MUTWE WA PA NKUPIKO: MAMBO KA BUYANJI O BWAVUJILA KABIJI BUKAPWA KIMYE KA?

Bantu Bavula Bafwa kwa Kubula Mambo!

Noelle wajinga mwanyike ye batemenwe bingi ku bantu kabiji watemenwe kulenga bipikichala. Juba jimo mabanga waendeukilenga pa lubanza kunyuma ya nzubo, kabiji waponejile mu kizhiba po baowelanga. Watomejile ne kufwa saka kwashalatu milungu ibiji kufikizha myaka ina ya kusemwa.

Charlotte, Daniel, Olivia, Josephine . . . Ano ke mazhina amo pa baana 20 bajinga na myaka 6 kufika ku 7 bajinga pa bantu 26 bo balozele pa sukulu wa Connecticut, mu U.S.A pa 14 December, 2012. Pa kijilo kya bano bantu, Ndamakyalo Obama watongawile mazhina a bano baana bafwile ne kubula bantu bashonkene bajinga na bulanda amba: “Bino bintu byatama byaubiwa byafwainwa kupwa.”

Bano, wajinga na myaka ya kusemwa 18, mu 1996 wavilukile kufuma mu kyalo kya Iraq na kisemi kyanji ne kuya ku kyalo kya Norway. Balunda nanji bamwitanga ne jizhina ja bisela ja kuba’mba Juba ja Muselela. Kyataminekotu, ke kya kuba’mba pa 22 July, 2011, Bano wajinga pa bantu 77 bo baipayile ku kapondo witotele ne kwamba’mba: “Nakeba kwimubula kuba’mba nabakebenga kwipaya bantu bavula.”

Masawakya atama a uno mutundu abena kubiwa ntanda yonsetu. Akilangulukai pa bulanda bwikalako umvwe kwaubiwa mapuso, bumbanzhi, nkondo, bya malwa biponakotu bine, ne bintutu bikwabo. Bantu bavula bafwa nangwa kuyanda pa kubulatu ne mambo.

Bantu bamo bapamo Lesa mambo kuba’mba Mulenga wetu kechi wituta muchima ne. Bakwabo nabo bamba’mba Lesa umona byo tubena kuyanda, pano bino kechi ukebatu kwituzhikijila ne. Kabiji bakwabo nabo bamba’mba bino bya malwa biponakotu bine wibiyukila jimo. Bantu bamba bintu byavula bingi pa bino. Pano, kwepi ko twakonsha kutana mikumbu ya kine? Mu bibaba byalondelapo, tusakwingijisha Mambo a Lesa, Baibolo pa kuba’mba tutane mikumbu ne kumona bintu bilengela buyanji ne byo bukapwa.

[Kipikichala pa peja 3]