MEPUZHO A MU BAIBOLO AKUMBULWA

Nanchi buno bo bwikalotu bujiko nyi?

Nanchi mwakilangulukapo’mba kuji bintu bikwabo byo twafwainwa kuba kechi kukayatu, kwingila, kusongola ne kusongolwa, kusema baana ne kukota nenyi? (Yoba 14:1, 2) Baibolo waamba’mba nangwatu bantu ba maana balangulukapo pa kino.—Tangai Musapwishi 2:11.

Nanchi bumi bwanema nyi? Patanshi twafwainwa kwishikisha’mba, nanchi bumi bwatendekele byepi? Inge balanguluka byalengwa bongo ne mubiji wetu yense, bantu bavula baswa kuba’mba kuji Mulenga walengele bintu byonse. (Tangai Salamo 139:14.) Umvwe koaji, ko kuba’mba kuji kintu kyo etulengejile! Kuyuka kyo etulengejile kwitulengela kunemeka bumi bwetu.

Mambo ka bantu o bebalengejile?

Lesa walengele bantu babiji ne kwibapa mwingilo wawama. Aye wakebelenga’mba bayuzhe ntanda ne kwiyalula ke paladisa ne kwikala na bumi bwa myaka ne myaka.—Tangai Ntendekelo 1:28, 31.

Bintu byakebelenga Lesa kechi byaubiwa ne, mambo bantu basatukijile bukalama bwanji. Bino Lesa kechi witukaine ne, kabiji kechi wapimpula kintu kyo akebelenga kwitubila atweba ne ntanda ne. Baibolo witubuula’mba Lesa watwajijila kukwasha bantu ba kishinka kabiji ukafikizha kyaswa muchima wanji ku ino ntanda! Onkao mambo, Lesa ubena kukeba’mba mukekale na bumi byonkatu byo akebelenga! (Tangai Salamo 37:29.) Fundai byaamba Baibolo pa byo mwakonsha kwikala byonkatu byakebelenga Lesa.