MEPUZHO AFUMA KU BATANGA
Nga ‘baana ba Lesa’ batongolwa mu Ntendekelo 6:2, 4 bajingako Muyulo saka akyangye kwiya bajinga bañanyi?
▪ Bishiino bimwesha kuba’mba abye byambo byaamba pa baana ba Lesa ba ku mupashi. Pano ñanyi bishiino byonkabyo?
Byambo bitanshi bya bino byepelo byaamba’mba: “Bana ba Lesa byo bebamwene bana ba bantu ba bakazhi byo baji ba buya, bebasongwelenga bonkaba bo basalulwile ke bakazhi babo.”—Nte. 6:2.
Mu Binembelo bya Kihebelu, byambo bya kuba’mba “bana ba Lesa” bitanwa mu Ntendekelo 6:2, 4 ne Yoba 1:6; 2:1; 38:7. Nga bino binembelo bilumbululapo ka pa bano “bana ba Lesa”?
“Bana ba Lesa” bo tutanga pa Yoba 1:6 bajinga bilengwa bya mupashi byakonkene kwi Lesa. Pa bano pajinga ne Satana ‘wapitañananga pano pa ntanda.’ (Yoba 1:7; 2:1, 2) Kabiji pa Yoba 38:4-7 tutangapo’mba “bana ba Lesa” ‘babijikilenga na lusekelo’ kimye Lesa kyo ‘aajile kitendekesho kya pano pa ntanda.’ Kyamweka bajinga bamalaika, mambo pa kikye kimye bantu saka bakyangye kulengwa. “Bana ba Lesa” batongolwa pa Yoba 1:6 bajinga bilengwa bya mwiulu bikala pamo ne Lesa, kechi bantu ne.
Pano nga “bana ba Lesa” batongolwa mu jishimikila jiji mu Ntendekelo 6:2, 4 bo bañanyi? Kwesakana na bishinka bya mu Baibolo byo twaambapo kala, kyayilamo kupwisha kuba’mba jino jishimikila jibena kwamba pa baana ba Lesa ba mwiulu baishile pano pa ntanda.
Bamo kyakonsha kwibakatazha kuswa kuba’mba bamalaika bakonsha kukeba kulaala na banabakazhi. Byambo bya kwa Yesu byanembwa mu Mateo 22:30 bimwesha kuba’mba mwiulu kechi muji masongola nangwa kulaala na banabakazhi ne. Pano bino, pa bimye bimo bamalaika baalukanga bumuntu ne kuja ne kutomena pamo na bantu. (Nte. 18:1-8; 19:1-3) Onkao mambo, kyayilamo kwamba’mba mu mibiji ya bumuntu bakonsheshe kulaala na banabakazhi.
Kuji bishinka bya mu Baibolo bimwesha kuba’mba bamalaika baubile byobyo. Yuda 6, 7 waesakanya bubi bwa banabalume ba mu Sodoma balondalondanga bintu byabula kufwainwa bisakasaka mibiji yabo, ku “bamalaika babujile kulama bifulo byabo ne kusha mapunzha abo awama.” Kwipasha kujipo pa bano bamalaika ne bena Sodoma ke “kuba bulalelale ne kulondalonda bintu byabula kufwainwa bisakasaka mibiji yabo.” Byambo bipasha na bino bitanwa pa 1 Petelo 3:19, 20 byaesakanya kubula lukokelo kwa bamalaika ku bantu bajingako mu “moba a kwa Nowa.” (2 Pe. 2:4, 5) Onkao mambo, byubilo bya kubula lukokelo bya bamalaika bajingako mu moba a kwa Nowa byakonsha kwesakana na bubi bwajinga mu Sodoma ne Gomola.
Bino byambo twakonsha kwibyumvwisha bulongo inge twayuka kuba’mba “bana ba Lesa” batongolwa mu Ntendekelo 6:2, 4 bajinga bamalaika bealwile ke bantu ne kulaala na banabakazhi.
Baibolo waamba’mba Yesu ‘wasapwijile ku bapashi baji mu kaleya.’ (1 Pe. 3:19) Nga kino kyatala mu ka?
▪ Mutumwa Petelo walumbulula bano bapashi amba aba “basatukile kimye Lesa kyo apembelejilenga mu butekanye mu moba a kwa Nowa.” (1 Pe. 3:20) Kya kine, Petelo waambilenga pa bilengwa bya mupashi byasajilepo kulondela bunsatuki bwa kwa Satana. Yuda waamba pa bamalaika “babujile kulama bifulo byabo ne kusha mapunzha abo awama,” amba Lesa “wibalama mu minyololo ya kikupu mu mfishi ine ikatampe kufikatu ne kimye kyo bakebazhachisha mu juba jikatampe.”—Yuda 6.
Nga bilengwa bya mupashi byamwesheshe byepi kubula lukokelo mu moba a kwa Nowa? Muyulo saka akyangye kwiya, bapashi batama bealwile ne kwikala bantu, kintu Lesa kyo abujilenga kukeba ne. (Nte. 6:2, 4) Bano bamalaika bealwile mu bumuntu ne kulaala na banabakazhi, baubilenga kintu kya bunya. Lesa kechi walengele bilengwa bya mupashi kuba’mba bikalaalenga na banabakazhi ne. (Nte. 5:2) Bano bamalaika babi kabiji bansatuki Lesa ukebonauna pa kimye kyanji mwine. Lelo jino, byonka byaamba Yuda, baji “mu mfishi ine ikatampe” nangwa’mba mu kaleya ka ku mupashi.
Ñanyi kimye Yesu kyo asapwijile “bapashi baji mu kaleya,” kabiji wibasapwijile byepi? Petelo wanembele’mba kino kyamwekele kimye Yesu kyo ‘asangwilwe ne kwikala kilengwa kya mupashi.’ (1 Pe. 3:18, 19) Kabiji yukai ne kino, Petelo waambile’mba Yesu ‘wayile ne kukasapwila.’ Petelo byo aingijishe byambo bya kuba’mba wayile ne kukasapwila, kibena kumwesha’mba kino kyamwekele saka akyangye kunemba nkalata yanji itanshi. Onkao mambo, kyamweka Yesu byo asangwilwe wabujile bapashi batama lukabisho lo bakebakabisha. Kechi wibasapwijile kuba’mba bekale na luketekelo ne. Bwajinga busapwishi bwa kwibazhachisha. (Yona 1:1, 2) Na mambo a kuba Yesu waikele na lwitabilo ne bukishinka kufika ne ku lufu kabiji ne kusangulwa, ne kumwesha kuba’mba Diabola kechi uji na bulume pe aye ne, Yesu wajinga na bishinka byamulengejile kusapwila luno luzhachisho.—Yoa. 14:30; 16:8-11.
Kulutwe, Yesu ukakasa Satana ne bano bamalaika banji ne kwibataya mu kalengwa kabula kupela. (Luka 8:30, 31; Lum. 20:1-3) Pa kino kimye, bano bapashi batama baji mu mfishi ine ikatampe ya ku mupashi, kabiji lonaiko lwabo lujitu pepi.—Lum. 20:7-10.