Mulongo Wanungwako Katataka ku Jibumba Jitangijila

Lukelo pa Kisatu pa 5 September, 2012, babijikile ku bisemi bya Betele mu United States ne mu Canada kuba’mba mulongo mukwabo wanungwako ku Jibumba Jitangijila ja Bakamonyi ba kwa Yehoba. Kutendeka pa 1 September, 2012, Mark Sanderson waikele umo wa mu Jibumba Jitangijila.

Mulongo Sanderson bamukomeshe ku bansemi bena Kilishitu mu muzhi mukatampe wa San Diego, mu California, U.S.A., kabiji wabatizhiwe pa 9 February, 1975. Watendekele kwingila bupainiya mu kibunji kya Saskatchewan, mu Canada, pa 1 September, 1983. Wapwishishe Sukulu wa Lufunjisho lwa Mwingilo (utelwa luno amba Sukulu wa Baibolo wa Balongo Bakatanda) wa nambala 7 mu December 1990, mu United States. Mulongo Sanderson bamutongwele kwikala painiya wiikajila ne kumutuma kuya na kwingijila pa jikuji ja Newfoundland, mu kyalo kya Canada, mu April 1991. Panyuma ya kwingilako mwingilo wa bukalama bwa mwanzo, bamwichile kuya na kwikala umo wa mu kisemi kya Betele mu Canada mu February 1997. Mu November 2000, bamutumine kuya na kwingijila pa musampi wa mu United States, ko aingijilenga ku Dipatimenti Ipana Mabulañano a bya mu Bipatela kabiji mu kuya kwa kimye watendekele kwingijila ku Dipatimenti itala pa bibena kwenda mwingilo.

Mu September 2008, Mulongo Sanderson watainwe ku Sukulu wa Baji mu Kavoto ka Musampi, kabiji byo afumine ku sukulu bamutongwele kwikala wa mu Kavoto ka Musampi mu Philippines. Mu September 2010, bamwichile jikwabo ku United States, ko aingijilenga mwingilo wa kukwasha Kavoto ka Mwingilo ka mu Jibumba Jitangijila.

[Kipikichala pa peja 26]

Baji mu Jibumba Jitangijila

Baimana, kufuma ku kipiko kuya ku kilujo: David H. Splane, Anthony Morris III, Douglas M. Sanderson, Geoffrey W. Jackson, Stephen S. Lett. Baikala, kufuma ku kipiko kuya ku kilujo: Samuel F. Herd, Gerrit Lösch, Guy H. Pierce. Bonse baji mu Jibumba Jitangijila bena Kilishitu bashingwa.