FWENYAI KWIPI NE LESA
“Ye Ufweta aba Bamukebesha”
Nanchi Yehoba unemeka byuba bapopweshi banji pa kuba’mba bamutokeshe ku muchima nyi? Bamo bakonsha kukana ne kwamba’mba Lesa kechi wanemeka byo tuba ne. Bino ñambilo ya uno mutundu ilengela Lesa kumweka nobe watama. Baibolo, Mambo anji etubula byo aji. Etubula kuba’mba Yehoba usanta pa mingilo ya bapopweshi banji ba kishinka. Akilangulukai pa bino byambo bya kwa Paulo bitanwa pa Bahebelu 11:6.
Bi ka bikebewa pa kuba’mba tutokeshe Lesa ku muchima? Paulo wanembele’mba “Kechi kyakonsheka kutokesha Lesa ku muchima kwa kubula lwitabilo ne.” Monai kuba’mba Paulo ubena kwamba’mba kechi kyakatazha kutokesha Lesa ku muchima kwakubula lwitabilo ne. Bino waamba kuba’mba kyakatazha kutokesha Lesa ku muchima umvwe lwitabilo kafwako. Nanchi pa kuba’mba tutokeshe Lesa ku muchima, twafwainwa kwikala na lwitabilo.
Lwitabilo lwa mutundu ka lutokesha Lesa ku muchima? Pa kuba’mba twikale na lwitabilo mwi Lesa, twafwainwa kwikala na bintu bibiji. Kitanshi, twafwainwa “kuketekela amba ko aji.” Pano twakonsha kumutokesha byepi ku muchima umvwe tubena kuzhinauka kuba’mba Lesa ko aji? Lwitabilo mwavwangwa bintu byavula, mambo ne bandemona baitabila kuba’mba Yehoba ko aji. (Yakoba 2:19) Kwitabila kuba’mba Lesa ko aji kwakonsha kwitulengela kubapo bimo, ko kuba’mba bwikalo bwetu bwafwainwa kumwesha kuba’mba tuji na luketekelo kabiji tutokesha Lesa ku muchima.—Yakoba 2:20, 26.
Kya bubiji, ‘twafwainwa kuketekela amba’ Lesa “ye ufweta.” Muntu uji na lwitabilo lwa kine waketekela kuba’mba kwibikako kwanji pa kutokesha Lesa ku muchima kechi ukapulwilamotu mabula ne. (1 Kolinda 15:58) Twakonsha kutokesha byepi Yehoba ku muchima umvwe tuzhinauka kuba’mba wakonsha kwitufweta? (Yakoba 1:17; 1 Petelo 5:7) Muntu wayuka kuba’mba Lesa kechi wata muchima bantu ne, kechi usanta ne, kabiji amba wakanama, ko kuba’mba kechi wayuka Lesa wanembwa mu Baibolo ne.
Yehoba ufweta bantu ba mutundu ka? Paulo waamba’mba “Aba bamukebesha.” Buku waamba pa bantuntuluzhi ba Baibolo waamba pa kyambo kya Kingiliki kyo batuntulula amba “aba bamukebesha” kechi kilumbulula “kuya na kukeba kintu ne” bino kilumbulula kwiya kwi Lesa “na kumupopwela.” Buku mukwabo ulumbulula amba kino kyambo kya Kingiliki kilumbulula kwibikako kya kine kine. Yehoba ufweta bantu baji na lwitabilo lwibalengela ku mupopwela na muchima yense.—Mateo 22:37.
Pano Yehoba ufweta byepi bapopweshi banji ba kishinka? Walaya kwibapesha kulutwe ko kuba’mba bumi bwa myaka ne myaka mu Paladisa pano pa ntanda, kabiji kino kimwesha amba mpanyi kabiji witutemwa. (Lumwekesho 21:3, 4) Ne pa kinotu kimye, aba bakeba Yehoba batambwila mapesho kabiji wibapesha. Na mambo a bukwasho bwa mupashi wazhila ne maana atanwa mu Mambo anji, bekala bwikalo bwa lusekelo.—Salamo 144:15; Mateo 5:3.
Yehoba ke Lesa usanta kabiji wanemeka mwingilo wa bapopweshi banji ba kishinka. Nanchi kuyuka bino kwimulengela kukeba kufwenya kwipi ne aye nyi? Inge byobyo kiji, mwafwainwa kufunda byavula pa kuba’mba mumweshe lwitabilo lukalengela Yehoba kwimupesha
Kutanga Baibolo mu November
[Mabulañano pa peja 11]
Twakonsha kumutokesha byepi Yehoba ku muchima umvwe tuzhinauka kuba’mba kana ko aji nyi?