Tainga Bantu Muchima—Kupichila mu Kwinengezha
1 Kunengezha bulongo mwingilo kwitukwasha kuta bantu muchima. Mu ñanyi jishinda? Umvwe twinengezha bulongo, kechi tushupikwa pa kwamba ne, kabiji kino kitukwasha kuta muchima bena nzubo. Kabiji kitukwasha kwamba kwakubula kuzakama saka twakasuluka. Pano twakonsha kunengezha byepi bya kwamba byawama?
2 Ingijishai Jishinda Jafwainwa: Salaimo jishinda jimo ja kwambilamo jiji mu Mwingilo Wetu wa Bufumu wa January 2006 jafwainwa kwingila mu nyaunda yenu, kabiji ne kweseka kwijamba mu byambo byenu. Jipimpulaiko kwesakana na nyaunda yenu byo iji. Kya kumwenako, umvwe javula musambakana bantu ba bupopweshi bumo nangwa ba mushobo ungi, langulukai pa bintu byo batemwa. Kupimpula bya kwamba kwesakana na bantu bo mwisamba nabo kumwesha kuba’mba mwibata muchima.—1 Ko. 9:22.
3 Umvwe mwatendeka kwingijisha jishinda ja kwambilamo, monai kuba’mba mubena kwijiwamishako. Byo kiji kuba’mba byambo bitanshi byanema bingi, mwafwainwa kuteshako muchima ku byo babena kubapo bantu pa byambo byo mwatendekelapo kwamba. Abya awo mutwe bamutemwa nyi? Nanchi mepuzho o mubena kwibashikisha abena kwibalengela kukumbula nyi? Umvwe ine, pimpulai bya kwamba kufikilatu ne kimye kyo mwatana jishinda ja kwambilamo jingila.
4 Bya Kwituvululako: Bavula kibakatazha bingi kuvuluka byambo bya kwamba umvwe bafika pa nzubo. Umvwe ne anweba byo byo kiji, abya mwaesekapo kala kupitulukilamo jimo kupichila mu kweseka kwamba na jiwi jasansuka na mukwenu nyi? Kino kyakonsha kwimukwasha kumvwisha bulongo kishinka ne kwikyamba mu jishinda japela, kabiji jalumbuluka. Kabiji kyakonsha kwimukwasha kuyuka mwakwambila mwavula kwesekana nabiji bena nzubo.
5 Jishinda jikwabo ja kwituvululamo ke kunemba tubyambo tucheche twakwamba pa kakipepala kabiji ne kutalapo kimye kyo mubena kunangijila pa nzubo. Bamo bekitana kuba’mba tuno tubyambo tucheche twa kwibavululako twibakwasha bingi kwikala bakasuluka kabiji ne kukonsha kwisamba na bantu. Kupichila mu ano mashinda, kunengezha bulongo kuketukwasha kuta muchima bantu, kabiji ne kuwamishako bya kwamba mambo awama.