Nanchi Mwialwila Mambo a Lesa Nyi?
1 Mu ino ntanda muji bantu balengulula Baibolo, bena Kilishitu bakine bealwila Mambo a Lesa na mukoyo. Byo twasumininwa’mba “Binembelo byonse byanembeshiwa kwi Lesa,” tulondela Yesu Kilishitu waitabizhe mu lulombelo kwi Yehoba amba: “Mambo enu bo bukine.” (2 Timo. 3:16; Yoa. 17:17) Twakonsha kwialwila byepi bulongo Mambo a Lesa?
2 Fundai Binembelo: Kwakubula nangwa kuzhinaukatu ne, Yesu watesheko bingi muchima kufunda Mambo a Lesa. Kino kyamukwashishe kwingijisha Binembelo pa kufunjisha bantu mu mwingilo wanji. (Luka 4:16-21; 24:44-46) Twakonsha kusunga byepi ku mutwe binembelo byavula? Twakonsha kuba bino kupichila mu kutanga Baibolo pa juba pa juba kabiji ne kulanguluka langulukapo kikatakata pa kyepelo kyo twamona’mba kyakonsha kwitutundaika nangwa kwitukwasha mu mwingilo. Pa kunengezha kupwila, twafwainwa kutanga mu Baibolo binembelo byamweshiwa kabiji kampe ne kunengezha kwambapo pa byobyo binembelo. Pa kupwila, twafwainwa kulondelanga mu ma Baibolo etu kimye ñambi kyo abena kutanga binembelo. Kufunda binembelo bya mu Baibolo kuketulengela ‘kwambangatu bulongo mambo a bukine.’—2 Timo. 2:1.
3 Lekai Baibolo Mwine Ambe: Byo tuya mu mwingilo, twafwainwa kuleka Baibolo mwine kwamba. Kya kumwenako umvwe mwina nzubo wituswisha, twafwainwa kutanga kinembelo kabiji ne kwisamba nanji. Umvwe witwipuzha bwipuzho nangwa watendeka kuzhinauka, kyawama bingi kwingijisha Baibolo pa kumukumbula. Umvwe mwina nzubo wapayankana, napotu twakonsha kwambapo byambo bimo bya mu Baibolo kupichila mu kwamba mba, “Saka nkyangye kuya ne, mwane ubai ne mutangilepo kino kinembelo.” Umvwe kyakonsheka, tangai mu Baibolo pamo na ye mubena kwisamba nanji, saka abena kutalapo pa kinembelo kyo mubena kutanga.
4 Mwina nzubo umo byo bamumwesheshe binembelo byakana lufunjisho lwa Balesa basatu waambile’mba, “mu bwikalo bwami bonse ntanwa bingi ku chechi, kabiji kwambatu kine kechi nayukilepo’mba Baibolo bino byobyo aamba ne!” Ponkapotu waswile lufunjisho lwa Baibolo. Yesu waambile’mba mikooko yanji ikomvwa jiwi janji. (Yoa. 10:16, 27) Jishinda jawamisha ja kulengela bantu bamichima ya kishinka kuyuka bukine, ke kwibumona mu Baibolo. Onkao mambo, twayai twikale ba kwialwila Mambo Lesa a bukine.