“Muntu Upana Bakamupesha”

BANTU ba Lesa kufumatu ne kala bapana bitapisho pa kumupopwela. Bena Isalela bapananga bitapisho bya banyama, kabiji bena Kilishitu bayukanyikwa’mba bapananga kwi Lesa “bitapisho bya kumutota.” Bino kuji bitapisho bikwabo bitokesha Lesa ku muchima. (Hebe. 13:15, 16) Abino bitapisho bileta lusekelo ne mapesho, byonka byo tusakufunda mu mashimikila alondelapo.

Hana wajinga kalume wa Lesa wa kishinka kabiji wakebeshe bingi kwikala na mwana, bino kechi wasemanga ne. Juba jimo byo alombelenga, Hana wachipile kwi Yehoba amba umvwe akaseme mwana wamulume, ‘ukamupana kwi Yehoba moba onse a bumi bwanji.’ (1 Sam. 1:10, 11) Mu kuya kwa kimye, Hana waimichile, kabiji wasemene mwana wamulume ne kumutumba’mba Samwela. Samwela byo asumukile, Hana wamutwajile ku tente wa lusambakeno, byonka byo achipile. Yehoba wapesheshe Hana pa muchima wanji wa kwipana. Hana waikele na baana bakwabo batanu, kabiji Samwela waikele ngauzhi ne nembi wa Baibolo.—1 Sam. 2:21.

Byonka byaubile Hana ne Samwela, bena Kilishitu lelo jino bakonsha kwipana ku Mulenga wabo ne kumwingijila mu bumi bwabo bonse. Kabiji Yesu walayile’mba tukatambwilapo mapesho pa bintu byonse byo tupana pa kupopwela Yehoba.—Mako 10:28-30.

Mu moba a bena Kilishitu batanshi, kwajinga mwina Kilishitu wa jizhina ja Dokasi, “waingilanga mingilo yawama yavula kabiji wapananga bya bupe” bya kukwasha bantu. Bino uno mwanamukazhi “wakolelwe kabiji wafwile,” kabiji kino kyaletele bingi bulanda pa kipwilo. Baana ba bwanga byo baumvwine’mba Petelo waiya mu muzhi, bamusashijile’mba apelawizhe kuya ko bajinga. Byo afikile kokwa, Petelo wasangwile Dokasi, kabiji kino kyaletejile balongo lusekelo lukatampe. Petelo ye wajinga mutumwa mutanshi kusangula muntu. (Byu. 9:36-41) Lesa kechi walubileko mingilo ya kwipana yaingilanga Dokasi ne. (Hebe. 6:10) Jino jishimikila janji janembwa mu Mambo a Lesa kuba’mba tufunjileko.

Mutumwa Paulo naye wipaine bingi, kwingijisha kimye kyanji ne kukwasha balongo. Byo anembele nkalata ku bena Kilishitu mu Kolinda, Paulo wibambijile’mba: “Mambo amiwa nkapana na lusekelo bintu byami byonse ne kwipana ami mwine na mambo a anweba.” (2 Ko. 12:15) Mu bintu byonse byo apichilemo, Paulo wafunjile kuba’mba kwipana kukwasha balongo kuleta lusekelo, kabiji kyakilamo kunema, kuleta mapesho a Yehoba.—Byu. 20:24, 35.

Yehoba usangalala bingi inge twipana kwingijisha kimye kyetu ne bulume bwetu mu kutundaika mingilo ya Bufumu ne kukwasha balongo. Bino nanchi kujipo mashinda akwabo mo twakonsha kutundaikila mwingilo wa kusapwila pa Bufumu nyi? Ee, koaji. Kununga pa mingilo yetu ya butemwe, twakonsha kunemeka Lesa kupichila mu kupana bya bupe. Buno bupe bukwasha kutwala palutwe mwingilo wa kusapwila, ne kukwasha mingilo ya bamishonale ne bakwabotu baji mu mwingilo wa kimye kyonse. Kunungapo, bupe bupana bantu bwa kwifuukwila bene bukwasha mwingilo wa kunengezha ne kutuntulula mabuku ne mavidyo, kukwasha baponenwa na bya malwa, ne kushimika Mazubo a Bufumu. Twashiinwa’mba “muntu upana bakamupesha.” Kabiji inge twapana bintu byetu bya buneme kwi Yehoba, ko kuba’mba tubena kumunemeka.—Maana 3:9; 22:9.

Mashinda Bamo O Bapainamo Bupe Bwa Kukwasha Mwingilo Wa Ntanda Yonse

Byonka byo kyajinga mu moba a mutumwa Paulo, lelo jino bavula ‘batulapo bya bupe bimo,’ ko kuba’mba mali amo ne kuya na kwiabika mu tubokoshi twa bupe panembwa’mba, “Mwingilo wa Ntanda Yonse.” (1 Ko. 16:2) Pa ñondo pa ñondo, bipwilo bituma buno bupe ku ofweshi wa Bakamonyi ba kwa Yehoba utangijila mwingilo mu kyalo kyabo. Kabiji mwakonsha kutuma bupe ku kije kyaswishiwa na mizhilo kingijisha Bakamonyi ba kwa Yehoba mu kyalo kyenu. Pa kuba’mba muyuke jizhina ja kije kyaswishiwa na muzhilo kingijisha Bakamonyi ba kwa Yehoba mu kyalo kyenu, nembelai ku ofweshi wa musampi wa mu kyalo kyenu. Mwakonsha kutaana keyala wa ofweshi wa musampi pa intaneti kwingijisha keyala wa www.jw.org. Kwesakana na byakonsha kwingila mu kyalo kyenu, mwakonsha kupana bupe mu mashinda alondelapo:

KUPANA BUPE KWA KUBULA KUBULAÑANA BYO BUKENGILA

Kutuma mali kwingijisha biñambañamba, ne tubikachi twa ku banki. Ku misampi imo mwakonsha kuba bino kwingijisha keyala wa jw.org nangwa keyalatu mukwabo wa pa intaneti.
Buno bwakonsha kwikala bupe bwa mali, bipe nangwa bintu bikwabo byanema. Mwafwainwa kutumina pamo na nkalata ibena kulumbulula kuba’mba ao mali nangwa bipe byo mwatuma bakebingijishe mo bakebela.

KUPANA BUPE NE KUBULAÑANA BYO BUKENGILA

Ke mali apanwa kuba’mba beengijishe, pano bino, bakonsha kumubwezhezha mwine mwinao inge wiakeba.
Mwafwainwa kutumina pamo na nkalata ya kulumbulula bikengila bobo bupe.

KUNENGEZHEZHA JIMO BYA KUPANA BUPE

Kununga pa bupe bwa mali ne bipe, kuji mashinda akwabo a kupainamo bupe bwa kukwasha mwingilo wa Bufumu wa ntanda yonse. Ano mashinda atanchikwa panshipo. Saka mukyangye kutuma bupe kwingijisha jishinda jo mukeba, patanshi ipuzhai ofweshi wa musampi wa mu kyalo kyenu kuba’mba muyuke mashinda o bengijisha mu kyokyo kyalo. Byo kiji kuba’mba mizhilo ya kafulumende ne mpaino ya misonko yapusana pusana, kyanema bingi kwipuzha dipatimenti utala pa bya mizhilo ne misonko uji pa musampi saka mukyangye kusalapo jishinda jawama ja kupainamo bupe.

Mali a Kwivimbila ne a Penshonyi: Ke bupe bupanwa kupichila mu kutongola kije kingijisha Bakamonyi ba kwa Yehoba kuba’mba kikatambula mali amo a kwivimbila nangwa a penshonyi.

Mali aji ku Kipao: Mali aji ku kipao akonsha kupanwa ku kije kingijisha Bakamonyi ba kwa Yehoba inge wafwa, kwesakana na mizhilo ya ku kyokyo kipao.

Mali a Muntu pa Kampanyi ne Mali Muntu o Akongwesha Kampanyi: Bino bintu byakonsha kupanwa ku kije kingijisha Bakamonyi ba kwa Yehoba kuba’mba ke bupe bwapanwa bwa kubula kubwezha nangwa kutambula buno bupe inge mwine wafwa.

Bishimikwa ne Mpunzha: Bishimikwa nangwa mpunzha byakonsha kupanwa ku kije kingijisha Bakamonyi ba kwa Yehoba kupichila mu kupana bupe bwa kuba’mba bakebwingijishe mo bakebela, nangwa inge kya kuba muntu wapana nzubo, awa wapana nzubo wakonsha kukitwajijila kwikalamo saka akiji mumi.

Mulaye wa Lufu ne Mali o Babika mu Kipamo kya Busulu: Bipe nangwa mali akonsha kupanwa ku kije kingijisha Bakamonyi ba kwa Yehoba kupichila mu kunemba mulaye wa lufu kwesakana na mwayila mizhilo, nangwa kutongola kije kikatambulanga bobo bupe. Luno lunengezho lwakonsha kulengela wapana buno bupe kumukepesheshako misonko.

Monka mwayila byambo bya kuba’mba “kunengezhezha jimo bya kupana bupe,” ano mashinda akebewa muntu kunengezha bulongo. Inge mukeba kuyukilapo bikwabo pa kupana bupe bwa kukwasha mwingilo wa ntanda yonse wa Bakamonyi ba kwa Yehoba, monai buloshuwa wa kuba’mba Charitable Planning to Benefit Kingdom Service Worldwide uji mu Kizungu ne mu Kisipanishi. Uno buloshuwa walumbulula mashinda muntu mo akonsha kupaina bupe saka akiji mumi nangwa kunemba’mba bakapane mali anji inge wafwa. Mashinda amo anembwa mu uno buloshuwa kechi akonsha kwingila mu kyalo kyenu ne, na mambo a misonko ne mizhilo ikwabo. Bantu bavula bakwasha mwingilo wetu wa ntanda yonse kabiji bamwenamo bingi mambo bebakepesheshako misonko inge bapana mu ano mashinda. Umvwe uno buloshuwa mo aji mu kyalo kyenu, mwakonsha kutambulako umo ku munembeshi mu kipwilo kyenu.

Pa kuba’mba muyukilepo byavula, chintai pa kamusabilo ka kuba’mba “Panai Bupe ku Mwingilo wa Ntanda Yonse” kaikela panshi pa keyala wa jw.org, nangwa kwipuzha ku ofweshi wa musampi.