Baibolo Upimpula Bwikalo Bwa Bantu
ÑANYI kintu kyalengejile nsongwakazhi kubwela mu bupopweshi bo akomejilemo, mo afumine? Tangai mwiumvwine mwine byo aamba.
“Pano luno po po nayuka kintu kyanema kyo nafwainwa kuba mu bwikalo.”—LISA ANDRÉ
MWAKA YE ASEMEKELWE: 1986
KYALO: LUXEMBOURG
MWAPITA BWIKALO BWANJI: MWANA WALUBILE
BWIKALO BWA KALA: Nakomejile mu muzhi mucheche wa Bertrange, wa butooto, muji mutende kabiji wa bunonshi waikela kwipi na muzhi mukatampe wa Luxembourg. Yami mukala pa baana batanu. Bansemi bami Bakamonyi ba kwa Yehoba, kabiji bebikangako bingi kwitufunjisha bonse byubilo bya bwina Kilishitu.
Byo nakomeneko, natendekele kuzhinauka bingi bifunjisha Bakamonyi ba kwa Yehoba. Kimye kitanshi, nasulangako ku byo nazhinaukanga, mu kuya kwa kimye lwitabilo lwami lwailenga na kukoka. Bansemi bami baesekele papelejile bulume bwabo kuntangijila mu jishinda jawama, bino nakaine bukwasho bwabo. Kwakubula abo kuyuka, naikalanga kimye kyabaya na bakwetu banyike babulanga kunemeka mizhilo. Nakebelenga kwikala bwana bwa bene byonka byaikalanga bakwetu. Twaikalanga na bijiilo, kuba bupite, kwingijisha bizhima ne kutoma maalwa. Patanshi natemenwe bingi kwikala na bantu bamwekelenga nobe babena kwiyowa bwikalo.
Pano bino kwambatu kine, kechi najinga na lusekelo lwa kine ne. Bwikalo bwetu na bakwetu bwatamine bingi; kechi twitanga muchima ne. Nangwa byonkabyo, nakatazhiwanga bingi mu milanguluko pa nshiji yakumbana mu ntanda. Mu kuya kwa kimye nalefwilwe bingi.
BAIBOLO BYO APIMPWILE BWIKALO BWAMI: Byo nafikizhe myaka ya kusemwa 17, juba jimo nalefwilwe bingi. Bamama byo bamwene kuba’mba kechi nji na lusekelo ne, bañambijile amba ndangulukepo jikwabo pa kufunda Baibolo. Bantundaikile bingi kupesapesa mafunjisho a mu Baibolo ne kusalapo amiwa mwine inge nakonsha kulondela byo mbena kupesapesa nangwa ne. Abya byambo byanema byo twisambile byamfikile bingi pa muchima ne kupimpula milanguluko yami. Naswile kumfunjisha Baibolo kwi bakolojami ba Caroline ne bamwatawabo ba Akif. Ba Akif kechi bakomejile mu kisemi kya Bakamonyi ba kwa Yehoba ne, bino baikele Bakamonyi kimye kyo bakomene. Na mambo a bwikalo bwa kunyuma bwa ba Akif, kyandengejile kukasuluka kwisamba nabo, mambo kino kyanemene bingi kwi amiwa.
Nayukile’mba bwikalo bwami kechi bwayijilemo kwikala Kamonyi ne, bino patanshi nayukile amba byo naubile na bwikalo bwami kwajinga kufuukulapo kwami. Pano byo nafunjilenga Baibolo, po po nayukile amba byubilo byami byafichishenga Yehoba ku muchima. (Salamo 78:40, 41; Byambo bya Mana 27:11) Kabiji nayukile ne kuba’mba byafichishengatu ne bantu bakwabo ku muchima.
Byo natwajijile kupesapesa Baibolo, nataine kuba’mba kuji bishinka byawama kabiji byanshiine kuba’mba kine Mambo a Lesa. Kyakumwenako, nafunjile bungauzhi bwavula bwa mu Baibolo bwafikizhiwa kala, kwakubula kupusa. Kuyuka bino kwankwashishe bingi kufumyapo luzhinauko lo najinga nalo.
Byo papichile nobe mwaka umo kufuma po natendekejile kufunda Baibolo, nayile na bansemi bami na kufwakesha bakolojami ba balume bepaine kwingijila pa ofweshi wa musampi wa Bakamonyi ba kwa Yehoba mu Germany. Byo namwene lusekelo lwajinga na bakolojami, natundaikilwe bingi. Ne amiwa bwikalo bwa lusekelo bo bo nakebelenga. Kabiji natemenwe bingi pa kumona Bakamonyi bakwabo bepaine kwingijila pa uno musampi. Bapusene bingi na bantu bo nakayanga nabo babujile bukishinka kabiji bakebangatu kwisangajika bene. Palutwe kacheche, nalombele lulombelo lwa kufuma panshi ya muchima kwi Yehoba, ne kumulaya amba nkamwingijilanga mu bwikalo bwami bonse. Byo nafikizhe myaka ya kusemwa 19, namwesheshe kwipana kwami kwi Yehoba kupichila mu kubatizhiwa.
BYO NAMWENAMO: Pano luno po po nayuka kintu kyanema kyo nafwainwa kuba mu bwikalo. Ntana lusekelo mu kufunjisha bantu Baibolo, ne kwibakwasha kufunda pe Yehoba ne pa milaye yanji ya kulutwe. Kisemi kyami nakyo kyamwenamo bingi, mambo kechi bekala na bijikila pe amiwa ne.
Nayuka bilubo byo naubanga kala, pano ngeseka kwibilubako. Ntatu muchima kwi Yehoba kuba’mba ye ulekela mambo ne pa byo anta muchima. Ngitabizha na muchima wami yense byambo bitanwa pa Byambo bya Mana 10:22 byaamba’mba: “Mapesho a Yehoba o alengela muntu kunonka; kabiji kechi unungako kyatama ne.”
[Mabulañano pa peja 10]
“Twaikalanga na bijiilo, kuba bupite, kwingijisha bizhima ne kutoma maalwa”
[Kipikichala pa peja 11]
“Nayuka bilubo byo naubanga kala, pano ngeseka kwibilubako”