Kitango 46

Nanchi Ntanda Ikonaunwa Jikwabo Na Muyulo Nyi?

NANCHI wakyumvwapo kala bantu saka bamba pa kupwa kwa ntanda nyi?— Ano moba bantu bavula bambapo bingi. Bamo bamba’mba ino ntanda ikapwa umvwe beyonauna pa nkondo. Abya Lesa wakonsha kwibaleka bantu amba bonaunenga ntanda, jiulu, ne tubangabanga nyi?—

Kwesakana na byo twafunda, Baibolo waamba’mba: “Panopantanda pakapita.” (1 Yoano 2:17) Nanchi kino kilumbulula amba aye yonka ntanda yo ikonaunwa nyi?— Ine, Baibolo waamba’mba Lesa walengele ino ntanda amba ya ‘kwikalapo’ bantu saka basangalala. (Isaya 45:18) Salamo 37:29 waamba’mba: “Baoloka bakaswana ntanda, ne kwikalamo myaka ne myaka.” O ene mambo Baibolo o aambila’mba panopantanda pa kayayayangatu.—Salamo 104:5; Musapwishi 1:4.

Pano nanchi ntanda ka ikonaunwa?— Pa kuba’mba tukumbule buno bwipuzho, akitwaya tumone byamwekele mu moba a kwa Nowa. Baibolo walondolola’mba: ‘Ntanda yajipo yalobele mu mema.’—2 Petelo 3:6.

Nanchi kujipo bantu bapulukile yewa Muyulo mu moba a Nowa nyi?— Baibolo waamba’mba Lesa “walamine Nowa, musapwishi wasapwijilenga bololoke, ne bakwabopo batanu na babiji, byo aletele muyulo panopantanda pa bambulwa kwakamwa Lesa.”—2 Petelo 2:5.

Pano nanchi ntanda ka yaonawinwe? Nanchi yajinga yonkaye nyi, inyi bantu?— Baibolo washimuna’mba ‘bambulwa kwakamwa Lesa’ bo baonawinwe. Kabiji akimona, Nowa watelwa’mba “musapwishi.” Nanchi Nowa wasapwijilenga’mba ka?— Wajimwinenga ‘bantu ba mu kyokya kimye’ amba bakonaika.

Yesu byo aambile pa yewa Muyulo, wabujilenga baana banji ba bwanga bintu byaubanga bantu mpelo saka ikyangye kufika ne. Wibabujile bino kuba’mba: ‘Mu ao moba byo aji ukyangye kwiya muyulo, [bantu] bajilenga ne kutoma, basongwelenga ne kusongolwa, kutwala ne ku aja juba jo atwelele mu bwato Nowa. Nanchi kechi bayukile ne poso byo aishile muyulo, ne kwibalobesha bonse shata!’ Yesu waambile’mba bino bintu byo bikobanga bantu mu ano moba ino ntanda saka ikyangye kupwa ne.—Mateo 24:37-39.

Byambo bya kwa Yesu bimweshatu patoka amba twakonsha kufunjilako ku bintu byaubilenga bantu muyulo saka akyangye kwiya ne. Nanchi ubena kuvuluka bintu byaubile boba bantu byo twafunjile mu Kitango 10 kya uno buku nyi?— Bantu bamo bajinga babiyangala kabiji baubanga bintu byatama. Kabiji Yesu waambile’mba bakwabo nabo kechi bamutelekelenga Nowa byo ebasapwijilenga ne.

Kimye kyafikile Yehoba kyo abujile Nowa amba ukonauna bantu boba byatama na Muyulo. Waambile amba ntanda yonse ne mitumba ikayula na mema. Yehoba waambijile Nowa kufika bwato bukatampe. Bwajingatu nobe kibokoshi kikatampe, byonka byo ubena kumona pa kipikichala kiji pa peja 238.

Lesa waambijile Nowa kufika bwato bukatampe kuba’mba aye ne kisemi kyanji ne banyama bakapulukilemo. Nowa ne kisemi kyanji baingijile bingi na ngovu. Batemene bichi bikatampe ne kulenga mapulanga, apa bino batendeka kufika bwato. Uno mwingilo bamwingijile myaka yavula bingi mambo bwato bwabaishe.

Nanchi ubena kuvuluka kintu kikwabo Nowa kyo aubilenga mu myaka yonse yo afikilenga bwato nyi?— Wasapwijilenga, kujimuna bantu pa mambo a Muyulo. Abya baumvwijile luno lujimuno nyi? Kafwako waumvwijile ne, kanatu kisemi kya kwa Nowa kyonka. Bantu bonse bashala bapayankene bingi na bintu byabo bene. Nanchi ubena kuvuluka bintu byaambile Yesu amba byo byo baubilenga nyi?— Bajiilenga, kutoma, ne kusongola ne kusongolwa. Kechi balangulukilepo amba bintu byo baubanga byatamine ne, kabiji kechi batelekotu nangwa maana ku byaambilenga Nowa ne. Akitwaya tumone kibamwekejile.

Nowa ne kisemi kyanji byo batwelele mu bwato, Yehoba washinkile kinzhilo kya bwato. Bantu batwajijiletu na kulengulula amba Muyulo kechi ukeya ne. Olo, nobe mu kukopa kwa jiso, mvula watendekele kunoka. Kechi wajinga mvula mucheche ne. Wajinga mvula wa mikwe. Mema atendekele kupokomoka nobe mikola. Aalumwinenga bichi ne mabwe akatampe ubatu nobe tumabwe tucheche. Ki ka kyamwekejile bantu bajinga pangye ya bwato?— Yesu waambile’mba: ‘Muyulo waishile ne kwibalobeshatu bonse shata!’ Bantu bonse bajinga pangye ya bwato bafwile. Mambo ka?— Kwesakana na byaambile Yesu, ‘kechi baumvwijile ne!’—Mateo 24:39; Ntendekelo 6:5-7.

Yesu waambile’mba ano moba twakonsha kufunjilako ku kyokya kibamwekejile. Ki ka kyo twakonsha kufunjilako?— Bantu baonawinwe kechi na mambotu a kuba’mba bajinga na byubilo byatama ne, bino ke na mambo a kuba’mba bapayankene bingi. Kechi bakebelenga kumvwa byaambilenga Lesa ne. Atweba kechi twafwainwa kwikala nobe abo ne, ke ibyo nenyi?—

Nanchi Lesa ukonauna jikwabo ino ntanda na muyulo nyi?— Ine, Lesa waambile’mba kechi byo byo akoba ne. Waambile’mba: “Nabika kakongolo kami mu jikumbi kakekale ke kiyukilo.” Yehoba waambile’mba kakongolo kakekala kayukilo ka kuba’mba “mema kechi akekala jibiji ke muyulo wa konauna byonse biji na bumi ne.”—Ntendekelo 9:11-17.

Onkao mambo twafwainwa kusumininwa amba Lesa kechi ukonauna jibiji ntanda na muyulo ne. Pano bino kwesakana na byo twafunda, Baibolo waamba’mba ino ntanda iji ku mpelo. Lesa byo akonauna ino ntanda bañanyi bakapuluka?— Nanchi bakekala bantu babula kumvwa byamba Lesa nyi? Abya bakekala boba bakana kufunda Baibolo nyi? Nga obewa walangulukapo amba ka?—

Ne atweba tukeba tukekale pa boba bantu bo akapulusha Lesa, ke ibyo nenyi?— Nanchi kechi kyakonsha kuwama bingi umvwe kisemi kyetu kyonsetu Lesa wikipulusha byonka byo apulwishe kisemi kya kwa Nowa nenyi?— Pa kuba’mba tukapuluke, twafwainwa kuyuka Lesa byo akonauna bantu ba ino ntanda kabiji ne byo akazhikijila bantu baoloka. Akitwaya tumone byo akoba kino.

Baibolo waambatu patoka pa byo kikekala mu Danyela kitango 2, kyepelo 44. Kino kinembelo kyaamba pa ano moba etu amba: ‘Mu moba a boba bamfumu aye Lesa wa mwiulu ukaleta bufumu [nangwa amba kafulumende] ye bakabula konauna myaka ne myaka, nangwa pachechetu ne, kabiji abwa bufumu kechi bakebupana ku mutundu ungi ne. Kabiji bukalalaula buno bufumu bonse ne kwibupwishatu shata! pakuba abo bukekala myaka ne myaka.’

Nanchi waumvwa mwatala bino byambo nyi?— Baibolo waamba’mba kafulumende wa Lesa ukonauna makafulumende onse a bantu. Mambo ka?— Mambo makafulumende a bantu kechi akokela Mfumu wasalwa na Lesa ne. Nga uno yenka Mfumu ye ñanyi?— Ibyo, ke Yesu Kilishitu!

Yehoba Lesa uji na lūsa lwa kusala kafulumende wakonsha kulama, kabiji wasala Mwananji Yesu, kwikala Mfumu. Bukumotu uno Kalama wasalwa na Lesa, Yesu Kilishitu, akonaune makafulumende onse a ino ntanda. Baibolo mu Lumwekesho kitango 19, kyepelo 11 kufika pa 16, walondolola bulongo kuba’mba ye ukonauna makafulumende onse, byonka byo ubena kumona pa kikye kipikichala. Baibolo utela nkondo ya Lesa ikonauna makafulumende onse a ino ntanda amba, Amagedonyi.

Lesa waamba’mba Bufumu bwanji bukonauna makafulumende a bantu. Nanchi ne atweba witwambila’mba tukonauna ano makafulumende nyi?— Ine, mu Baibolo, kyambo kya Amagedonyi kilumbulula’mba “nkondo ya aja juba jikatampe ja Lesa wa bulume bonse.” (Lumwekesho 16:14, 16) Ee, Amagedonyi ke nkondo ya Lesa, kabiji ukengijisha Yesu Kilishitu ne bamalaika mu ino nkondo. Nanchi nkondo ya Amagedonyi ijitu pepi nyi? Akitwaya tumone byo kiji.

Tanga bino binembelo umone Lesa byo akonauna babi ne kupulusha baoloka: Byambo bya Mana 2:21, 22; Isaya 26:20, 21; Yelemiya 25:31-33; ne Mateo 24:21, 22.

[Kipikichala pa jipa 238]

Ntanda ka yaonawinwe mu moba a kwa Nowa?

[Kipikichala pa jipa 241]

Mambo ka o twafwainwa kubujila kukebelangatu kukaya?

[Kipikichala pa jipa 243]

Yesu Kilishitu, Mfumu wasalwa na Lesa ukonauna ino ntanda pa Amagedonyi