BAIBOLO UPIMPULA BWIKALO BWA BANTU
“Pano nakasuluka kya kine”
Byashimikizha ba Brian Hewitt
MWAKA WA KUSEMWA: 1981
KYALO: UNITED STATES
MWAPITA BWIKALO BWABO: MWANA WALUBILE
BWIKALO BWA KALA: Nasemenwe mu Moundsville, muzhi uji ku mukulo wa mukola wa Ohio ku buyeke muzhika bwa Virginia. Byo najinga ndondela mubeji pa baana bana, babalume basatu, pa nzubo kechi palenganga mukose ne. Bansemi bakosele bingi ku mingilo, bajinga bakishinka kabiji batemenwe bantu. Kechi twajinga banonshi ne, bino twaikalanga na byonse byo twakebanga. Bansemi byo bajinga Bakamonyi ba kwa Yehoba, bebikangako bingi kwitufunjisha mafunde a mu Baibolo kufumatu ku bwanyike.
Nangwa byonkabyo, byo nakomeneko, natendekele kulengulula byo bamfunjishe. Natendekele kuzhinauka inge kutangijilwa na Mafunde a mu Baibolo kwakonsha kunkwasha mu bwikalo bwami. Nalangulukilenga’mba, pa kuba’mba nkasuluke ne kwikala na lusekelo nafwainwa kubanga byonse byonkeba. Kechi papichile ne kimye kyabaya ne, nalekele kupwila. Kolojami wamulume ne nkasami wamukazhi nabo basatukile. Bansemi betu bebikileko bingi kwitukwasha, pano kechi twibomvwijile ne.
Kechi nayukile kuba’mba kukasuluka ko nakebelenga kukanteka buzha ne. Juba jimo byo nabwelelenga kufuma ku sukulu, mukwetu wampele kashiki kafwanka. Natambwile. Kufumatu jonkaja juba, naswilenga kuba byubilo byatama byavula bingi. Mukuya kwa moba, natendekele kwingijisha bizhima, kutoma maalwa ne byubilo bikwabotu byatama. Pakupitapo myaka yavula, natendekele kwingijisha bizhima byakilamo kushinta, kabiji bizhima byantekele buzha bingi. Byo byantwelele mu mashi kyakukankalwa kwibileka, natendekele kupotesha bizhima pa kuba’mba nekwashishengamo mu bwikalo bwami.
Nangwa kya kuba nalengululanga jiwi jami ja mu muchima, jamvululangamotu kimye kyonse kuba’mba bwikalo bwami kechi bwawama ne. Neumvwanga kuba’mba kyapwa kechi nkapimpula bwikalo bwami ne. Nangwa inge nji ku kijiilo kwavula bantu naumvwanga mukose ne bulanda. Kimye kimo navulukanga byawama bansemi bami, ne kukumya kyandengela kusatuka kufika ponafika.
BAIBOLO BYO APIMPWILE BWIKALO BWAMI: Nangwa kya kuba nelengulwile kuba’mba kechi nakonsha kupimpula bwikalo bwami ne, bino bantu kechi bandengulwile ne. Mu 2000, bansemi bami bangichile kuba’mba nkatanwe ku kushonkena kwa nkambi kwa Bakamonyi ba kwa Yehoba. Nayile kyakifulumuya. Nakuminye bingi pa kutana kuba’mba kolojami ne nkasami wamukazhi nabo baji konka.
Ponka pa kushonkena, navulukile kuba’mba mu kyonka kino kishimikwa mo mwaikejile ne disiko mwaka wapwa. Byo namwene byamfikile bingi pa muchima. Kimye kyo twajinga mu disiko, mu kishimikwa mwaji ndochi kabiji mwakutakenetu bwishi bwa fwanka. Bantu baishile ku disiko bakanamine bingi, kabiji nyimbo yo baimbilenga kechi yawamine ne. Bino pa kushonkena, naikele na bantu balusekelo, bantambwijile bingi bulongo nangwa kya kuba kechi bangyukile ne. Mu kishimikwa mwajinga mwa butooto, kabiji majashi aambilenga pa bwikalo bwawama bwa kulutwe. Byo namwene bukine bwa mu Baibolo byo bukwasha bantu kwikala na byubilo byawama, nelangulwishe kuba’mba mambo ka o nebukanyijile.—Isaya 48:17, 18.
Panyumatu ya kushonkena, nafuukwilepo kutendeka kupwila na bena Kilishitu. Kolojami ne nkasami nabo byo bamwene pa kushonkena bibafikile pa muchima, bafuukwilepo kutendeka kupwila. Bonse basatu twatendekele kufunda Baibolo.
Yakoba 4:8, kyo kyepelo kya mu Baibolo kyamfikile bingi pa muchima, kyaamba’mba: “Fwenyai kwipi ne Lesa, kabiji ne aye ukafwenya kwipi ne anweba.” Nalangulukile kuba’mba umvwe nkeba Lesa kufwenya kwipi ne amiwa, nafwainwa kuwamisha bwikalo bwami. Pa bintu byonse, nafwainwe kuleka kupepa fwanka, kwingijisha bizhima ne bukitomi.—2 Kolinda 7:1.
Nashile balunda nami bakala ne kulenga balunda bakwabo bapopwela Yehoba. Mukulumpe mu kipwilo wamfunjishanga Baibolo wankwashishe bingi. Wantuminanga foni jonse kabiji wapitangapo nakumonapo. Kufikatu ne lelo jino, ye mulunda nami wa kine.
Mu 2001, nepaine kwi Lesa kupichila mu lubatizhilo lwa mu mema, pamo na kolojami wamulume ne nkasami wamukazhi. Bansemi ne nkasami mukala baumvwine bingi bulongo kisemi kyetu byo kyakwatankene jibiji kwingijila Yehoba.
BYO NAMWENAMO: Nalangulukanga kuba’mba mafunde a mu Baibolo akilamo kukosesha bintu, pano luno namona kuba’mba azhikijila. Baibolo wankwashishe kuleka kwingijisha bizhima ne kupotesha, wandengela kwikala muntu wawama.
Ne amiwa pano naikala mu bulongo bwa ntanda yonse bwa bapopweshi ba Yehoba. Bantu betemwa kya kine, kabiji bakwatankana kwingijila Lesa. (Yoano 13:34, 35) Pa bulongo bwa ntanda yonse paishila ne mapesho akwabo, nji na mwinakwami Adrianne ye natemwa bingi ne kunemeka. Tumvwa bingi bulongo kwingijila pamo Mulenga wetu.
Mu kifulo kya kwikala bwikalo bwa kwitobwela, nepana kutwela mu mwingilo wa kimye kyonse, wa kufunjisha bantu kuba’mba nabo bamwenemo mu Mambo a Lesa. Uno mwingilo undetela bingi lusekelo kukila bintu byonse. Mbena kwamba na muchima yense kuba’mba Baibolo wapimpula bwikalo bwami. Pano nakasukuka kya kine.
[Mabulañano pa peja 11]
“Baibolo wankwashishe kuleka kwingijisha bizhima ne kwibipotesha ne kwikala muntu wawama”