‘Tengelainga Kwingila Mingilo Yonse Yawama’
1 Yesu byo atendekele mukwekele wa kusapwila, waikalangapo na kimye kya kubula baana banji ba bwanga bintu bya kuya na kwamba. (Mat. 10:5-14) Nangwa kya kuba atweba bonse twapayankana, kwikalapo na kimye kya kunengezha byo tusa kuya na kwamba saka tukyangye kuya mu mwingilo wa ku nzubo ne nzubo, kuketulengela kukwasha bantu kumvwa.—2 Ko. 9:6.
2 Bya Kwinengezha: Kunengezha bulongo kukebewa kukiyuka bintu biji mu buku ye tukeba kusha ku bantu. Twafwainwa ne kulanguluka pa bantu ba mu nyaunda yetu. Bintu ka byo batemwa kwambapo? Bintu ka byo baitabilamo? Pa kuba’mba kitukwashe kuyuka bya kwamba, twakonsha kumona mu Mwingilo Wetu wa Bufumu ne mu buku wa Ukupelulula Ukufuma mu Malembo.
3 Kintu kikwabo kyakonsha kwitukwasha ke kumona bimwesho byubiwa pa Kupwila kwa Mwingilo. Umvwe twayuka bulongo bya kwamba, kechi tukatayanga kimye kyabaya pa kwinengezha ne. Pano bino, umvwe ketulangulukilepo jimo pa byo tukeba kuya na kwamba ne kupitulukishamo saka tukyangye kuya mu mwingilo, kiketukwashanga kwamba bulongo. Kabiji twafwainwa ne kumona’mba twasenda mabuku onse abena kukebewa.
4 Ki ka kyakonsha kwitukwasha kulabijila bintu byo twanengezha kuya na kwamba. Jishinda jimo ke kupitulukamo na jiwi jasansuka. Bamo bekimona bulongo kupitulukamo pa kimye kya lufunjisho lwa kisemi. Bakwabo nabo banemba pa pepala byambo byo bakeba kuya na kwamba kuba’mba beye batalepo umvwe ke banangijile pa nzubo ya muntu.
5 Ene Mambo o Kwanemena: Kwinengezha bulongo kwitulengela kwingila bulongo ne kubayisha lusekelo lwetu mu mwingilo. Kwitukwasha kutekanya ne kubula moyo pa kwisamba na mwina nzubo. Kwitulengela kuteleka bulongo ku bibena kwamba mwina nzubo mu kifulo kya kuta maana ku byo tusakwamba. Kabiji kuyuka bulongo biji mu buku yetukeba kuya na kusha kuketukwasha kwamba na kizaku ku bantu.
6 Binembelo bitutundaika “kutengela kwingila mingilo yonse yawama.” (Titu. 3:1) Kafwako mwingilo wawama wakila pa mwingilo wa kusapwila mambo awama ne. Umvwe ke twinengezhe bulongo, tukamweshanga mushingi ku mwina nzubo ukeba kumvwa ku byo tubena kwamba, kabiji ne kunemeka Yehoba, aye Lesa ye twimenako.—Isa. 43:10.