Muntu Mutanshi Washinka Matwi Wafunjile Bukine

NASHINKILE matwi byo najinga mwanyike, kabiji nafunjile mulaka wa kwamba na maboko ku sukulu ya bashinka matwi. Byo najinga na myaka 11, popo naishile mu bukine kimye kisemi kimo kya Bakamonyi kya mu kimasamasa mo naikalanga po kyangichile kuya na kutanwa ku kupwila kimye kitanshi. Nangwa kya kuba kechi naumvwinenga majashi ne, bantambwijile bingi bulongo kabiji nafukwilepo kutwajijila kutanwangako. Balongo ne banyenga bangitanga kuya na kujila nabo pamo kajo ne kubila bintu bikwabotu pamo.

Mu 1982, naikele musapwishi kabiji palutwe kacheche nabatizhiwe. Mu 1984 nasongwele ba Eva, nabo bashinka matwi. Nangwa kya kuba kechi twaumvwishishe bukine bwa mu Baibolo ne, bino twayukile jibumba ja Yehoba pa kumona butemwe ne lusekelo lo twajinga nalo pa kupwanañana na balongo ne banyenga mu kipwilo.​—Yoa. 13:⁠35.

Mu 1992, banengezhe kufunjisha balongo ne banyenga bamo Mulaka wa Kwamba na Maboko wa Kina America (ASL). Bano basapwishi batendekele kukeba bantu bashinka matwi ne kwibasapwila mambo awama. Mu 1994, mwingilo mu mulaka wa kwamba na maboko wayijileko bingi palutwe kimye balume ne bakazhi bafumine ku Puerto Rico kyo bebechile pa musampi kwiya na kufunjisha balongo ne banyenga 25 mulaka wa kwamba na maboko.

Mu yenka uno mwaka amiwa ne ba Eva twatendekele kupwila pamo na jibumba jalengelwe mu mulaka wa kwamba na maboko. Byo twatendekele kutanwa ku kupwila kwa mu mulaka wa kwamba na maboko, popo twatendekele kumvwisha byavula bifunjisha Baibolo, nabiji Satana byo azhinaukilenga bumfumu bwa kwa Yehoba bwa pa bilengwa byonse ne Bufumu bwa Bumesiasa byo bukoba pa kufikizha byafukula Lesa.

Pa 1 December mu 1995, mu Santo Domingo ne Santiago mwalengelwe bipwilo bya mu mulaka wa kwamba na maboko. Mu August mu 2014, mwajinga bipwilo 26 bingijisha mulaka wa kwamba na maboko ne mabumba 18.

Amiwa ne ba Eva twafunjishe baana betu basatu mulaka wa kwamba na maboko. Mwanetu wa mukulumpe wa mulume aye Éber, wingila pamo na jibumba ja batuntulula mulaka wa kwamba na maboko pa musampi wa mu United States. Mu kipwilo ne nkwasho kabiji ba Eva bapainiya ba kimye kyonse.