Kuwamishako Busendwe Bwetu bwa Kusapwila—Kunengezha Byambo bya Kutendekelapo

Ene Mambo o Kyanemena: Inge byambo byetu bya kutendekelapo mwisambo kechi bibena kuzakula bantu ne, mwina nzubo wakonsha kuchibikizha mwisambo saka tukyangye kumusapwila. Onkao mambo, basapwishi bavula banemeka bingi byambo bya kutatwilapo mwisambo. Mu Mwingilo Wetu wa Bufumu ne mu buku wa Ukupelulula mwikala mashinda a kwisambilamo. Bino, kechi mwikala byambo byonse byo twakonsha kwamba ne. Kino kitulengela kupimpulako byambo kwesakana na bo twatana mu mwingilo. Nangwa inge byambo byonse mobiji, basapwishi bafwainwa kusalapo kwibingijisha nangwa kwinengezhezha byambo byabo abo bene. Inge ke tunengezhezhe jimo byambo bya kutendekelapo kukila kwamba biji byonse byaiya mu mulanguluko wetu, tukengilanga bulongo mwingilo wetu.—Mana. 15:28.

Byo Mwafwainwa Kuba:

Salai mutwe wa kwisambapo. Mutwe ye mwasala wafwainwa kufuma mu buku ye mubena kupana mu mwingilo, kabiji wafwainwa kuzakula bantu mu nyaunda yenu.
Nengezhai bulongo byambo bitanshi byo musa kwamba panyuma ya kwimuna mwina nzubo. Mwakonsha kutendeka mwisambo na byambo bya kuba’mba: “Nemufwakesha na mambo a kuba amba. . . ,” “Bantu bavula baakamwa na mambo a . . . ,” “Mwane mwalangulukapo amba ka pa uno mutwe . . . ,” nangwa kwingijishatu byambo bikwabo. Javula, kwingijisha byambo bicheche kukwasha bingi. Basapwishi bamo balabijila byambo bya kutendekelapo mwisambo.
Langulukaipo bwipuzho bwakonsha kuzakula mwina nzubo ne kumulengela kwisamba nenu. (Mat. 17:25) Yukai amba saka mukyangye kumufwakesha, kampe mwina nzubo waji kulangulukangapo bimo bya pa bunke. Onkao mambo kechi mwafwainwa kumwipuzha bwipuzho bwakatazha kukumbula nangwa bwakonsha kumulengela bumvu ne.

Esekai Kuba Bino mu uno Ñondo:

Pa kupopwela kwa kisemi, Ikalaingapo na kimye kya kunengezhapo byambo bya kutendekelapo mwisambo mu mwingilo ne kwibipitulukamo.
Kimye kyo muji mu mwingilo, bulaiko musapwishi ye mubena kwingijila nanji pa byambo byo mwanengezha kutendekelapo mwisambo. (Mana. 27:17) Mwakonsha kupimpula byambo byo mwanengezha inge kechi bibena kuzakula bantu ne.