Monai Jizhina mu Kinkunenke — BUTALA BWA MABUKU BWA PA INTANETI

Monai Jizhina mu Kinkunenke

ST. MORITZ. Nanchi mwakyumvwapo kala mpunzha itelwa na jino jizhina nyi? Kampe mwakiyumvwapo kala, mambo ke mpunzha yayukanyikwa bingi mwaya ntanda yaikela mu Kinkunenke kya Engadine mu Switzerland bantu ko baya na kukokolokela. Pano bino St. Moritz ke mpunzha ikebula bantu iji mukachi ka Mitumba ya sino ku kabeta ka ku bulenge musela bwa kyalo kya Switzerland kwipi na mupaka wa kyalo kya Italy. Mu ino mpunzha mo muji ne paka wawama utelwa amba Swiss National Park muji bichi ne banyama ba mitundu ne mitundu balengela Mulenga wetu Mukatampe, aye Yehoba kutotwa. (Sala. 148:7-10) Kabiji mubiwa ne bisho byaubiwanga kala mu myaka bitota 17.

Mwakonsha kukumya bingi inge mwamona mabulañano o banemba pa mazubo a mu kino kinkunenke. Ne lelo jino mwakonsha kutana mazubo o banembapo jizhina ja Lesa kulutwe ya nzubo, nabiji peulu ya kibelo kya nzubo. Pa myaka bitota byavula byapitapo, kyajinga kisho kya kuba amba muntu wafwainwe kuwamisha bulongo pangye ya nzubo yanji nabiji kunembapo byambo kupichila mu kupenta, kukololola nangwa kupokola mu mabwe o bashimikila. Mu ino mpunzha muji kipikichala kya nzubo ya mu muzhi wa Bever. Byambo byo banembapo byaamba amba: “Mu mwaka wa 1715. Yehoba ye ntendekelo, kabiji Yehoba ye mpelo. Bintu byonse byaikalako mambo a aye, kabiji kafwako kyakonsha kwikalako kwakubula aye ne.” Kya kine, bino byambo byamwesha bimye bibiji jizhina ja Lesa ja kyanji kyanji.

Kabiji nangwatu mu muzhi wa Madulain mwakonsha kutanamo byambo byo banembele kala. Bino byambo ke bya kuba amba: “Salamo 127. Yehoba inge kechi wiishimika nzubo ne, beishimika bengila kyatu. Lucius Rumedius. Mu mwaka wa 1654.”

Mambo ka jizhina ja Lesa o janembelwa patoka mu kino kinkunenke? Kutendekatu mu kimye kya Kupimpulwa kwa bintu, Baibolo bamunembele mu mulaka wa bena Loma, ko kuba amba Kilatini mulaka ye bamba mu Engadine. Uno ye wajinga buku mutanshi kutuntululwa mu uno mulaka. Bintu byo batangile mu Mambo a Lesa byalengejile bantu ba mu yoya mpunzha kunemba mazhina abo ne byambo bya mu Baibolo muji jizhina ja Lesa pa mazubo abo.

Kya kine kufika ne lelo jino, bino byambo bibena kushimuna jizhina ja Yehoba ne kumutota, kufuma kimye kitanshi kyo bebinembele pa mazubo mu myaka ya kala. Bakañenda ne bangikazhi ba mu kino kinkunenke bakonsha kufunda byavula pe Yehoba Lesa, kupichila mu kufwakesha kishimikwa kikwabo panembwa jizhina janji, ko kuba amba Nzubo ya Bufumu ya Bakamonyi ba kwa Yehoba mu Bever.

[Byambo biji pa Kipikichala pa peja 7]