Twayai Tusekelenga Pamo!
MU ANO moba, kwikala na lusekelo kwakatazha bingi. Bavula bakankalwa kwisamba misambo itundaikañana na bakwabo. Bwikalo bwa ano moba, kikatakata mu ngyangi, bulengela bantu kwitemwatu abo bene ne kwitolwela.
Shayuka Wafunda Bilanguluka Bantu aye Alberto Oliverio waambile amba: “Bantu bavula bomvwa bingi mukose kabiji mapunzha muji bishimikwa byavula alengela bantu kwitatu muchima abo bene. Javula kino kitulengela kulengulula bakwetu mo twingijila, bakinkalankulo nangwa boba bengijila pa bisankanyi.” Kuba bino kuleta bijikila.
Nangwa byonkabyo, jishinda jubilamo bintu bakwetu bena Kilishitu japusanako. Mutumwa Paulo waambile’mba: “Saka musekela kimye kyonse.” (1 Tesa. 5:16) Tuji na byavula bya kwitulengela kwikala na lusekelo ne kusangalela pamo na bakwetu. Tupopwela Mwine Wakila aye Yehoba Lesa, twayuka bukine bwa mu Baibolo, tuji na luketekelo lwa kupuluka ne kwikala na bumi bwa myaka kabiji twakonsha kukwasha bakwetu kuba’mba nabo bakamone bino bintu byawama.—Sala. 106:4, 5; Yele. 15:16; Loma 12:12.
Kusekela pamo na bakwetu kimye kyo babena kusekela ke kintu kiyukanyikisha bena Kilishitu bakine. O ene mambo Paulo o anembejile bena Filipai amba: “Nasekela pamo ne anweba bonse. Ne anweba mwafwainwa kusekela pamo ne amiwa.” (Fili. 2:17, 18) Mu bino byambotu bicheche, Paulo waambile bimye bibiji pa kusekela pamo na bakwetu.
Bena Kilishitu bafwainwa kuchinuzhuka muteeto wa kwitolwela. Kafwako muntu witolwela usekela pamo na bakwabo ba mu lwitabilo ne. Twakonsha kulondela byepi lutundaiko lwa kwa Paulo lwa kutwajijila ‘kusekela mwi Nkambo’ na balongo betu?—Fili. 3:1.
Sekelainga Pamo na Bakwenu ba mu Lwitabilo
Paulo byo anembejile bena Filipai nkalata, kyamweka wajinga mu kaleya ka mu Loma mo bamukashile na mambo a mwingilo wa kusapwila. (Fili.1:7; 4:22) Pano bino kwikala mu kaleya kechi kwamulengejile kubwela panyuma mu mwingilo wanji ne. Pakuba aye wasekejile mu kwingijila Yehoba na bulume bwanji bonse ne “kwichilwa nobe binyu pa kitapisho.” (Fili. 2:17) Byaubile Paulo bimwesha’mba lusekelo kechi lwiya na mambo a kuwama kwa bwikalo ne. Nangwa kya kuba wajinga mu kaleya waambile’mba: “Nkatwajijila kusekela.”—Fili. 1:18.
Paulo watendekeshe kipwilo mu Filipai kabiji watemenwe bingi balongo banji. Mambo wayukile kuba’mba kusekela pamo na bakwabo mu kwingijila Yehoba kwakonsheshe kwibatundaika bingi. Onkao mambo wanembele’mba: “Balongo bami, nakeba namba muyuke amba bintu byammwekejile byalengela mambo awama kukoma, kuba amba kukaswa kwami mu kaleya na mambo a Kilishitu kuyukanyikwe ku bonse Bashilikale ba ku Kipango kya Mfumu ne bantutu bakwabo.” (Fili. 1:12, 13) Kushimikizha balongo byo apichilemo kwamuletelanga lusekelo ne kumulengela kusekela pamo na balongo. Kabiji bena Filipai nabo bafwainwa basekejile nanji. Pano bino kechi bafwainwe kulefulwa na mambo a bintu byapichilengamo Paulo ne. Bafwainwe kulondela kyakumwenako kyanji. (Fili. 1:14; 3:17) Bena Filipai bafwainwe kutwajijila kumulombelako Paulo ne kumukwasha mu byo akebanga.—Fili. 1:19; 4:14-16.
Nanchi ne atweba tumwesha muchima wa lusekelo byonka byajinga Paulo nyi? Nanchi twibikishako kwikala na mweno yawama ya bwikalo bwetu ne mwingilo wa bwina Kilishitu nyi? Pa kupwanañana na balongo betu, twafwainwa kusekela nabo pa bintu bya mu mwingilo wa kusapwila. Kechi twafwainwa kupembelelatu’mba kana pamweka kintu kikatampe bino twashimikizha ne. Kampepo twaji kulengela bantu kuteleka ku mambo a Bufumu na mambo a kutatula bulongo mwisambo. Nangwa kampe twakwingijisha bulongo Binembelo pa kwisamba na mwina nzubo. Kabiji kampepo bantu bafikenejile kwituyuka amba twi Bakamonyi ba kwa Yehoba, kabiji kino kitulengejile kwibasapwila. Kushimikizha bimweka ke jishinda jimo ja kusekela pamo na balongo betu.
Bantu ba Yehoba bavula bepana kwingila mwingilo wa kusapwila. Bapainiya, bakalama benda, ba pa Betele, bamishonale ne bakalume bengijila mu byalo bingi bengilako pakatampe mu mwingilo wa kimye kyonse kabiji batana lusekelo mu uno mwingilo. Nanchi tusangalala ne kusekela pamo nabo nyi? Onkao mambo twayai tumweshenga’mba tusanchila bano “bakwetu bamingilo na mambo a bufumu bwa Lesa.” (Kolo. 4:11) Inge twakonkana pamo pa kupwila kwa kipwilo nangwa ku kubuñana kukatampe kwa bwina Kilishitu, twafwainwa kwibatundaikanga kufuma panshi ya muchima. Twakonsha kulondela ne kubambakana kwabo. Kabiji twakonsha kumonapo kimye kya kuteleka ku byo bapitamo ne lutundaiko lwabo kupichila mu kwibatambwila ku mazubo etu.—Fili. 4:10.
Sekelainga Pamo na Boba Babena Kupita mu Makatazho
Kuchinchika lumanamo ne kushinda meseko kwalengejile Paulo kutwajijila kwingijila Yehoba mu bukishinka. (Kolo. 1:24; Yako. 1:2, 3) Byo ayukile’mba balongo mu Filipai bakapitanga mu meseko nabiji o apichilengamo ne kuba’mba bakatundaikwa na mambo a kuchinchika kwanji kyamulengejile kusangalela nabo pamo. Wanembele’mba: “Anweba kechi mwaitabijiletu mwi Kilishitu ne, bino mwamanamine na mambo a aye. O ene mambo ne anweba o mubena kumanamina byonka byo mwammwene na kumanama, byo mubena kumvwa amba ne luno nkimanama.”—Fili. 1:29, 30.
Ne lelo jino bena Kilishitu bapita mu meseko na mambo a kusapwila. Kimye kimo ne kwibapuma bebapuma. Bakonsha kupita mu luno lweseko na mambo a kwibabepela ku bantu basenduka mu lwitabilo, kwibashikwa ku balongo babo ne kwibendeleka ku bakwabo mo bengijila nangwa mo bafunjila. Yesu witujimwineko kuba’mba kechi twafwainwa kukumya na mambo a ano meseko nangwa kulefulwa ne. Pano bino, bino bintu byafwainwa kwibalengela kusekela. Yesu waambile’mba: “Mukasekele umvwe bantu bemwambila mwenga, kwimumanyika, kabiji ne kwimubepela mu misango yonse ya bubi na mambo a amiwa. Sekelai ne kusangalala, mambo mfweto yenu ya mwiulu yabaya.”—Mat. 5:11, 12.
Kechi twafwainwa kuchinanga nangwa kuzakama inge twaumvwa’mba balongo betu mu byalo bikwabo babena kupita mu lumanamo lwatama ne. Twafwainwa kusekela pa byo bachinchika. Twakonsha kwibalombelako kuba’mba Yehoba atwajijile kukosesha lwitabilo lwabo ne kwibakwasha kuchinchika. (Fili. 1:3, 4) Nangwa kya kuba kechi twakonsha kukwasha bano balongo kwesakana na byo bakeba ne, twakonsha kukwasha boba baji mu kipwilo kyetu babena kupita mu makatazho. Twakonsha kwibobila kifyele ne kwibakwasha mu byo bakeba. Twakonsha kumonapo bimye bya kusangalela pamo nabo ne kwibetako kimye kya Kupopwela kwa Kisemi, kwingila nabo mu mwingilo wa kusapwila ne kukayila nabo pamo.
Tuji na bishinka byavula byakonsha kwitulengela kusekela nabo pamo. Twayai tutwajijile kukana muteeto wa pano pa ntanda wa kwitolwela, pakuba twafwainwa kutwajijila kusekela pamo na balongo betu. Umvwe ketube bino, kechi tukalengelatu ba mu kipwilo kwitemwa ne kukwatankana ne, bino tukakizhamo ne kusekela pa bulongo bwa bwina Kilishitu bo tujimo. (Fili. 2:1, 2) Kya kine, “Sekelainga mwi Nkambo kimye kyonse” mambo Paulo witusashijila’mba: “Nemwambila jibiji namba, Sekelai!”—Fili.4:4.
[Nkotwakajana cifwanikiso icili apeeji 6]
Globe: Courtesy of Replogle Globes