‘Ambainga Nakuchinchika’
1 Kimye Yesu kyoatumine batumwa banji batanshi, wibambijile’mba: ‘Talai! nemutuma pamo no mikooko mu misuka.’ (Mat. 10:16) Nanchi kino kibalengejile kuchina nekwikileka nyi? Ine. Baubile monka mwaambijile mutumwa Paulo kubakwabo babwina Kilishitu amba: ‘Ambainga nakuchinchika kuba’mba, Nkambo ye nkwasho wami; kechi nchine ne: Muntu akangube ka?’ (Hebe. 13:6) Basekejile bingi pakutongolwa’mba, bobafwainwa kwijimwena bumvu jizhina ja Yesu, kabiji kechi balekele kufunjisha nekusapwila mambo awama ne.—Byu. 5:41, 42.
2 Lelo jino, mwingilo wakusapwila mwaya ntanda yonse uji mukimye kyanji kyakupelako. Byonka byaambijile jimo Yesu amba bikamweka, betushikwa kumikoka yonse yabantu. (Mat. 24:9) Mwingilo wetu wakusapwila bamulengulula nekwitusebanya, kabiji kumapunzha amo mwaya ntanda, betukanya kumwingila. Umvwe nekwikala nalwitabilone, inge tuchina. Bino namambo akuba twayuka namba Yehoba ye Nkwasho wetu, kitutekenesha nekwitukosesha kuchinchika.
3 Kuchinchika kekyubilo kikebewa kwikala bakosa kabiji bamukoyo. Kechi kwikala namoyo ne. Baana babwanga bakwa Yesu bakebewa kukosa pakuba’mba bachinchike. Kyanema bingi kubula kulefulwa namambo amilanguluko nebyubilo byaino ntanda bifichisha Lesa pamuchima. Kumwena kwi Yesu washinjile panopantanda ponse byokwitutundaikapo! (Yoa. 16:33) Kabiji akivulukai nebyambo byaambile batumwa saka babena kutalañana nameseko akatampe amba: “Atweba twafwainwa kukokela Lesa kukila bantu.”—Byu. 5:29.
4 Atweba Kechi Twiba Boba Babwela Munyumane: Twafwainwa kwibikako kutwajijila kutemwa mwingilo wetu. (Hebe. 10:39) Vulukainga’mba Yehoba yewitutuma kwingila uno mwingilo kumwesheshamo butemwe bwanji nelusa kubantu bonse. Kechi utumapo bakalume banji kuba kintu kiji kyonse kibula kukwashañana ne. Mwingilo yense yeetutuma kwingila kewakukwasha boba bamutemwa Lesa.—Loma 8:28.
5 Kwikala namuchima waluketekelo kuketukwasha kutwajijila kukeba bantu babumukooko munyaunda yetu. Kimo kimye twakonsha kutana bantu bamisula babula nekutako muchima. Twayai twibamweshe butemwe bwetu nekwibatekenya. Kimye kyonse kyotwatambika buku nangwa muntu wamwesha lusekelo, kikonkwanyi kyetu kyafwainwa kwikala kyakubwelako bukiji-bukiji nekutundaika yeo muntu kufunda bintu bikwabo. Kechi twafwainwa kwisujila jimo atweba bene amba kuba natendeka lufunjisho lwa Baibolo ne, nangwa’mba kampe kuba nafunjisha bulongone. Bino, twafwainwa kimye kyonse mululombelo kulomba Yehoba kwitukwasha nekwitutangijila, nekuketekela kuba’mba uketukwasha.
6 Twaketekela namba Yehoba ukatwajijila nakumulumbulula uno mwingilo kufikatu nebyoakapwa. (Esakanyaiko Filipai 1:6) Kuketekela mwi Yehoba amba ye Nkwasho wetu kwitukosesha kubula ‘kukoka mukuba byawama.’—Nga. 6:9.