Mukivuluka Nyi?

Nanchi mwamwenamo mu kutanga Byamba bya Usopa byakatataka nyi? Monai inge mwakonsha kukumbula ano mepuzho:

• Mambo ka kukizhamo kutoma maalwa kyo kwatamina nangwa kya kuba muntu kechi wakonsha kupendwa ne?

Baibolo witujimunako pa mambo a bizumba bya ku mupashi biji mu kukizhamo kutoma malwa. (Mana 23:20; Isa. 5:11, 12) Yesu waambile pa kutomesha malwa kuba’mba kwakonsha kulengela muntu kubula kuyuka bimye byakatazha byo tubena kwikalamo. (Luka 21:34, 35)—7/1, jipa 6.

• Nanchi Byambo bya Mana 6:30 byaswisha kwiba nyi?

Ine. Byepelo bikwabo mo byalondankena bimwesha’mba Lesa umona’mba bonse beba bafwainwa kukambulwa. Nangwa kya kuba muntu waiba na mambo a nzala kechi bamukabisha byonka byo bakabisha muntu waiba na mambo a lwiso nangwa na muchima wa kukeba kuba kyatama mwinakyo ne, bino naye wafwainwa ‘kulubula’ nangwa kufuta. Aba bakeba kwitabilwa kwi Lesa kechi bafwainwa kwiba nangwa kyaikalatu byepi ne. (Mana 6:31)—7/1, jipa 13.

• Nga kuyuka amba Yehoba “utala mu muchima” kwitukwasha byepi? (1 Sam. 16:7)

Kuyuka amba muchima nangwa’mba muntu wa mukachi, mufuma byubilo ne ndangulukilo yanji byo byanema kwi Yehoba, kwafwainwa kwitukwasha kukeba kwikala na byubilo byawama ne kutalwa bulongo ku meso a Lesa.—7/1, jipa 17.

• Nga inetu wakishinka Muyudea waingijishanga byepi kimye kyo aikalanga pamo na baana banji?

Nsemi wamukazhi wakishinka wakwashanga baana banji kumvwisha mafunde a mu Binembelo pa kuya ne pa kubwela kufuma ku kisankanyi. (Mpitu. 6:6, 7) Kabiji wakonsha ne kwisambanga na baana banji babakazhi pa mafunde aamba pa bya kubula kwikala na kisuse pa kupota bintu. (Mana 31:14, 18)—7/1, jipa 19.

• Mafunde ka amo a mu Baibolo akonsha kukwasha bamulume ne mukazhi kuyuka bya kwikala na bena buko?

Baibolo waamba pa mwanamulume wasongola amba “ukaleka shanji ne inanji ne kulamachila ku mukazhanji, kabiji abo babiji bakekala ke mubiji umo.” (Nte. 2:24) “Mutwe wa mwanamukazhi ye mulume wanji,” ko kuba amba mwatawanji. ( 1 Ko. 11:3)—7/1, jipa 28.

• Nanchi bafwa bakonsha kukwasha bantu bomi nyi?

Baibolo walumbulula bingi bulongo biji bafwa kuba amba kechi bakonsha kukwasha bomi ne, mambo “kafwako kyo bayuka ne.” Ee kine, kafwako kyo bayuka ne, kabiji kechi bakwashañana ne. (Sapwi. 9:5, 6, 10)—7/1, jipa 21.

• Ñanyi lujimuno Baibolo lo apana ku banabalume nangwa banabakazhi bafwilwa pa mambo a kwipatula ku bantu?

Nangwa kya kuba kijitu bulongo kimo kimye kwikala kwa bunke, pano bino Byambo bya Mana 18:1 bitujimunako amba: “Awa wipatula ku bakwabo ukeba kuba bisaka muchima wanji mwine.” Mu kifulo kya kuba bino, banabalume nangwa banabakazhi bafwilwa bakeba bukwasho kufuma ku balongo babo ba ku mubiji ne balunda nabo bebata muchima. Kabiji kipwilo kya bena Kilishitu kikwashañana bingi mu bintu bya uno mutundu. (Isa. 32:1, 2)—7/1, jipa 30.