Bunchibamambo bwa Lesa—Nanchi Lesa Wakanamine pa Kukambula Bantu Nyi?

PA KUBA’MBA tukumbule buno bwipuzho, twayai twisambe pa byakumwenako bibiji bya mu Baibolo byaamba pa bunchibamambo bwa Lesa bwaamba pa muyulo wajingako mu moba a kwa Nowa ne lonaiko lwa bena Kenana.

MUYULO WA NOWA

BYAMBA BANTU: “Lesa wakanamine pa kuleta muyulo waipaile bantu bonse kufumyakotu kisemi kya kwa Nowa.”

BYAMBA BAIBOLO: Lesa waambile’mba: “Kechi mmwenamo lusekelo nangwa pachechetu mu lufu lwa ndengamambo ne, poso mu kuba’mba ndengamambo aleke jishinda janji, namba amone bumi.” (Ezikyo 33:11) Lesa kechi waumvwine bulongo pa bantu baonaikile pa muyulo wa kwa Nowa ne. Pano mambo ka kyo aubijile bino?

Baibolo ukumbula kuba’mba kimye Lesa kyo aletele buno bunchibamambo pa bantu babi mu kimye kya kala, “ke kyakumwenako kya bintu bikamwekela bantu babula kwakamwa Lesa.” (2 Petelo 2:5, 6) Tufunjilako ka ku kino?

Kitanshi, kimukola bingi ku muchima nangwa kya kuba waonawine bantu, bino kechi usekela mu bantu bakanama balengela buyanji kabiji ukebatotolwesha. Umvwe kimye kyafika, ukapwisha buyanji bonse.

Kya bubiji, bintu byo aubile kala bimwesha amba Lesa ujimwina jimo bantu saka akyangye kuleta lonaiko. Nowa wajinga musapwishi wa bololoke, bino bantu bavula bamulengulwilenga. Baibolo waamba amba: “Abo kechi bateleko muchima ne, kufikatu ne kimye Muyulo kyo aishile ne kwibalobeshatu bonse shata.”—Mateo 24:39.

Nanchi Lesa byo byo oba ne luno nyi? Ee. Kyakumwenako, wabuujijile jimo bena Isalela kuba’mba inge batendeka kuba byubilo byatama byaubangapo mikoka ibazhokolokele, ukaswisha balwanyi kwibalukuka mu ntanda yabo, konauna muzhi mukatampe wa Yelusalema ne kwibatwala mu buzha. Bena Isalela batendekele kuba byubilo byatama kufikatu ne ku kutapisha baana. Nga Yehoba waubilepo byepi? Watumine bangauzhi bimye byavula kuya na kwibajimunako kuba’mba bapimpule byubilo byabo saka kukiji kimye. Kabiji waambile kuba’mba: “Kine Nkambo Yehoba kechi uba kintu kwa kubula kwikisolwela jimo ku bakalume banji bangauzhi ne.”—Amosi 3:7.

ANO MAMBO BYO EMULAMATA: Bunchibamambo bwa Yehoba bo aubile kunyuma bwitulengela kwikala na luketekelo. Twakonsha kuketekela kuba’mba kulutwe Lesa ukaleta bunchibamambo pa bantu babi balengela makatazho. Baibolo wamba’mba: “Mambo boba bibi bakachibiwako ku bumi . . . Pakuba bakimote bakaswana ntanda. Kabiji bakasangalela mu kuvula kwa mutende.” (Salamo 37:9-11) Mwakonsha kumona byepi bunchibamambo bwakonsha kukuula bantu ku buyanji? Mwakonsha kwibumona amba kukanama nyi, inyi lusa?

KWIPAYIWA KWA BENA KENANA

BYAMBA BANTU: “Konaunwa kwa bena Kenana yajinga nkondo yatamine bingi kukila ne yubiwa mu ano moba.”

BYAMBA BAIBOLO: “Mingilo yanji yalumbulukatu; mambo mashinda anji onse o aoloka. Ye Lesa wakishinka wabula bubi, aye ye waoloka ne kuluñama.” (Mpitulukilo ya mu mizhilo 32:4) Bunchibamambo bwaoloka bwa Lesa kechi bwafwainwa kwesakana na nkondo ya bantu ne. Mambo ka? Ke na mambo a kuba’mba Lesa uyuka biji mu milanguluko ya bantu.

Kyakumwenako, kimye Lesa kyo azhachishe mizhi ya Sodoma ne Gomola ne kwiyonauna, mwanamulume wakishinka aye Abalahama wakebelenga kuba’mba bunchibamambo bwa Lesa bwikale bwaoloka. Kechi walangulukile kuba’mba Lesa ‘ukonauna baoloka pamo na babi ne.’ Lesa wamwambijile kuba’mba inge mwatanwa bantu baoloka jikumi mu Sodoma, kechi ukamonauna muzhi na mambo a abo ne. (Ntendekelo 18:20-33) Ee, Lesa wakebelekebele mu michima ya boba bantu kabiji wamwene bubi bwabo.—1 Byambo bya Moba 28:9.

Mu jishinda jimotu, Lesa wazhajishe bena Kenana na mambo a byubilo byabo byatama kabiji wibonawine. Bena Kenana bayukanyikilwe kuba’mba bakanamine, kino kyavwangilemo ne kusoka baana mu mujilo amba mulambo.a (2 Bamfumu 16:3) Bena Kenana bayukile kuba’mba Yehoba wakambizhe bena Isalela kuba’mba ntanda ikekala ke yabo. Aba bashajile mu yoya ntanda kechi balwishishengatu bena Isalela ne, bino ne Yehoba wamwesheshe biyukilo bya kuba’mba wajinga na bantu banji.

Bino Yehoba wibomvwijile lusa bena Kenana balekele byubilo byabo byatama ne kutendeka kulondela mizhilo ya Yehoba. Kya kumwenako, Lehaba mwina Kenana wajinga pite wapulukile pamo na kisemi kyanji. Kunungapo, kimye bangikazhi ba mu Kenana muzhi wajinga mu Gebeona byo balombele amba bebobile lusa, abo ne baana babo bonse bapulukile.—Yoshua 6:25; 9:3, 24-26.

ANO MAMBO BYO EMULAMATA: Twakonsha kufunjilako bintu byanema ku byo azhachishe bena Kenana. Twafwenya kala pepi ku “juba ja kije ne ja lonaiko lwa bantu babula kwakamwa Lesa.” (2 Petelo 3:7) Inge twatemwa Yehoba, tukamwenamo kimye kyo akafumyapo buyanji bonse kupichila mu kufumyapo bantu bakana bukalama bwanji bwaoloka.

Yehoba wituvululako kuba’mba bintu byuba bansemi byakonsha kulengela baana kumwenamo byawama. Mambo a Lesa amba’mba: “Salululai mweo, namba anweba ne bana benu mukekalenga na bumi. Kasa mutemwa Yehoba Lesa wenu ne kukokela jiwi janji ne kumukakachila.” (Mpitulukilo ya mu mizhilo 30:19, 20) Nanchi bino byambo byaamba Lesa wakanama nyi, inyi Lesa watemwa bantu?

[Tubyambo twa mushi]

[Kipikichala pa peja 5]

Lesa saka akyangye konauna bantu babi na Muyulo, waambijile Nowa kwibajimunako

[Mabulañano pa peja 6]

Bena Kenana bakanamine bingi kabiji bamukaine Lesa ne bantu banji kya nshiji