Ambainga Bulongo Mambo a Lesa
1 Byoasapwijilenga kineme umo, “Filipa watendekele kwamba, watatwile pa kyonkakya kinembelo ne kusapwila wamusapwijile mambo a Yesu.” (Byu. 8:35) Filipa ‘watwajilenga bulongo mambo a bukine.’ (2 Timo. 2:15) Lelo jino, bakulumpe benda bamona kuba’mba basapwishi bavula kechi bengijisha Baibolo javula kimye kyobasapwilane. Nga anweba mwingijisha Baibolo mumwingilonyi?
2 Mambo a Lesa yonsulo mufuma bintu byonse byotwaitabilamo nebyotufunjisha. (2 Timo. 3:16, 17) Oakokela bantu kwi Yehoba nekwibafunjisha pakuba’mba bakamone bumi bwamyaka. Oene mambo okyanemena kuba’mba twingijishe Baibolo mumwingilo wetu kukila kwambatu pamitwe imo yotwatemwa. (Hebe. 4:12) Namambo akuba bantu bavula kechi bayuka byavula pamambo a Baibolo ne, twafwainwa kwiitanga nekwibamwesha mizhilo ijimo nebwikalo bwakulutwe boyatongwela bantu.
3 Tangai Kufuma mu Baibolo: Mwakonsha kweseka kusolomoka mwinanzubo kwakubula kusenda kyola kyabaya kyamabuku. Mwafwainwa kusendatu buku yemukeba kumutambika mukakyola kacheche ne Baibolo mukuboko kwenu. Pano byomwatatula kwisamba nanji, mwakonsha kushikula Baibolo kwakubula kumulengela kulanguluka’mba mwaiya nakubonkoma. Fwenyai kwipi nanteleki wenu pakuba’mba akonshe kulondela byomubena kutanga mu Baibolo yenu. Kimo kimye mubulai atange vesi ayemwine najiwi jasansuka. Kino kyakonsha kumulengela kwitabila umvwe waumvwa bibena kwamba Baibolo kukila kumvwatu kwianweba. Pano bino, pakuba’mba kimukwashe kumvwisha kishinka kiji mukyokyo kinembelo, konkomwenaipo pabyambo bimo bikatampe.
4 Byakwamba Nakinembelo Kimo: Panyuma yakwilumbulula anwebene, mwakonsha kwamba’mba: “Bantu baketekela mumaana afuma kubantu bapusana-pusana kwibakwasha mubwikalo bwabo. Ñanyi yemubena kulanguluka’mba yewakonsha kwitupa maana awama? [Mulekai akumbule.] Nanchi mubena kulangulukapo’mbaka pabino byambo? [Tangai Byambo bya Mana 2:6, 7, nekuleka’mba akumbulepo.] Maana abantu atama, kabiji alengela bantu bavula kubula kwikala naluketekelo. Bino maana a Lesa oakine kabiji afweta.” Apa bino mumweshai buku yemubena kutambika nekulumbulula kyakumwenako kimo kibena kumwesha maana a Lesa kyoawamina.
5 Yesu waingijishenga Binembelo kukwasha bantu bakishinka. (Luka 24:32) Paulo watangilenga mu Binembelo bintu byoafunjishenga. (Byu. 17:2, 3) Luketekelo nelusekelo lwetu mumwingilo bikabailako umvwe twatwajijila kukomenako mubusendwe bwakwamba bulongo Mambo a Lesa.