“Mwitemwe Anwe Bene na Bene”
“Mbena kwimupa mukambizho mupya, namba mwitemwe anwe bene na bene; byonka byo nemutemwa amiwa, ne anweba mwitemwe anwe bene na bene. Kino kyo kyo bakayukilako bonse amba mwi baana bami ba bwanga, umvwe mwitemwa anwe bene na bene.”—YOANO 13:34, 35.
Mwatala Bino Byambo: Kilishitu wakambizhe baana banji ba bwanga kwitemwa bene na bene byonkatu byo ebatemenwe. Nanchi Yesu wibatemenwe byepi? Yesu watemenwe bantu bonse kimye kyo ajinga pano pa ntanda ne bobatu bashikilwe bisaka bikwabo kuvwangakotu ne banabakazhi. (Yoano 4:7-10) Butemwe bo bwalengelanga Yesu kwingijisha kimye kyanji, bulume ne kwipana kukwasha bantu. (Mako 6:30-34) Kabiji Kilishitu wamwesheshe byo atemwa bantu pakatampe. Waambile’mba: “Amiwa nekafunga wawama; kafunga wawama welela mikooko yanji bumi bwanji.”—Yoano 10:11.
Bena Kilishitu Batanshi byo Bamwesheshe Butemwe: Mu myaka kitota kitanshi, bena Kilishitu beitanga mulwabo amba “mulongo” nangwa “nyenga.” (Filemonyi 1, 2) Bantu ba mu bisaka byonse bebatambwijile mu kipwilo kya bena Kilishitu, mambo baswile kuba’mba “kafwapo lupusano pakachi ka Muyudea ne Mungiliki ne, mambo kujitu Nkambo umo wa bonse.” (Loma 10:11, 12) Mwaka wa Pentekosita 33 C.E byo apwile, baana ba bwanga bajinga mu Yelusalema “bapoteshenga bintu byabo byonse ne kupana mali ku bonse, kwesakana na monka mwakajilwe muntu yense.” Mambo ka o baubijile bino? Baubile bino pa kuba’mba aba babatizhiwe katataka batwajijile kwikala mu Yelusalema ne kutwajijila “kufunda ku batumwa.” (Byubilo 2:41-45) Ñanyi kintu kibalengejile kuba bino bintu byonse? Batumwa byo bafwile myaka 200 saka ikyangye kufika, Tertullian waambile byambo byaambilepo bantu pa bena Kilishitu amba: “Kashika abe bantu betemwa bingi . . . kabiji bepana ne kufwila bakwabo.”
Bañanyi Bamwesha Buno Butemwe Ano Moba? Buku wa The History of the Decline and Fall of the Roman Empire (1837) waambile’mba pa myaka yavula yapitapo, aba betongola’mba bena Kilishitu “bo baikezhe bingi bufinda bakwabo kukila byo baikalanga na bantu babula kwitabila.” Mu sawakya wa katataka wa ku U.S. bataana kuba’mba bantu bavula betela’mba bena Kilishitu baji bingi na misalululo. Bantu baya mu chechi umo inge baya ku kyalo kingi kuji chechi yenka mo bapwila kechi bebatambwila ne kwibakwasha ku bakwabo mo bapwijila inge bataanwa mu makatazho ne.
Mu mwaka wa 2004, mvula wa kinkunkwila byo anokele bimye bina mu bañondo babiji mu Florida, wakumupando wa mu kipamo kya Florida’s Emergency Operations Committee wamwene kuba’mba bintu bya kwingijisha bantu ba ku ino mpunzha bebingijisha bulongo. Uno muntu waambile’mba kafwako jibumba ja bantu jakwatankana mu kuba bintu jaesakana pamo na Bakamonyi ba kwa Yehoba ne. Kabiji wipaine kupa Bakamonyi bintu bya kwingijisha byo bakajilwe. Ku ntendekelo ya mwaka wa 1997, jibumba ja Bakamonyi ba kwa Yehoba basendele muchi, kajo ne bivwalo ne kuya ku kyalo kya Democratic Republic of Congo kuba’mba bakakwashe balongo ne banyenga yabo bakajilwe. Bakamonyi bakwabo ku Europe nabo batumine bintu pataiwe mali afika ku 1 milyonyi mali a kina America.