Mukivuluka Nyi?

Nanchi mwamwenamo mu kutanga magazini a Kyamba kya Usopa akatataka nyi? Monai inge mwakonsha kukumbula ano mepuzho:

• Ñanyi bishinka bisatu byakonsha kwitukwasha kuchinuzhuka miteeto yakonsha kwitulengela kubula kwikala bakishinka?

Bino bishinka ke: (1) Kwikala na moyo wa kwakamwa Yehoba. (1 Pe. 3:12) (2) Kwikala na jiwi ja mu muchima jafundwa na Baibolo. (3) Kutondwa na bintu byo tuji nabyo.—4/15, mapa 6-7.

• Twayuka byepi kuba’mba kuta muchima pa kwingijila Lesa kechi kilumbulula’mba tubulenga kwikalako na kimye kya kusangalala ne kya kwisamba na bantu ne?

Twakonsha kufunjilako ku byaikalanga Yesu. Wajanga ne kusekela pamo na bakwabo. Twayuka kuba’mba kechi wamwekanga kupayankana kimye kyonse ne. Mambo bantu baiyanga koaji. Nangwatu baana ba bacheche bamukasulukilanga.—4/15, jipa 10.

• Nga kya ‘kumukuula’ kyatongolwa pa Yoba 33:24 kilumbulula ka, kabiji Yoba kyamukuujile byepi?

Kyambo kya ‘kumukuula’ kyo baingijisha pano kilumbulula “kuvweta.” (Yoba 33:24) Kitapisho kya kumukuula Yoba kyafwainwe kwikala nyama wa kulambula, wa kuvweta nangwa’mba kufuta bundengamambo bwa kwa Yoba, ao Lesa ye afwainwe kuswa. Yehoba waswile kitapisho kya kwa Yoba, ne kuvweta pa bundengamambo bwanji, kabiji Lesa wamubukile ne kumupesha. (Yoba 1:5)—7/1, jipa 11.

• Mu Loma kitango 11, ñanyi kintu kimenwako na kichi kya olivi?

Kichi kya olivi kimenako ba mu lukunwa wa kwa Abalahama, bena Isalela ba ku mupashi. Yehoba ye muzhazhi wa kino kichi kabiji Yesu wimenako kichi kine. Bayudea bakala byo bakaine Yesu, Bangetila baitabijile baikele na jishuko ja kwibapingakenya pa misampi kufikizha kibelengelo kyonse kya ba mu lukunwa wa kwa Abalahama.—5/15, mapa 22-25.

• Twayuka byepi kuba’mba Ngehena kechi mpunzha ya mujilo mo bamanyikila bantu ne?

Mulanguluko wa kusoka bantu batuntulu mu mujilo ke kya bunya kwi Yehoba. (Yele. 7:31) Kabiji mulanguluko wa kumanyika bafu wapusenamo na kyubilo kya Lesa kya butemwe, kubikapotu ne bifunjisha Baibolo kuba’mba bafu “kafwako kyo bayuka ne.” (Sapwi. 9:5, 10)—7/1, jipa 15.

• Yehoba ukwasha byepi “balajika michima” ne “ba mipashi yalapila”? (Sala 34:18)

Byonka nsemi watemwa mwananji byo a mulama ne kumutekenesha inge waikala na lukatazho, ne Yehoba naye uji pepi na bapopweshi banji bamujijila’mba ebakwashe. Ukebesha kwibatekenesha ne kwibakwasha baji na michima yalajika ne mipashi yalapila. Wakonsha kwibapa maana ne bulume bukebewa pa kuba’mba bachinchike meseko onse o bakonsha kupitamo. (2 Ko. 4:7; Yako. 1:5)—7/1, jipa 23.

• Nanchi baana ba kwa Yesu bakalumbuluka kulutwe nabo balengeleko lubaji lwa bukuzhi nyi?

Ine. Nangwa kya kuba Yesu byoajinga muntu walumbuluka wakonsheshe kwikala kikota kya bantu balumbuluka, bino bano baana kechi bo bafwainwe kwikala lubaji lwa bukuzhi ne. Bumi bwalumbuluka bwa kwa Yesu bwaesakene na bwa kwa Adama. (1 Timo. 2:6)—6/15, jipa 13.

• Bena Kilishitu bamwesha byepi amba bachinuzhuka bafunjishi babubela batongolwa mu Byubilo 20:29, 30?

Kechi batambwila mu mazubo abo nangwa kwibemuna bafunjishi babubela ne. (Loma 16:17; 2 Yoa. 9-11) Bena Kilishitu kechi batanga mabuku a bantu basatuka mu lwitabilo ne kwibatamba pa malangalanga nangwa kutanga mafunjisho abo pa intaneti ne.—7/15, mapa 15-16.

• Kwesakana na byambo biji mu Luka 10:40-42, ñanyi kintu kine kyanema kilengela bena Kilishitu kupwanañana na bakwabo?

Tupwanañana na bakwetu ba mu lwitabilo kechi na mambotu a kwibapa nangwa kwitupa kajo kawama ne, bino tukeba kwikwasha atweba bene na bene ne kwipa bya bupe bya ku mupashi. (Loma 1:11, 12) Pa ino misambo ya kwikosesha ku mupashi pakebewatu kajo nangwa kacheche.—7/1, mapa 29, 30.