Shai Magazini Ashimuna bya Bukine
1. Mwingilo ka wingila magazini a Kyamba kya Usopa ne Awake!?
1 Kyamba kya Usopa Kibena Kubijika Bufumu bwa Yehoba pamo ne magazini ikwabo ya Awake!, ke bingijisho bikatampe bingi ku mwingilo wa kusapwila Bufumu ne kulenga baana ba bwanga. (Mat. 24:14; 28:19, 20) Kitutokela bingi ku muchima kimye kyonse kyo tusha ano magazini byo twingilako mu mbaji ya pusana pusana ya uno mwingilo wa Bufumu.
2. Lupimpu ka lwaubiwa ku Kyamba kya Usopa ne Awake!, kabiji mambo ka?
2 Pa myaka yapitapo twamona lupimpu lwaubiwa ku nembelo ne ku bintu bikala mu magazini kabiji ne ku mashinda o twingijisha pa kwiasha ku bantu. Luno lupimpu lwaubiwa na nkebelo ya kulengela magazini kuwama ne kwingila bulongo kuba’mba mambo a Bufumu afikenga pa michima ya “bantu bonse bapuluke, bakayukishe bya bukine.”—1 Timo. 2:4.
3. Magazini akengijishiwanga byepi mu mwingilo?
3 Kufumatu mu January 2006, twafunda bingi mashinda apusana pusana a kwambilamo pa kusha Awake! wa pa ñondo pa ñondo. Ne ku Kyamba kya Usopa Kibena Kubijika Bufumu bwa Yehoba nako pano tusakwingijishanga mashinda apusana pusana a kwikishilamo mu mwingilo wetu. Mashinda a kwambilamo pa kusha magazini, ekala pa peja ya kunyuma ya Mwingilo Wetu wa Bufumu. Javula ano mashinda amba pa kibaba kimo kiji mu magazini, bino kimye kimo amba ne pa bibaba bikwabo bantu byo bakonsha kutemwa. Ano mashinda akonsha kwingijishiwa bulongo umvwe twaumvwisha kyokyo kibaba kibena kwambiwapo, apa bino twaamba byobyo byambo mu byambo byetu kwesakana na nyaunda yetu.
4. Mambo ka o kyakonsha kuwamina kwingijisha mashinda akwabo akwambilamo kununga pa oa aji mu Mwingilo Wetu wa Bufumu?
4 Nangwa kya kuba Mwingilo Wetu wa Bufumu wikala na mashinda abiji a kushilamo magazini, mwakonsha kwingijisha ne mashinda angi o mukeba. Ene mambo a kubila bino ke a kuba’mba bibaba bimo bakonsha bingi kwibikeba ku bantu mu nyaunda yenu. Nangwa kampe mwakonsha kwamba bulongo kwingijisha kibaba kimutokela ku muchima.
5. Saka mukyangye kunengezha bya kwamba pa kusha magazini, mwafwainwa kuba ka?
5 Bya Kunengezha Jishinda ja Kwambilamo: Kintu kitanshi, mwafwainwa kumvwisha bulongo kibaba kyo mukeba kukambapo. Kechi kimye kyonse kyo mwakonsha kuyukatu bintu byonse biji mu magazini saka mukyangye kutendeka kwiasha mu mwingilo wa mu bujimi ne. Nangwa byonkabyo, mwafwainwa kumwesha kizaku ne bukishinka pa kwamba pa byobyo bibaba byo mwasala kwingijisha. Mwakonshatu kuba bino umvwe mwaumvwisha bulongo byambo byo mubena kwamba.
6. Twakonsha kunengezha byepi byambo byetu bya kuya na kwamba?
6 Kya bubiji, nengezhai mashinda apusana pusana. Mwakonsha kwingijisha bwipuzho bwakonsha kuzakula muchima wa muntu bwalamata ku kyokyo kibaba kutendekelamo mwisambo. Kimye kyonse saka muketekela mu Mambo a Lesa kufika bantu pa michima. (Hebe. 4:12) Salaipo kinembelo kyaesakana na mutwe ye musaka kwisambapo, kikatakata kinembelo kyamweshiwa nangwa kyanembwa byambo byakyo mu kibaba kyo mubena kwambapo. Monai byo mwakonsha kukwatankanya kyokyo kinembelo kiji mu kibaba.
7. Twakonsha kuyuka byepi mwakwambila pa kusha magazini?
7 Ponse pa Mwekela Jishuko: Pa kuba’mba byambo bya kwamba pa kusha magazini bingile bulongo kikebewa kwibingijisha. Ingijilainga pamo na kipwilo mu busapwishi bwa kusha magazini pa Kibelushi. Shilai magazini bantu batambulapo kala mabuku akwabo. Kimye kyonse saka mushila magazini bo mufunjisha Baibolo ne bantu bakwabo bakonsha kutanwapo kimye kyo mwabwelako ku muntu. Mwakonsha kushila magazini bantu bo mubena kwisamba nabo pa kuya na kupota bintu, kimye kyo muji pa lwendo, nangwatu kimye kyo mubena kupembelela dokotala. Yukainga mwakwambila pa kusha magazini mu ñondo yense.
8. Mu ñanyi mashinda magazini a Kyamba kya Usopa ne Awake! mo apusena na magazini akwabo?
8 Kyamba kya Usopa ne Awake! ke magazini apusanako na magazini akwabo. Atumbijika Yehoba kuba’mba ye Nkambo walengele bintu byonse. (Byubilo 4:24) Akwasha bantu na mambo awama a Bufumu bwa Lesa ne kwibatundaika kwikala na lwitabilo mwi Yesu Kilishitu. (Mat. 24:14; Byubilo 10:43) Kunungapo, amba ne pa bintu bibena kumweka panopantanda byo bibena kufikizha bungauzhi bwa mu Baibolo. (Mat. 25:13) Kwashai bantu mu nyaunda yenu kumwenamo mu ano magazini kupichila mu kwibashilao pa kimye kiji kyonse!
9. Twakonsha kwala byepi kitendekesho kya kukabwelako?
9 Umvwe mwashila muntu magazini, nangwatu mwisambatu nanji mwisambo wa bintu bya ku mupashi, mwipuzhaipo bwipuzho nangwa ambaipo byambo bya kumuzakula muchima byakonsha kwimulengela kukabwelako na kukesambilapo nanji mwisambo mukwabo wa ku mupashi. Umvwe twaikala na mukoyo wa kukusa nkunwa ya bukine, twafwainwa kuketekela’mba Yehoba ukashinkula michima ya boba bakeba kya kine kumuyuka ne ku mwingijila.—1 Ko. 3:6.