JISHIMIKILA JA BWIKALO

Nafuukwilepo Kwingijila Yehoba

Byashimikizha ba Bill Walden

Panyuma ya kupwisha sukulu mu January 1937, natendekele kufunda pa sukulu Mukatampe wa Iowa State waikela kwipi na ko twaikelanga mu United States na ku muzhika. Kuya kusukulu ne kwingila pa kuba’mba mmone mali a kupana kwampwishishanga bingi kimye kya kuba bintu bikwabo. Kufunda byalengwa bishimikwa byalepa ne byabu byabula mashiki byo bintu byo nateleko muchima kufumatu ku bwanyike.

Mu 1942, panyumatu ya kutendeka Nkondo ya bubiji ya Ntanda yonse mu United States, najinga mu mwaka wa butanu pa uno sukulu kabiji najingatu pepi na kutambula mapepala a mingilo yo nafunjilenga mu bya kulengalenga. Naikelenga na bakwetu babiji mu kibamba. Umo wambujile’mba ñambe na muntu “wapempulanga bansongwalume baikalanga mu bibaamba bya panshi.” Kuno koko twamonañenejile ne ba John O Brehmer, Kamonyi wa kwa Yehoba. Nakuminye bingi byo baingijishenga Baibolo pa kukumbula mepuzho ajitu onse. Kino kyandengejile kumvwa bulongo bingi kabiji natendekele kufunda Baibolo ne Johnny kabiji pa kupitapo kimye natendekele ne kuya na kusapwila nanji mu mwingilo.

Bashanji Johnny abo ba Otto, baikele Bakamonyi kimye kyo bajinga bakulumpe ba kipamo kya mali mu muzhi wa Walnut, Iowa. Ba Otto balekele yoya mingilo ne kutendeka mwingilo wa kusapwila wa kimye kyonse. Na mambo a kyakumwenako kyawama pamo na kisemi kyabo, kwandengejile kufuukulapo kuba kintu kyanema.

KIMYE KYA KUFUUKULAPO

Juba jimo mukulumpe wa pa sukulu mukatampe wambujile amba mapepala ami kechi ajinga bulongo ne, ko kuba’mba kechi naingijile bulongo mpeso yami ne. Nalombelenga kwi Yehoba Lesa pa kuba’mba ankwashe. Kechi papichile ne kimye kyabaya ne, mufunjishi witufunjishanga bya kulengalenga wangichile. Wambujile kuba’mba babena kukeba muntu ulenga bya kulengalenga kabiji bebakumbwile amba nafwainwa kuswa kwingila. Namusanchijile mufunjishi kabiji namulumbulwijile kuba’mba nafuukulapo kwingijila Yehoba. Pa 17 June, 1942 nabatizhiwe kabiji kechi papichile ne kimye ne, bantongwele kwikala painiya, byo batela bengila mwingilo wa kimye kyonse mu Bakamonyi ba kwa Yehoba.

Mu 1942, bangichile kuba’mba ntendeke mwingilo wa bushilikale ku jibumba jisala bantu babena kutwela mwingilo wa bushilikale, kabiji ne balumbulwijile kuba’mba kechi nakonsha kwimvwanga mu nkondo ne. Nasolwele mapepala afumine ku bafunjishi ba kusukulu panembelwe byubilo byami ne mingilo yo nafunjile mu bya kulengalenga. Nangwa kya kuba najinga na ano mapepala, bambujile kupana mali a kina Meleka afika ku $10,000 (K54, 20) ne kunkasa mukaleya kaji mu U.S. mu muzhi wa Leavenworth, Kansas pa myaka itanu.

BWIKALO BWA MU KALEYA

Banyike Bakamonyi kukila pa 230 bakashilwe mu kaleya kwajinga bakaili bajimanga katalwangapo na kaleya kakatampe ka Leavenworth. Muno mo betupanga mingilo saka babena kwitusopa ku baota. Bamo ba bano bayukile kuba’mba kechi twimvwanganga mu bya pano pa ntanda ne, kabiji betwambilangako.

Bamalonda bamo baswishishe kuba’mba tutwajijile kwisamba bya mu Baibolo. Kabiji betuletelanga ne mabuku alumbulula Baibolo mu kaleya. Mukulumpe wa bamalonda wanembeshe ne magazini wa Consolation awo ye batela luno amba (Labainga!)

KUFUMA MU KALEYA NE MWINGILO WA BUMISHONALE

Panyuma ya kwikala myaka isatu mu kaleya, bamfumishe pa 16 February, 1946 saka papitatu bañondo bacheche kufuma papwijile Nkondo ya Bubiji ya Ntanda yonse. Natendekele jikwabo mwingilo wa kimye kyonse. Bambujile kubwela na kwingijila mu muzhi wa Leavenworth mu Kansas. Najinga bingi na moyo mambo mu kyokya kyalo bashikilwe bingi Bakamonyi ba kwa Yehoba. Kyankatezhe bingi kutana nkito ne nzubo.

Mvuluka byañambijile malonda wajinga na kichi kya kupaminako mpila mu maboko amba, “Fumapapo!” Naumvwine moyo ne kufumako. Pa nzubo ikwabo, inetu wañambijile amba “Naiya katatakatu” washinka ne kinzhilo. Natendekele kupembelela kabiji naumvwinetu windo yashinkuka peulu ne kungichila mema. Nangwa byonkabyo, mu mwingilo mwafuminenga bintu byawama bingi. Mambo bantu bonapanga mabuku alumbulula Baibolo baalukile ke Bakamonyi.

Mu 1943 bashinkwile sukulu wakatataka wa bamishonale mu muzhi wa New York. Bangichile kuya na kutanwako ku sukulu wa nambala 10 awo wapwile pa 8 February, 1948. Uno sukulu batendekele kumutela amba Sukulu wa Baibolo wa Gileada wa Watchtower. Byo twapwishishetu, bantumine kuya na kwingijila ku kyalo kya Gold Coast, kitelwa luno amba Ghana.

Byo nafikile mu Gold Coast, bantumine kuya na kusapwila ku bamukafulumende ne bena Europe. Kumpelo ya mulungu naingilanga na kipwilo na Bakamonyi ba kwa Yehoba ne kukwasha basapwishi bya kuspwila ku nzubo ku nzubo. Kabiji nafwakeshanga ne Bakamonyi bajinga mwalepa ne kwibakwasha bya kusapwila. Kabiji naingijilanga pepi na kyalo kya Ivory Coast akyo kitelwa luno amba Côte d’Ivoire mwingilo wa bukalama bwa mwanzo.

Byo naingijilenga mu ano mapunzha, naikalangatu byonka bikala bene bena Africa, kulaala mu mazubo a kumasa, kuja na maboko ne kuzonzomana pa “kuya kungye”, byonka byaubanga bena Isalela mu kiselebwa. (Mpitulukilo ya mu mizhilo 23:12-14) Kwikala mu jino jishinda kwalengejile amiwa ne bamishonale bakwetu kutalwa bulongo ku bantu. Bamuka binemanga bamukafulumende batendekele kufunda Baibolo ne atweba. Bamukafulumende byo batendekele kwitumanyika pa kuba’mba batambule bitupa, bakazhi babo betwambilangako ku bamwatawabo kabiji balekele kuba byo bakebelenga kuba.

Byonka byo kyajingatu ku bamishonale bavula mu Africa, nakolelwe kikola kya mashika. Nekopawijilengatu ne kwizakamina ne kukankalwa kwamba bulongo. Kimye kimo, nakwachijilangatu mubanga pa kuba’mba abulenga kuzakama. Pano bino, mwingilo wami watwajijile kabiji mwafuminenga byawama.

Pa myaka itanshi ina yo naikele mu Africa, twasambakene ne Eva Hallquist awo ye namonañene nanji saka nkyangye kufuma mu United States. Nayukile kuba’mba wafwainwa kupwisha sukulu wa Gileada wa bu 21 pa 19 July, 1953 pa Kukonkana kwa byalo kwa Bakamonyi ba kwa Yehoba mu kibanza kya Yankee kiji mu New York. Naumvwañene kwingila na wendesha bwato kumukwashako mingilo ya mu bwato pa kuba’mba mmone jishinda ja kupichilamo kuya mu United States.

Panyuma ya kupitapo moba 22, pa lwendo lwetu lwakatazha lwa pa tulunga, nafikile kabiji nayile na kumona Eva wajinga pa ofweshi mukatampe wa Bakamonyi ba kwa Yehoba. Byo najinga peulu nsaka ntala mwaya muzhi wa New York nesambile nanji bya masongola. Panyuma ya byobyo, Eva waishile ku Gold Coast na kwingijila pamo.

KULAMA KISEMI

Panyuma ya kwingila ne Eva mu Africa pa myaka yavula, natambwijile nkalata kufuma ku bamama kumbula amba Batata bakolwa kikola kya kansa. Panyuma ya kutambula luusa kuba’mba tuye na kwibamona, amiwa ne Eva twabwelele ku United States. Batata misongo yatwajijile kabiji kechi papichile ne kimye kyabaya ne, bafwile.

Byo papichile myaka ina saka twabwela kala ku Ghana, betubujile amba Bamama bakolwa. Balunda netu betubujile amba tubwele ku muzhi na kwibalama. Kyakatezhe bingi kulondela bino. Panyuma ya kwingila mu mwingilo wa bumishonale pa myaka 15, atweba 11 twabwelele ku United States.

Pa myaka yavula twapimpuzhanyanga pa kulama Bamama kwibatwala ku kupwila umvwe babukako bulongo. Pa 17 January, 1976 bafwile saka baji na myaka 86. Pano bino, kuji kintu kikwabo kyatama kyaubiwe pa kupitapo myaka 9. Eva wakolelwe kikola kya kansa. Twaesekele papelela bulume bwetu kupwisha kikola, bino kyatwajijile kufikatu ne kimye kyo afwile pa 4 June, 1985 na myaka ya kusemwa 70.

LUPIMPU LUKWABO LWAUBIWE MU KWINGIJILA YEHOBA

Mu 1988, bangichile kuya na kutanwa kukupana kwa musampi ko banungileko mu Ghana. Kyajinga kimye kyawama bingi. Byo nafikile mu Ghana panyuma ya kupwisha sukulu wa Gileada saka papita kala ne myaka 40, mwajingatu Bakamonyi bacheche. Mu 1988, bavujijileko kukila pa 34,000, kabiji lelo jino baji pepi na 114,000.

Panyuma ya kwingila myaka ibiji mu Ghana, nasongwele mulunda nanji Eva aye Betty Miller pa 6 August, 1990. Twatwajijila kwingijila Yehoba. Tubena kutonga bingi juba jo tukamonañana na bankambo, bansemi yetu ne Eva pano pa ntanda kimye kya lusanguko mu Paladisa.—Byubilo 24:15.

Javula mipolo ilukumukilatu umvwe navuluka Yehoba byo angingijisha pa myaka 70 mu mwingilo wanji. Namusanchila bingi pa kunkwasha kufuukulapo kwingila mwingilo wanji. Nangwa kya kuba luno njina na myaka 90, Yehoba wayukisha byakulengalenga watwajijila na kumpa bulume pa kuba’mba ntwajijile na kwingila mwingilo wanji.

[Kipikichala pa peja 10]

Ne Betty

[Kipikichala pa peja 9]

Kaleya ka Leavenworth mu U.S. lelo jino. Bantu 230 bo bakashijile ponka

[Kipikichala pa peja 9]

Kusambakana na mfumu mu kyalo kya Gold Coast luno kitelwa amba Ghana