Nowa Wafiikile Bwato

NOWA wajinga na mukazhi ne baana ba balume basatu. Mazhina a baana banji bajinga ba Shema, Hama ne Yafeta. Bano baana nabo basongwele. Bonse pamo mu kisemi kya kwa Nowa bajinga bantu batanu ne basatu.

Lesa waambijile Nowa kuba kintu kyabujile kubiwapo kala ne. Wamwambijile kufiika bwato bukatampe bingi. Buno bwato bwabaile bingi, bwamwekelenga nobe kibokoshi kikatampe kyalepa. Lesa wamwambijile amba: ‘Lenga bibamba bisatu byatentakana kuya peulu, ne kuchibaulamo bibamba mukachi.’ Bino bibamba byajinga bya kwikalamo Nowa ne kisemi kyanji, banyama, ne mwa kubika kajo ka kuja bonse.

Kabiji Lesa waambijile Nowa kufiika bwato bwafwainwe kubula kutwezha mema. Lesa waambile’mba: ‘Nkaleta muyulo mukatampe wa mema ne konauna ntanda yonse. Yense ukabula kutwela mu bwato ukafwa.’

Nowa ne baana banji bamukokejile Yehoba ne kutendeka kufiika bwato. Bino bantu bakwabo basekelengatu. Batwajijiletu kwikala batama. Kafwako nangwa umo waketekejile byaambile Nowa pa mambo a byafwainwe kuba Lesa ne.

Papichile myaka yavula bingi ya kufiikilamo bwato mambo bwabaile bingi. Kyapeleleko, panyuma ya kupitapo myaka yavula, bwato bwapwile. Kepo Lesa aambijile Nowa kukonkenya banyama mu bwato. Lesa wamwambijile kutwezha banyama ba misango yonse babiji babiji, mulume ne mukazhi. Banyama ba misango ikwabo, Lesa waambijile Nowa kutwezha batanu na babiji. Kabiji Lesa wamwambijile Nowa kutwezha tuñonyi twa misango yonse. Nowa waubijile monka mwamukambizhizhe Lesa.

Panyuma ya bino, Nowa ne kisemi kyanji nabo batwelele mu bwato. Kepo Lesa ashinkile kinzhilo. Byo batwelele mu bwato, Nowa ne kisemi kyanji bapembelejilenga. Akifwanyikizha kuba’mba ne obewa uji nabo mu bwato na kupembelela. Bino amba kine nanchi muyulo ukeya monka mwaambijile Lesa nyi?