Monaingapo Bimye bya Kusapwila
1 Kipwilo kya bwina Kilishitu kyalengwa na bantu baji na bwikalo bwapusana pusana. Pano bino, twakwatankana mambo tukebesha kutota Yehoba. (Sala. 79:13) Inge kya kuba’mba butuntulu bwetu bwa mubiji kechi buji bulongo ne, nangwa makatazhotu akwabo a mu bwikalo abena kwitulengela kukankalwa kusapwilako mambo awama, twakonsha kumonapo byepi bimye bya kusapwila?
2 Mu Bintu Bya pa Juba pa Juba: Yesu washukilwanga bintu byo aubanga pa juba pa juba na bantu kwibingijisha kusapwilamo. Wisambile na Mateo kimye kyo apichilenga ku ofweshi wa musonkeshi, wisambile na Zakyasa kimye kyo ajinga pa lwendo, kabiji wisambile na mwanamukazhi mwina Samaliya kimye kyo akokolokelenga. (Mat. 9:9; Luka 19:1-5; Yoa. 4:6-10) Ne atweba mu bintu byetu bya pa juba pa juba, twakonsha kusapwila muntu yense ye twisamba nanji. Kusenda Baibolo, matalakiti nangwa mabuloshuwa, kwakonsha kwitukwasha kwamba pa bintu byo twaitabilamo.—1 Pe. 3:15.
3 Abya butuntulu bwa mubiji bwimulengela kukankalwa kwingilako mwingilo wa ku nzubo ne nzubo nyi? Inengezhainga kuba’mba musapwilenga ku bengila mu kipatela umvwe baiya na kwimupempula nangwatu bantu bakwabo bo mwakonsha kusambakana nabo. (Byubilo 28:30, 31) Umvwe kya kuba’mba kimye kyonse mutanwatu pa nzubo, abya mwaesekapo kala kusapwila pa foni nangwa mu nkalata nyi? Nyenga umo javula unembela makalata ba mu kisemi kyanji babula Bakamonyi. Unembamo byambo bya mu Baibolo bya kwibatundaika kabiji ne bimo byamumwekejile kimye kyo asapwijilenga.
4 Pa Nkito Nangwa pa Sukulu: Kukebesha kwetu kwa kutota Yehoba kuketukwasha kumonangapo mashinda a kubyajilamo kunwa ya bukine pa nkito nangwa pa sukulu. Musapwishi wa myaka ya kusemwa 8 wisambile na bakwabo mo bafunjila byo atangile mu Awake! pa mambo a ñondo. Panyuma ya kuyuka ko afumishe bino byambo, mufunjishi wanji watatwile kutambula Kyamba kya Usopa ne Awake! kimye kyonse. Ku nkito, umvwe saka tubika buku wetu wa Baibolo Ufunjisha pakonsha kumumona bantu, kyakonsha kwibalengela kushikisha mepuzho kabiji ne kwitupa jishuko ja kwibasapwila.
5 Abya mwakonsha kumonangapo mashinda amo o mwakonsha kusapwilamo mu bintu byo muba pa juba pa juba nyi? Kupichila mu kwingijisha bintu byo tuba mu bwikalo bwetu, twayai twibikengako pa juba pa juba pa kuba’mba “tuletenga kitapisho kya kutota Lesa.”—Hebe. 13:15.