Kunengezha bya Kwamba pa Kusha Magazini
1. Mambo ka o kyanemena kwinengezhezha atwe bene bya kwamba pa kusha magazini mu kifulo kya kusungilatu ku mutwe mashinda apanwa mu Mwingilo Wetu wa Bufumu?
1 Mwakonsha kulanguluka amba, ‘Nga mambo ka o twafwainwa kunengezhanga bya kwamba pa kusha magazini, byo kiji kuba’mba mu Mwingilo Wetu wa Bufumu yense ulupuka, mwikala mashinda mwa kwambila?’ Nangwa kya kuba bavula batana kuba’mba ano mashinda akwasha bingi, kunengezha pa bunke bwenu kukebewa bingi. Jishinda jakonsha kwingila bulongo mu nyaunda imo kechi jakonsha kwingila bulongo mu nyaunda ikwabo ne. Onkao mambo, kechi twafwainwa kwiumvwa bakashijilwa kusha magazini kwingijisha byambo bintutu bimo biji mu mashinda apainwa jimo ne. Nangwa umvwe twakeba kwingijisha ano mashinda apanwa, kyanema bingi kwiamba mu byambo byetu.
2. Ki ka kyavwangwamo mu kuyuka kibaba kyo musakwambapo?
2 Salai Kibaba: Panyuma ya kuba mwatanga magazini, salai kibaba kyafwainwa mu nyaunda yenu kabiji kyo mwaji kutemwa bingi. Kusumininwa ne kwamba kwenu na lusekelo pa kyokyo kibaba kwakonsha kulengela mwina nzubo naye kukeba kwikitanga. Nangwa kya kuba mwakonsha kukeba kwamba pa kibaba kisakuzakula michima ya bantu bavula baji mu nyaunda yenu, mwafwainwa ne kuyukisha bulongo bibaba bikwabo biji mu magazini. Kino kyakonsha kwimukwasha kupimpula byo mwanengezha kwamba umvwe kya kuba mwatana muntu wakonsha kutemwa mutwe mukwabo.
3. Byambo bya kutendekelapo ka byo mwingijisha bilengela mwina nzubo kukasuluka?
3 Ipuzhai Bwipuzho: Kyalondelapo, nengezhai bulongo byambo byo musakutendekelapo kwamba. Byambo byo mutendekelapo kwamba byanema bingi. Kyakonsha kukwashañana bingi kwipuzha mwina nzubo bwipuzho bwa kulangulukapo kuba’mba kibaba kyo mwasala kwambapo ekitemwe. Mepuzho a kulengela muntu kwambapo byo alanguluka engila bingi bulongo. Chinuzhukainga kwipuzha mepuzho akonsha kulengela mwina nzubo kubula kukasuluka nangwa akonsha kumulengela kuleta mapata.
4. Bintu ka byawama bijimo mu kutangila mwina nzubo kinembelo umvwe kyakonsheka kuba byobyo?
4 Tangai Kinembelo: Kyapelako, salai kinembelo kya kutanga umvwe kya kuba mwina nzubo wakasuluka, kampe kyokya kiji mu kibaba kyo mwasala kwambapo. Kutanga kinembelo kukakwasha mwina nzubo kumona’mba byambo byetu bifuma mu Mambo a Lesa. (1 Tesa. 2:13) Kabiji Kinembelo kikashimuna bukine nangwa kya kuba mwina nzubo wakana kutambula magazini. Bamo bazakula muchima wa mwina nzubo kupichila mu kutanga kinembelo saka bakyangye kumwipuzha bwipuzho. Umvwe ke mukebe kutanga kinembelo mwakonsha kwamba’mba, “Mbena kukeba kuyuka byo mulangulukapo pa byaambiwa mu kino kyepelo kya mu Baibolo.” Panyuma ya bino mumweshai kishinka kipashako kiji mu magazini ne kwambako pacheche kuba’mba kizaku kyanji kibayileko saka mukyangye kumushila yo.
5. Bintu ka bikebewa byo mwafwainwa kulabijila kimye kyo mubena kunengezha bya kwamba pa kusha magazini?
5 Kechi kuji mizhilo yakosa pa mambo a bya kwamba pa kusha magazini ne. Kwambatu byo kyafwainwa kwikala, kyanema bingi kwamba byambo byapela kumvwa kabiji kwa kubula kulolobwela. Ingijishai jishinda jo mwamona’mba jimupelela kabiji mufuma byawama. Tai muchima pa buneme bwa magazini, kabiji ne kwamba na lusekelo. Umvwe mwinengezha bulongo, mukengila bingi bulongo pa kusha Kyamba kya Usopa ne Awake! ku boba “baji na muchima wa bukishinka wa kukeba bumi bwa myaka.”—Byubilo 13:48, NW.