Nemekainga Balongo ne Banyenga Yenu Bashinka Matwi!

BANTU ba Lesa lelo jino ke kisemi kikatampe kya balongo ne banyenga ba ku mupashi bafuma ku banabalume ne banabakazhi ba ku kala. Pa bano bantu pajinga ne Samwela, Davida, Samisonyi, Lehaba, Mosesa, Abalahama, Sala, Nowa ne Abela. Pa bakalume ba Yehoba bakishinka paji ne bavula bashinka matwi. Kya kumwenako, bantu batanshi baikele Bakamonyi ba kwa Yehoba mu Mongolia bajinga bamulume ne mukazhi bashinka matwi. Kabiji na mambo a bukishinka bwa balongo ne banyenga yetu bashinka matwi mu Rus sia, twabingile mambo mu Kije kya mu Europe Kitala pa Lūsa lwa Bantu.

Mu ano moba, ‘kalume wakishinka kabiji wa maana’ wanengezha mabuku a mu mulaka wa kwamba na maboko kabiji ne bipwilo ne kupwila kukatampe mu mulaka wa kwamba na maboko. (Mat. 24:45) Kino kyalengela bakwetu bashinka matwi kumwenamo bingi.a Pano nanchi mwakilangulukapo byo kyaikalanga kala saka kukyangye kwikala luno lunengezho pa kubatu amba bantu bashinka matwi bafunde pe Lesa wa kine ne kuyilako palutwe mu kuyuka bukine nyi? Abya mwakilangulukapo byo mwafwainwa kuba pa kuba’mba mukonshe kukwasha bantu bashinka matwi bekala mu nyaunda yenu nyi?

Lunengezho Lujiko Saka Lukyangye Kwikalako Ne

Inge mwaipuzha bakikulumpe bashinka matwi kwimubula byo baubile pa kuyuka Lesa, bakonsha kwimubula amba ka? Bakonsha kwimubula byo baumvwine kimyetu kitanshi kyo bafunjile amba Lesa uji na jizhina, kabiji ne buno bukine byo bwaalwile bwikalo bwabo kabiji ne kwibakwasha pa myaka yavula, mutanchi wa vidyo ya mu mulaka wa kwamba na maboko nangwa ma DVD saka akyangye kwikalako ebakwasha kuyilako palutwe mu kuyuka bukine bwa mu Binembelo. Bakonsha kwimulondolwela byo kyaikalanga kupwila kwa bwina Kilishitu byo kwabujile mu mulaka wa kwamba na maboko. Mu kifulo kya kwibatuntulwila, umo waikalanga kwipi na kobaji ne kwibanembela byambo pa kipepala pa kubatu amba bebakwashe kuyuka bibena kwambiwa. Mulongo umo washinka matwi wafunjile bukine pa kupwila mu jino jishinda pa myaka itanu na ibiji saka kukyangye kwikala muntu wa kwibatuntulwila byambo mu mulaka wa kwamba na maboko.

Bakamonyi bakikulumpe bashinka matwi bavuluka byo kyaikalanga kala pa kusapwila pamo na balongo bakwabo mu kipwilo ku bantu “babula kushinka matwi.” Bakwatanga ku kuboko kumo kakipepala po banembanga byambo bicheche bya kusapwila ku bantu inge bafika pa nzubo. Kabiji ku kuboko kukwabo bakwachilangako magazini wa Kyamba kya Usopa ne Awake! wakatataka. Bekabilanga bingi kufunjisha bakwabo bashinka matwi lufunjisho lwa Baibolo kwingijisha mabuku o babulanga kumvwisha bonse. Basapwishi bakikulumpe bashinka matwi kyamweka bavuluka byo balefulwanga umvwe byo balumbululanga byabula kumvwanyika kabiji babula kutwajijila kwamba pa bukine bwa ku mupashi. Kabiji bayuka ne byo kyumvwanyika kwikala na butemwe bukatampe pe Yehoba bino saka wapelelwa bulume bwa kwibumwesha. Mambo ka? Mambo kechi basumininwe kuba’mba bintu bimo byo bafundanga byajinga bya kine ne.

Nangwa kya kuba kwajinga ino mikiika, balongo ne banyenga yetu bashinka matwi balama bukishinka bwabo. (Yoba 2: 3) Babena kupembelela Yehoba na butekanye. (Sala. 37: 7) Kabiji ubena kwibapesha kukila ne bavula byo baketekejile.

Akimonai byaingijile mulongo umo washinka matwi uji na kisemi. Saka kukyangye kwikala mavidyo a mu mulaka wa kwamba na maboko, watangijilanga lufunjisho lwa kisemi kimye kyonse. Mwananji wamulume uvuluka’mba: “Kibashupanga bingi batata pa kuba’mba batangijilenga lufunjisho lwa kisemi kimye kyonse, mambo betufunjishanga bintu byanembwa mu mabuku. Javula bakankalwanga kumvwa mwatala byambo byanembwa. Nangwatu atweba baana twakankalwanga kumvwisha mo byatajile. Twibabulangako inge babula kulumbulula bulongo mwatala bintu. Nangwa kyaikalanga bino, batata bafunjishanga lufunjisho lwa kisemi kimye kyonse. Bayukile kuba’mba kyakijilemo kunema atweba kumuyuka Yehoba kukila abo kumvwa bumvu na mambo a kuba’mba kimo kimye bakankalwanga kumvwisha mwatala Kizungu.”

Kuji ne kya kumwenako kikwabo kya mulongo Richard, uji na myaka ya kusemwa ya mu ma 70, washinka matwi kabiji mpofu wikala mu Brooklyn, New York, U.S.A. Richard bamuyuka bingi kuba’mba utanwa ku kupwila kwa bwina Kilishitu kimye kyonse. Pa kuba’mba aye ku kipwilo, upatama shitima saka aya na kubala po ibena kwimenaimena pa kuba’mba ayuke po afwainwa kupatukila. Juba jimo kimye kya mashika, kechi kwajinga kupwila ne na mambo a kuba kwajinga mvula wa sino. Bonse mu kipwilo bebabujile kuba’mba kechi kusakwikala kupwila ne, bino Richard kechi bamubujile ne. Balongo byo bavulukile kuba’mba Richard kechi bamubula ne, bamukebele ne kumutana saka aimana pangye ya Nzubo ya Bufumu na kupembelela kuba amba bashinkule kinzhilo. Byo bamwipwizhe kukeba kuyuka ene mambo o aishijile mu mvula wa sino, wakumbwile amba “Natemwa Yehoba.”

Mwakonsha Kuba Byepi?

Nanchi mu mpunzha yenu muji bantu bashinka matwi nyi? Abya mwakonsha kufundako milaka imo ya kwamba na maboko pa kuba’mba mwisambenga nabo nyi? Bantu bashinka matwi javula batekanya bingi pa kufunjisha bakwabo mulaka wabo. Mwakonsha kutana muntu washinka matwi kuji konse nangwa mu mwingilo. Mwakonsha kuba byepi? Esekai kwamba nanji. Ingijishai binungwa bya mubiji, kunemba pa bipepala, mapu, bipikichala ne bintutu bikwabo. Nangwa kya kuba muntu wabula kumwesha lusekelo lwa kufunda bukine, bulai Kamonyi washinka matwi nangwa mukwabo wayuka mulaka wa kwamba na maboko kuba’mba akaye ku muntu ye mwatana. Muntu washinka matwi wakonsha kutemwa kuteleka ku byambo bya mu mulaka wa kwamba na maboko.

Apo kampe mubena kufunda mulaka wa kwamba na maboko ne kutanwa ku kipwilo kingijisha mulaka wa kwamba na maboko. Mwakonsha kuyukisha byepi uno mulaka ne kumumvwisha? Nangwa kya kuba mu kipwilo muji basapwishi bakwabo babula kushinka matwi, nanchi kechi kyakonsha kuwama kwingijisha mulaka wa kwamba na maboko pa kwisamba nabo nenyi? Kino kikemukwasha kulangulukilanga bintu mu mulaka wa kwamba na maboko. Pa bimye bimo, mwakonsha kumona nobe kwamba kwimupelela kukila kwingijisha mulaka wa kwamba na maboko. Pano bino pa kufunda mulaka yense, mwafwainwa kwibikangako pa kuba’mba mwambenga bulongo.

Kwibikako kwingijisha mulaka wa kwamba na maboko kumwesha butemwe ne munema ku balongo ne banyenga yetu bashinka matwi. Akilangulukaipotu bantu bashinka matwi byo balefulwa pa juba pa juba na mambo a kuba’mba kechi bomvwa byamba bantu pa nkito nangwa pa sukulu ne. Mulongo umo washinka matwi waambile amba: “Pa juba pa juba bantu bonse bo ngikala nabo bamba. Javula ñumvwa bingi mukose ne kumona nobe mbena kushalapo pa bibena kuba bakwetu kabiji kino kinzhingijisha bingi. Kechi nakonsha kulumbululatu byonse pa mambo a byo neumvwa pa bimye bimo ne.” Kupwila kwetu yo mpunzha yawama balongo ne banyenga yetu bashinka matwi ko batambwila kajo ka ku mupashi ne kwisambila misambo ya bwina Kilishitu. —Yoa. 13: 34, 35.

Kabiji kuji ne mabumba akwabo acheche a bantu bashinka matwi apwila pamo na bipwilo bingijisha mulaka wa kwamba. Kupwila konse bekutuntulwila mu mulaka wa kwamba na maboko. Bantu bashinka matwi pa kupwila bekala kulutwe mu Nzubo ya Bufumu pa kuba’mba bateshe muchima ku byo babena kwamba. Kuba bino kwibakwasha kumona ubena kutuntulula kabiji ne ubena kwamba pamo kwa kubula kwibalabika. Kyatanwa kuba’mba kipwilo kyonse kechi kibanda kupijilwa luno lunengezho ne, kabiji kechi kilabikwa ne. Kabiji luno lunengezho lwingila ne ku kupwila kukatampe ko batuntulwila mu mulaka wa kwamba na maboko. Twafwainwa kwibasanchila balongo ne banyenga mu kipwilo pa byo bengila na ngovu kutuntulwila mu mulaka wa kwamba na maboko byonkatu muntu washinka matwi byo akonsha kulumbulula byambo mu jishinda japela kumvwa.

Kampe ne anweba muji mu kipwilo kikwasha jibumba jingijisha mulaka wa kwamba na maboko nangwa kajibumba ka bantu bachechetu bashinka matwi bo batuntulwila mu uno mulaka pa kupwila. Mwakonsha kuba byepi pa kuba’mba mumweshe amba mwata muchima bano balongo bashinka matwi pa muntu pa muntu? Mwafwainwa kwibetako ku mazubo enu. Umvwe kyakonsheka, fundaiko pacheche bya kwamba uno mulaka wabo. Kechi mwafwainwa kuchina amba mwakonsha kukankalwa kwisamba ne. Mukatana jishinda ja kwisambilamo kabiji umvwe ke mumweshe buno butemwe, mukafuma bintu byawama. (1 Yoa. 4: 8) Bakwetu Bakamonyi bashinka matwi baji na byavula byo bakonsha kwitubula. Baji bingi na misambo, maana kabiji batemwa bingi bakwabo. Mulongo umo uji na bansemi bonse babiji bashinka matwi waambile’mba: “Nakoma na bantu bashinka matwi, kabiji bankwasha kuyuka bintu byavula bingi. Twakonsha kufunjilako byavula ku balongo ne banyenga yetu bashinka matwi.”

Yehoba watemwa bingi bapopweshi banji bakishinka, kubikakotu ne boba bashinka matwi. Kwa kubula nangwa kuzhinaukatu ne, lwitabilo ne kuchinchika kwabo byalengela jibumba ja Yehoba kuyilako palutwe. Onkao mambo, twayai tunemekenga balongo ne banyenga yetu bashinka matwi!

[Tubyambo twa mushi]

[Kipikichala pa peja 31]

Muntu washinka matwi wakonsha kumvwisha mambo a Bufumu inge aambiwa mu mulaka wa kwamba na maboko

[Bipikichala pa peja 32]

Kupwila kwetu yo mpunzha yawama balongo ne banyenga yetu bashinka matwi ko batundaikilwa ku mupashi