LUFUNJISHO 5

Kimye kya Muyulo Mukatampe, Bañanyi Baumvwijile Lesa? Kabiji Bañanyi Babujile Kumumvwina?

Bantu bavula mu moba ajingako Nowa baubilenga bintu byatama. Ntendekelo 6:5

Bamalaika batama bealwile mibiji ne kutendeka kupwanañana na banabakazhi

Adama ne Evwa basemene baana, kabiji bantu bavujile bingi pano pa ntanda. Byo papichile myaka, bamalaika bamo basatukile ne kulondela Satana.

Baishile pano pa ntanda ne kwialula ke banabalume pa kuba’mba basongole banabakazhi. Bano banabakazhi basemene baana biyangala byakanamine ne kukosa.

Mwanamukazhi walama mwana mu maboko aku nsongwalume saka abena kumupuma; Banefile, baana ba bamalaika batama, baubilenga bukapondo

Ntanda yayujile na bantu baubilenga bintu byatama. Baibolo waamba’mba, ‘bubi bwa muntu bwavujile pano pa ntanda ne kuba’mba milanguluko ya mu muchima wa muntu yajingatu yatama kimye kyonse.’

Nowa waumvwijile Lesa ne kulenga bwato. Ntendekelo 6:13, 14, 18, 19, 22

Nowa wajinga muntu wawama. Yehoba wabuujile Nowa amba, ukonauna bantu batama na muyulo mukatampe.

Kabiji Lesa waambijile Nowa kulenga bwato bukatampe, mo atwezhezhe kisemi kyanji ne banyama bapusana pusana.

Nowa wajimwinengako bantu kuba’mba kukeya Muyulo pano bino bantu bamusekelenga

Nowa wajimwineko bantu pa mambo a Muyulo, pano bino, kechi baumvwijile ne. Bamo bamusekelenga; bakwabo bamushikilwe.

Nowa ne kisemi kyanji babena kutwezha banyama mu bwato

Byo apwishishe kulenga bwato, Nowa watwezhezhemo banyama.