Lusanguko lwa kwa Yesu Lulumbulula Bumi!

LUSANGUKO lwa kwa Yesu kechi kintutu kyamwekele kala kyabula nkito kwi atweba lelo jino ne. Mutumwa Paulo waambile pa buneme bwa lusanguko lwa kwa Yesu byo anembele’mba: “Kilishitu wasangwilwe ku bafu, ye nsomo ya boba bafwa. Mambo lufu byo lwaishile kupichila mu muntu umo, ne lusanguko lwa bafwa lwiya kupichila mu muntu umo. Bonse bafwa na mambo a kwa Adama kabiji bonse bakasangulwa na mambo a Kilishitu.”—1 Kolinda 15:20-22.

Yesu wasangwilwe pa Nisanyi 16, mu 33 C.E., juba jonka Bayudea jo batwalanga bya nsomo ya kajo kabo katanshi kwi Yehoba Lesa ku nzubo yanji yazhila ku Yelusalema. Byo atelele Yesu amba ye nsomo, Paulo walumbulwilenga kuba’mba kukekala ne bantu bakwabo bo bakasangula ku bafwa.

Paulo waambile ne byambo bikwabo bilumbulula byafuma mu lusanguko lwa kwa Yesu. Paulo waambile’mba: “Lufu byo lwaishile kupichila mu muntu umo, ne lusanguko lwa bafwa lwiya kupichila mu muntu umo.” Atweba bonse tufwa na mambo a bundengamambo ne bumbulwa kulumbuluka bwaishile kupichila mwi Adama. Nangwa byonkabyo, kupichila mu kupana bumi bwanji bwalumbuluka kwikala bukuzhi, Yesu washinkwijile bantu jishinda ja kufuminamo mu buzha bwa bundengamambo ne lufu kupichila mu lusanguko. Pa kulumbulula bulongo kino kishinka, Paulo wanembele pa Loma 6:23 amba: “Mfweto ya bundengamambo lo lufu, pa kuba bupe Lesa bo apana ke bumi bwa myaka ne myaka kupichila mwi Kilishitu Yesu Nkambo yetu.”

Yesu mwine walumbulwile lufu ne lusanguko lwanji byo bilumbulula kwi atweba. Waambile pe aye mwine amba: “Mwana muntu naye bakamwimika pa kichi byonkabyo, kuba amba yense wamwitabila akekale na bumi bwa myaka. Mambo Lesa byo ebatemwishe ba pano pa ntanda wapaine Mwananji yenkawa umotu, kuba amba bonse bamwitabila kechi bakonaike ne, poso bakekale na bumi bwa myaka.”—Yoano 3:14-16.

Fwanyikizhai kuba’mba mubena kwikala bumi bwa myaka ne myaka kwa kubula misongo, buyanji nangwa kujila! (Lumwekesho 21:3, 4) Luno luketekelo byo luletapo lusekelo! Shayuka umo waambile’mba: “Bilende bitulengela kulanguluka pa byaipipa bumi, pakuba lusanguko lwitulengela kulanguluka byaipipa lufu.” Kya kine, lusanguko lwa kwa Yesu lulumbulula bumi!