Bya Kwingijisha Mashinda Amo a Kwambilamo
1. Twafwainwa kuba byepi na mashinda amo a kwambilamo anengezhiwa?
1 Mashinda amo a kwambilamo pa kushajika magazini ne mabuku etu akwabo anembwa kimye kyonse mu Mwingilo Wetu wa Bufumu. Kimye kyo tuji mu mwingilo, kechi kyafwainwa kwiambanga ano mashinda byonka byo anembwa ne. Ano mashinda anengezhiwa kwitukwashatu kuyuka byo twakonsha kwamba. Twakonsha kwingila bulongo umvwe kya kuba’mba ano mashinda ke twi ambe mu byambo byetu. Kukasuluka pa kwamba kulengela mwina nzubo naye kukasuluka kabiji kwitumwesha bukishinka ne kusumininwa.—2 Ko. 2:17; 1 Tesa. 1:5.
2. Mambo ka o twafwainwa kulangulukapo pa bisho biji ku mpunzha yetu kimye kyo tubena kunengezha bya kuya na kwamba?
2 Pimpulai Ñambilo Yenu: Jishinda jo twambilamo mambo awama jingila bulongo monka mwayila bisho biji ku yoyo mpunzha. Nanchi mutendekelapo kwiimuna na mwina nzubo apa bino mwatatula mwisambo nyi, inyi bantu mu nyaunda yenu bakeba kufikatu ponkapo mwaamba kyo mwaendela? Kino kyaenda kupusana pusana kwesakana na mpunzha kimo kimye ne muntu mwine. Kabiji kikebewa kwikala na milangwe pa kushikisha mepuzho. Mepuzho awamina mu mapunzha amo akonsha kulengela bantu bamo kubula kukasuluka mu mapunzha akwabo. Onkao mambo twafwainwa kulangulukapo bulongo ne kwalulula ñambilo yetu kwesekana na byo kikala ku yoyo mpunzha.
3. Mambo ka o twafwainwa kulangulukila pa bwikalo ne ndangulukilo ya bantu bo tusapwilako?
3 Kabiji kunungapotu, twafwainwa ne kulanguluka pa bwikalo ne ndangulukilo ya bantu baji mu nyaunda yetu kimye kyo tubena kwinengezha kuya mu mwingilo wa mu bujimi. Kya kumwenako, kimye kimo byo mwakonsha kwisamba Mateo 6:10 na muntu upwila mu Bakatolika byakonsha kupusana na byo mwakonsha kwisamba na muntu wabula kuyuka “Lulombelo lwa Nkambo.” Umvwe twalangulukishapo, twakonsha kupimpula ñambilo yetu kuba’mba izakule michima ya bantu bo tutana mu mwingilo.—1 Ko. 9:20-23.
4. Mambo ka kunengezha bulongo o kwanemena?
4 Nangwa kya kuba tubena kulanguluka kwingijisha mashinda amo a kwambilamo byonka byo anembwa, kino kechi kilumbulula’mba twafwainwa kubula kunengezha ne. Twafwainwa kutanga bulongo kibaba nangwa kitango kyo tubena kunengezha kwambapo ne kumonapo bishinka byakonsha kuleta mujojo. Apa bino twibibikamo mu byambo byetu byo tubena kunengezha kuya na kwamba. Umvwe twayukisha byambo biji mu mabuku etu kitulengela kwiashajika bulongo.
5. Mambo ka o twafwainwa kunengezhezha ñambilo ikwabo, kabiji twakonsha kuba byepi kino?
5 Mashinda Akwabo: Nanchi twakashijilwatu kwingijisha ñambilo yonka yanembwa pa mashinda amo a kwambilamo nyi? Ine. Umvwe kimupelela kwingijisha mashinda akwabo nangwa kinembelo kingi, engijishai. Kikatakata na magazini, monai kuba’mba mwaingijisha mitwe ikwabo yabula pa nkupiko yakonsha kuwama mu nyaunda yenu. Kimye mashinda abya kwamba mu mwingilo wa mu bujimi kyo abena kumweshiwa pa Kupwila kwa Mwingilo, lunengezho lwakonsha kubiwa kwingijisha jishinda jiji jonse jingila bulongo mu nyaunda ya konkako. Mu jino jishinda bonse bakonsha kukwashiwa kusapwila bulongo mambo awama.