MUTWE WA PA NKUPIKO: NANCHI LESA WAKANAMA NYI?
Mambo ka Bantu kyo Bambila Amba Lesa Wakanama?
NANCHI bwipuzho buji pa nkupiko bwimulengela kukumya nyi? Bamo bakumya pa buno bwipuzho, bakwabo nabo baswa kuba’mba Lesa wakanama. Mambo ka?
Bamo bapuluka ku bya malwa biponakotu bine, bepuzha’mba: “Mambo ka Lesa kyo aswishisha bino bintu kubiwa? Nanchi kechi watako muchima nenyi? Nangwa wakanama nyi?”
Bakwabo nabo bepuzha buno bwipuzho kimye kyo batanga Baibolo. Inge batana mashimikila nabiji aamba pe Nowa ne Muyulo bepuzha’mba, ‘Mambo ka Lesa wa butemwe kyo aipayijile bantu bavula? Nanchi wakanama nyi?’
Nanchi ne anweba kimye kimo mwishikisha ano mepuzho nyi? Nanchi kimukatazha kukumbula bantu bamona kuba’mba Lesa wakanama nyi? Pa ano mepuzho abiji, akilangulukai pa bwipuzho bwapusanako bwakonsha kwimukwasha kukumbula.
MAMBO KA O TWASHIKILWA MUNTU WAKANAMA?
Na mambo a kuba’mba tuji na bulume bwa kuyuka byawama ne byatama, twashikwa muntu wakanama. Mu kino, twapusana bingi na banyama. Mulenga wetu witulengele “mu kipasha kyanji.” (Ntendekelo 1:27) Nga kino kilumbulula ka? Witupele bulume bwa kumwesha byubilo ne kulondela mizhilo yaamba pa byubilo byawama, ko kuba’mba kuyuka byawama ne byatama. Langulukai pa kino: Byo kiji kuba’mba Lesa witupeele bulume bwa kuyuka kyatama ne kyawama kabiji kino kitulengela kushikwa bumbanzhi, nanchi kino kechi kimwesha amba Lesa naye wibushikwa ne nyi?
Baibolo byobyo amba, mambo Lesa waamba’mba: “Mashinda ami nao akijisha mashinda enu, ne milanguluko yami nayo yakijisha milanguluko yenu.” (Isaya 55:9) Inge twaamba’mba Lesa wakanama, ko kuba’mba tubena kwamba’mba mashinda etu aoloka kukila mashinda anji. Kyanema kuyuka bishinka saka tukyangye kwitabila mu bino. Kampe twakonsha kwamba’mba, Lesa kechi wakanama ne, pano mambo ka byubilo byanji bimo kyo bimwekela amba wakanama? Pa kuba’mba tumvwishe, twayai tuyuke “kukanama” byo kulumbulula.
Inge twaamba kuba’mba muntu wakanama ko kuba’mba uji na byubilo byatama. Muntu wakanama umvwa bulongo kumona bakwabo babena kuyanda, nangwa ubula kutako muchima ku makatazho abo. Onkao mambo, nsemi wamulume umvwa bulongo kukozha mwananji ku muchima kimye kyo abena kumufunda, ko kuba’mba wakanama. Pano bino, nsemi wa mulume ufunjisha mwananji pa kuba’mba amuzhikijile kechi wakanama ne. Byo kiji kuba’mba kechi tuyuka kilengela bantu kuba bintu bimo ne, ko kuba’mba kechi twakonsha kuyuka bulongo kibalengela kwi byuba ne.
Twayai tumone bintu bibiji bilengela bantu kulanguluka’mba Lesa wakanama, nabiji bya malwa biponakotu bine bimweka mu ntanda ne mashimikila a mu Baibolo a bantu Lesa bo akambwile. Nanchi bino byaambiwapo bimwesha kuba’mba Lesa wakanama nyi?
[Kipikichala pa peja 3]
Mwayilatu kisemwa tumwesha lusa kabiji twashikwa muntu wakanama