mambo bayuka byanembele mwana wa bwanga Yakoba amba: “Bulunda na bya panopantanda bo bulwanyi ne Lesa.”—Yako. 4:4.

¹⁶ Kyakonsha kushupa bingi kumvwina byambo byaambile Yakoba mu ino ntanda muji meseko avula bingi. (2 Timo. 4:10) Onkao mambo Yesu walombejileko baana banji ba bwanga amba: “Kechi nalomba namba mwibafumye panopantanda ne, poso namba mwibalame kwi yewa mubi. Abo kechi bo ba panopantanda ne, byonka byo nji amiwa kechi ne wa panopantanda ne.” (Yoa. 17:15, 16) Iipuzhai anweba bene amba: ‘Nanchi nebikako kubula kwikala lubaji lwa ino ntanda nyi? Nanchi bakwetu bayuka byo naitabilamo pa mambo a bya kusekelela ne bisho bimo byabula mu binembelo ne byobya byabula kufuma ku bantu babula kupopwela Lesa, pano bino bimwesha mupashi wa panopantanda nyi?’—2 Ko. 6:17; 1 Pe. 4:3, 4.

17. Ki ka kyakonsha kulengela bantu baji na michima ya kukeba kufunda bukine kwikala ku lubaji lwa Yehoba?

¹⁷ Ibyo kuba’mba bintu byo twaitabilamo mu Baibolo byakonsha kulengela bantu ba mu ino ntanda kwitushikwa, pano bino byakonsha kuzakula bantu baji na michima ya kukeba kufunda bukine. Kya kine, umvwe bano bantu bamona amba lwitabilo lwetu lwakosa na mambo a Binembelo kabiji ne kuba amba lwavwangamo bwikalo bwetu bonse, ne abo bakonsha kwamba ku bashingwa amba: “Tuyenga nenu, mambo twaumvwa’mba Lesa muji nanji.”—Zeka. 8:23.

Mweshainga Butemwe bwa Kine bwa Bena Kilishitu

18. Bi ka byavwangwa mu kumwesha butemwe pe Yehoba ne ku bakwetu bakinkalankulo?

¹⁸ Yesu waambile amba: ‘Ukamutemwa Nkambo Lesa wobe na muchima wobe yense, ne na mweo wobe yense, ne na maana obe onse’ kabiji “ukatemwa mukwenu pamo byonka byo witemwa obe mwine.” (Mat. 22:37, 39) Abuno butemwe (butelwa mu Kingiliki amba a·gaʹpe) ke butemwe bwa kine bwavwangamo mingilo, mafunde ne byubilo byawama, bino javula bwavwangamo ne muchima. Butemwe buba byawama. (1 Pe. 1:22) Bwapusana na kichima, mambo abo bumwekela mu byambo bya kine ne mu byubilo byawama.—Tangai 1 Kolinda 13:4-7.

19, 20. Shimikizhai bya kumwenako bimwesha kuba’mba butemwe bwa bena Kilishitu buji na bulume.

¹⁹ Butemwe byo bwaikala lubaji lwa kipangwa kya mupashi wazhila wa Lesa, bulengela bena Kilishitu bakine kuba bintu byakonsha kukankalwa kuba bakwabo, nabiji kubula misalululo ya mitundu, bisho ne bumulwila ntanda. (Tangai Yoano 13:34, 35; Ngalatiya 5:22.) Aba ba bumukooko batundaikwa bingi umvwe bamona buno butemwe. Kya kumwenako, mwanamulume umo Muyudea mu Isalela byo atainwe ku kupwila kwa bena Kilishitu kimyetu kitanshi, wakuminye bingi pa kumona Bayudea ne balongo ba ku Alabya saka bapopwela Yehoba pamo. Kino kyalengejile ne aye kutanwanga ku kupwila kimye kyonse kabiji waswile kumufunjishanga Baibolo. Nanchi mumwesha buno butemwe bwa kufuma panshi ya muchima ku balongo benu nyi? Nanchi mwibikako kutambwila bakatataka beya ku Nzubo ya Bufumu, kechi na mambo a kyalo, kikoba ne bintu bya ku mubiji byo baji nabyo nyi?

²⁰ Byo tuji bena Kilishitu bakine, twibikako kumwesha butemwe ku bonse. Mu El Salvador, musapwishi umo wakyanyike wafunjishenga Baibolo mwanamukazhi Katolika wa myaka ya kusemwa 87, awo watwezhezhemo ne mutwe mu mafunjisho a bya ku chechi yanji. Juba jimo uno mwanamukazhi wakolelwe bingi kya kuba bamubika ne mu kipatela. Byo bamufumishe mu mwanya, Bakamonyi bamutumijile foni ne kumunengezhezha kajo. Baubilenga bino pa ñondo yense. Kafwako nangwa umo wa mu chechi ya uno mwanamukazhi waishile na kumufwakesha ne. Ki ka kyafuminemo? Wasankijilepo bitulubi byo ajinga nabyo, kuleka kuya ku chechi yo ayangako, kabiji watendekele kufunda Baibolo jibiji. Ee kine, butemwe bwa bena Kilishitu buji bingi na bulume! Butemwe bwakonsha kufika bantu pa muchima kukilatu ne byambo bya kwibasapwila.

21. Twakonsha kuwamisha byepi bwikalo bwetu bwa kulutwe?

²¹ Katatakatu Yesu akambile bonse bebepekezha kwimwingijila amba: “Kechi nemuyukilepo ne: mfumai anweba ba kuba bibi.” (Mat. 7:23) Onkao mambo twayai tupangenga bipangwa bitumbijika Shetu ne Mwananji. Yesu waambile’mba: ‘Aye umvwa bino byambo byami, ne kwibyuba, bakamupashañanya no muntu wa maana, watungile nzubo yanji pa jibwe.’ (Mat. 7:24) Ee kine, inge twamwesha amba twi baana ba bwanga bakine ba kwa Kilishitu, tukatalwa bulongo kwi Lesa kabiji bwikalo bwetu bwa kulutwe bukawama na mambo a kuba twibwala pa kitendekesho kyakosa!

[Tubyambo twa mushi]

Nanchi Mukivuluka Nyi?

• Baana ba bwanga bakine ba kwa Kilishitu bapusanako byepi na boba babubela?

• Tongolaipo “bipangwa” bimo biyukanyikisha bena Kilishitu bakine.

• Pa mambo a kukeba kumwesha bipangwa bya bena Kilishitu, mwakonsha kwibikila ñanyi bikonkwanyi?

[Kipikichala pa peja 13]

Nanchi muji na muteeto wa kwingijisha Baibolo mu mwingilo kimye kyonse nyi?

[Kipikichala pa peja 15]

Nanchi bakwenu bayuka po mwaimena pa mambo a bisho byabula mu binembelo nyi?