Lufunjisho 7

Lujimuno Kufuma Ku Kimye Kya Ku Kala

Yehoba kechi ukaswisha babi konauna Paladisa ne. Balunda nanji bo bakekalamotu kwapwa. Nanchi Kika kikamwekela babi? Pa kuba’mba tuyuke mukumbu, langulukai kyano kya kine kya kwa Nowa. Nowa wajingako biumbi myaka yapita. Waji muntu wawama waesekele na ngovu kuba kyaswa muchima wa kwa Yehoba kimye kyonse. Bino bantu bakwabo ba pano pa ntanda baubilenga byatama. Onkao mambo Yehoba wamwambijile Nowa kuba’mba ukaleta muyulo ukonauna bangubabibi bonse. Wamubujile kwifikila bwato kuchina’mba aye ne kisemi kyanji bakeya kufwa ku Muyulo.—Ntendekelo 6:9-18.

Nowa ne kisemi kyanji bafikile bwato. Nowa wibajimwine bantu kuba’mba kukeya Muyulo, bino kechi bamumvwijile ne. Batwajijile kuba byatama. Pa nyuma ya kupwisha kufika bwato, Nowa watwezhezhe banyama mu bwato, kabiji aye ne kisemi kyanji nabo batwelele monka. Kepo Yehoba aletele kipuupu kikatampe. Mvula wanokele moba 40 mute ne bufuku. Mema a yujile pa ntanda ponse.—Ntendekelo 7:7-12.

Bangubabibi bafwile, bino Nowa ne kisemi kyanji bapulukile. Yehoba wibalamine bulongo mu kimye kya Muyulo ne kwibalupwila pa ntanda yatokeshiwe kufuma ku bubi. (Ntendekelo 7:22, 23) Baibolo ishimuna kuba’mba kimye kikeya Yehoba kyo akavizha jibiji bakana kuba kyawama. Bantu bawama kechi bakonaunwa ne. Bakekala myaka ne myaka mu Paladisa pano pa ntanda.—2 Petelo 2:5, 7, 9.

Lelo jino bantu bavula boba bintu byatama. Mu ntanda mwayula lukatazho. Javula Yehoba utuma Bakamonyi banji na kusopesha bantu, bino bavula kechi basaka kumvwa ku byambo bya kwa Yehoba ne. Kechi bakeba kupimpula byubilo byabo ne. Kabiji kechi bakeba kumvwina byamba Lesa pa mambo a kyawama ne kyatama ne. Kika kikamwekela bano bantu? Nanchi juba jimo bakaluluka nyi? Bavula kechi bakaluluka ne. Kimye kikonawinwamo bangubabibi kibena kwiya kabiji kechi bakekala na bumi jibiji ne.—Masalamo 92:7.

Ntanda kechi ikonaunwa ne; ikekala ke paladisa. Abo bekala ke balunda na Lesa bakekala myaka ne myaka mu Paladisa pano pa ntanda.—Masalamo 37:29.