Kulondela Kilishitu, Ntangi Walumbuluka
BAKALAMA ba bantu javula bafichisha bingi bantu bo batangijila ku michima. Pa kuba buntangi bwa kwa Kilishitu bwapusanako bingi. Yesu waambile’mba: “Iyai ko nji, anweba bonse basulwila na mingilo ne kunemenwa, ne amiwa nkemukokolosha. Tambulai kikonkoji kyami ne kufunda kwi amiwa; mambo amiwa ne kimote ne kukoka pa muchima: ne anweba mukamona kukokoloka kwa michima yenu.” (Mat. 11:28, 29) Bukalama bwa kwa Yesu bwawama bingi. Wata muchima balanda ne babena kumanama, kabiji wibeta bonse kwiya mu kikonkoji kyanji kyawama. Pano mu kulondela buntangi bwa Kilishitu mwavwangwa ka?
Mutumwa Petelo wanembele amba: “Kilishitu naye wimumanamijile anweba, ne kwimushila mwa kulondela, mulonde monka mu ngayo yanji.” (1 Pe. 2:21) Kulondela mungayo ya kwa Yesu kwanema byepi kwi atweba? Fwanyikizhai kuba amba muji pa jibumba jibena kukilañanya mu mpunzha mo bazhika tupata kabiji pajitu muntu umo wayuka mwakupita. Nanchi kechi mukamulondelanga nangwa kampe ne kunyantatu monka mo abena kunyanta maulu anji nenyi? Po pamotu, pa kuba amba tukazhikijilwe kulutwe ne atweba twafwainwa kulondela kyakumwenako kya kwa Yesu mu bwikalo bwetu. Kuba bino kwavwangamo kumuteleka ne kumukokela kabiji ne kukwatankena pamo na bamwimenako.
Telekainga ne Kukokela
Byo ajinga pepi na kupwisha kwamba Jashi janji ja pa Mutumba, Yesu waambile’mba: ‘Aye umvwa bino byambo byami, ne kwibyuba, bakamupashañanya ku muntu wa maana, watungile nzubo yanji pa jibwe: ne mvula wanokele, ne mikwe yapomokele konka, ne kipupu kikatampe kyapupilenga ponka pa nzubo; kabiji kechi yakundukile ne: mambo beitungile pa jibwe.’—Mat. 7:24, 25.
Yesu waambilenga pa muntu uteleka ne kukokela byambo byanji kuba’mba wa ‘maana.’ Nanchi tumukokela Kilishitu kufuma panshi ya muchima kumwesha amba twanemeka kyakumwenako kyanji nyi, inyi pa mikambizho ya kwa Yesu tusalapotu yo twamona amba itupelela kulondela? Yesu waambile’mba: “Mbena kuba bya kumutokesha [Lesa] pa muchima moba onse.” (Yoa. 8:29) Twayai twikalenga bwikalo boaikalanga.
Mu myaka kitota kitanshi, batumwa bakokelanga buntangi bwa kwa Kilishitu. Kimye kimo, Petelo waambijile Yesu amba: “Talai, atweba twaleka byonse, ne kwimulondela.” (Mako 10:28) Batumwa banemekele bingi buntangi bwa kwa Yesu kyokyo bashijile bintu byabo byonse ne kumulondela.—Mat. 4:18-22.
Kwatankenai Pamo na Bemenako Kilishitu
Saka akyangye kufwa, Yesu watongwele jishinda jikwabo jo twakonsha kumwesheshamo amba tulondela buntangi bwanji. Waambile’mba: ‘Awa utambwila yense ye natuma, wantambwila ne amiwa.’ (Yoa. 13:20) Yesu watelele bena Kilishitu bashingwa bamwimenako’mba “balongo” banji. (Mat. 25:40) Yesu byo bamusangwile kuya mwiulu, “balongo” banji wibatongwele kwikala “bantomesha ba Kilishitu” bakusashijila bantu kupwana ne Yehoba Lesa. (2 Ko. 5:18-20) Kukokela buntangi bwa Kilishitu kwavwangamo ne kukokela “balongo” banji.
Kyawama bingi kwipesapesa pa byo tuba na lujimuno lwa mu Binembelo lo tutambwila mu mabuku alumbulula Baibolo. Byo tufunda Binembelo ne kutanwa ku kupwila kwa kipwilo bitukwasha kuvuluka byambo bya kwa Kilishitu. (2 Pe. 3:1, 2) Tumwesha lusanchilo kufuma panshi ya muchima pa kano kajo ka ku mupashi ko tutambwila inge ketwikaje kimye kyonse. Pano twafwainwa kuba byepi inge kya kuba lujimuno lumo lwabwelapo javula? Kyakumwenako, Mambo a Lesa ajimunako bena Kilishitu kusongola nangwa kusongolwa “kana monka mwi Nkambo.” (1 Ko. 7:39) Uno mutwe bamwambapo pa myaka yavula bingi mu Kyamba kya Usopa. Balongo ba kwa Kilishitu bamwesha byo betuta muchima ku mupashi kupichila mu kunemba bibaba bya kwitujimunako pa kino ne pa bintutu bikwabo. Kumvwina lujimuno ke jishinda jimo jimwesha kuba amba tubena kulondela Ntangi wetu walumbuluka, aye Yesu Kilishitu.
Kinembelo kya Byambo bya Mana 4:18 kyaamba amba: “Jishinda ja baoloka jauba nobe kyeya kya kumakya, kyenda kisama ne kusamisha, kufika ne pa kushinkimana juba.” Kya kine buntangi bwa kwa Yesu bununguluka, kechi bwaimanatu pamo ne. Jishinda jikwabo ja kukwatankenamo na “balongo” ba kwa Kilishitu ke kwikala na mweno yawama na lupimpu lubiwa pa ndumbulwilo ya bukine bwa mu Binembelo bunembwa na ‘kalume wakishinka kabiji wa maana.’—Mat. 24:45.
Tumwesha ne kuba amba tukokela “balongo” ba kwa Kilishitu kupichila mu kukwatankana na bakalama batongolwa mu bipwilo bya bwina Kilishitu. Mutumwa Paulo waambile’mba: “Kokelai bemutangijila ne kwibanekenena: mambo abo babena kwimukenkentela na mambo a kulama michima yenu.” (Hebe. 13:17) Kyakumwenako, mukulumpe mu kipwilo wakonsha kwitutundaika pa buneme bwa kwikala na Kupopwela kwa Kisemi kimye kyonse nangwa kwitubulakotu mashinda a kwingijilamo mbaji imo ya mwingilo wetu wa mu bujimi. Kalama wenda wakonsha kwitupa lujimuno lwa mu Binembelo lwamba pa mbaji imo ya bwikalo bwa bwina Kilishitu. Kumvwina luno lujimuno kumwesha amba tubena kulondela Yesu Ntangi wetu.
Bantu ba mu ntanda babena kukeba buntangi bwawama. Byo kyawamapo kulondela buntangi bwa Kilishitu uji na butemwe! Onkao mambo, twayai tukokelenga Ntangi wetu ne kukwatankena pamo na bo abena kwingijisha lelo jino.
[Bipikichala pa peja 27]
Nanchi mumvwina lujimuno lwa mu Binembelo lwakubula kwikasa ku kikonkoji kimo na babula kwitabila nyi?