Bantu Batanga Magazini Etu Bepuzha’mba . . .

Nanchi ino ntanda ikonaunwa mu 2012 nyi?

▪ Bantu bavula baiya mu muzhi wa French baketekela amba ntanda katatakatu ikonaunwe. Baitabila amba ntanda ikonaunwa pa 21 December 2012, po pakapwila mpelo ya myaka 5,125 kwesakana na kalenda wa kala wa Maya.”—Sawakya wa pa BBC.

Nangwa kya kuba bantangi ba bupopweshi, aba betela amba basayansi, aba baula bya kulutwe ne bakwabotu ba mu myaka kitota kya bu 21 bamba’mba ntanda katatakatu ikonaunwe, bino ino ntanda ikekala myaka ne myaka. Ee, ntanda kechi ikonaunwa mu 2012 ne. Kishinka ke kya kuba’mba ino Ntanda kechi ikabulatu konaunwa mu 2012 ne, bino ne myaka yonse kechi ikonaunwapo ne.

Baibolo witubula amba: “Bantu bamo bafwa kabiji bakwabo basemwa, pano pa ntanda kasa payayayatu.” (Musapwishi 1:4) Kabiji monai mwatala Isaya 45:18: “Aye Yehova Lesa, . . . yenka wabumbile ntanda ne kwiilenga, ne kwiikajika (kechi walengele ntanda yatutu ne, bino wiipangile kwikalamo bilengwa byanji) waamba’mba: Amiwa ne Yehoba, ka kuji mukwabo ne.”

Nanchi nsemi wa mulume uji na butemwe wakonsha kutaya kimye kyabaya na kulanguluka ne kufika kabwato kakukaisha mwananji wa mulume nangwa kazubo ka kukaisha mwananji wa mukazhi, pano byo amupa papitatu kakimye kacheche wabwela wikonauna nyi? Kuno kwakonsha kwikala ke kukanama! Po pamotu, Lesa naye walengele ntanda kuba’mba bantu bekalengapo. Ku ba mulume ne mukazhi batanshi abo ba Adama ne Evwa, Lesa waambile’mba: “Semainga ne kusemununa, muvule ne kukumbana ponse pa ntanda ne kwiikokesha.” Panyuma ya bino, “Lesa wibimwene byonsetu byo alengele, kabiji byonsetu byaji byawamishatu.” (Ntendekelo 1:27, 28, 31) Lesa kechi walubako nkebelo yanji ya ino ntanda ne; kechi ukaswisha kuba’mba ntanda beyonaune ne. Pa mambo a byonse byo alaya, Yehoba waambishetu kuba’mba: “Kechi bikabwelatu byatu kwi amiwa ne, poso kuba kyonkakya kyo nafukula, ne kulumbulukila mu kyonkakya kintu kyo nebitumijile.”—Isaya 55:11.

Nangwa byonkabyo, kyo kyaswa muchima wa Yehoba “konauna aba babena konauna ntanda.” (Lumwekesho 11:18) Walaya mu Mambo anji amba: “Baoloka bakekala mu ntanda, kabiji ne balumbuluka bakakelwa monka. Bino babi bakebafumyamo mu ntanda, ne ba bongozhi nabo bakebangatamo.”—Byambo bya Mana 2:21, 22.

Kino kikobiwa ñanyi kimye? Kafwako muntu wayuka ne. Yesu waambile’mba: “Pa mambo a joja juba nangwa kimye kafwako wayuka ne, nangwatu bamalaika ba mwiulu nangwatu Mwana, poso bonka Batata.” (Mako 13:32) Bakamonyi ba kwa Yehoba kechi beseka kusopelela kimye Lesa kyo akonauna babi ne. Nangwa kya kuba bamona “kiyukilo” kya mpelo kabiji bayuka amba bantu babena kwikala mu ‘moba apelako’ aambiwapo mu Baibolo, bino kechi bayuka kimye “mpelo” kyo ikafika ne. (Mako 13:4-8, 33; 2 Timoti 3:1) Bayuka amba Shabo wa mwiulu ne Mwananji bo bonkatu bayuka kimye kyo ikafika mpelo.

Pa kino kimye, Bakamonyi ba kwa Yehoba baswikwa na mwingilo wa kusapwila mambo awama a Bufumu bwa Lesa, kafulumende wa mwiulu ukalamanga ne kuwamisha ino Ntanda kwikala ke paladisa wa mutende, ‘baoloka ye bakaswana, ne kwikalamo myaka ne myaka.’—Salamo 37:29.

[Byambo biji pa Kipikichala pa peja 12]

Image Science and Analysis Laboratory, NASA-Johnson Space Center