Totainga Yehoba mu Kusapwila Busapwishi bwa Kushukilwa
1 Bakalume bakishinka ba Yehoba bamonapo bimye bya kumutotelamo pa juba pa juba. (Sala. 96:2, 3; Hebe. 13:15) Jishinda jimo jo twakonsha kubilamo kino ke kusapwila busapwishi bwa kushukilwa. Lelo jino bapopweshi bavula ba Yehoba basanta bingi kuba’mba muntu umo wibabujile mambo a Bufumu kupichila mu kwibasapwila busapwishi bwa kushukilwa.
2 Javula kusapwila muntu busapwishi bwa kushukilwa kulengela bakwabo nabo kumvwa mambo a Bufumu. Kya kumwenako, mwisambo wa Yesu ye esambile na mwanamukazhi mwina Samaliya ku mushima wa Yakoba walengejile bavula kukeba kumvwa mambo awama. (Yoa. 4:6-30, 39-42) Ba Paulo ne Silasa byo bajinga mu kaleya mu Filipai basapwijile ku muota, kabiji ne ba mu nzubo yanji bonse batambwijile bukine.—Byu. 16:25-34.
3 Bimye: Bimye ka byo twikala nabyo kusapwilamo busapwishi bwa kushukilwa? Bamo basapwila kimye kyo baya na kupota byakupotapota, kimye kyo baji mu motoka pa lwendo nangwa kimye kyo babena kupembelela ku kipatela kutambula muchi. Bakwabo nabo basapwila sabaji ku nkito nangwa ku sukulu pa kakimye ka kukokoloka. Kubikatu buku wetu umo patoka kwakonsha kulengela bantu kukeba kuyuka luketekelo lwetu.—1 Pe. 3:15.
4 Bya Kutatula Busapwishi bwa Kushukilwa: Kashimbi wa bumvu wajinga na myaka ya kusemwa itanu na ibiji byoaile na kupwila waumvwine sa bafunjisha’mba kyanema bingi bonse kusapwila. Onkao mambo byoailenga ne bainanji na kupota byakupotapota, wabikile ma buloshuwa abiji mu ka kyola kanji. Bainanji mo bakipotejilenga bintu, olo, kashimbi watambikile buloshuwa ku mwanamukazhi umo bibye, awo wiitambwijile na lusekelo. Byo bamwipwizhe’mba nga waji kusolomoka byepi yewa mwanamukazhi, uno kashimbi wa bumvu wakumbwile’mba: “Naubiletu namba ñambe nyi, muchima wanema, kabiji na bwezhapo ne jibiji, aa nauba namba ñambetu mwe! Ne kwamba naamba!”
5 Pakuba’mba tusapwile busapwishi bwa kushukilwa twafwainwa kuba byonka byaubile yewa kashimbi. Kika kyakonsha kwitukwasha? Lombai bulume bwa kwamba. (1 Tesa. 2:2) Ikalaipo na jipuzho jimo nangwa na byambo bya pa mutwe umo byo musakwamba kutatwilamo mwisambo. Kepo muketekele’mba Yehoba usakwimupesha.
6 Kusapwila busapwishi bwa kushukilwa ku bantu botumonañana nabo juba ne juba kutota Yehoba kabiji kwituletela ne lusekelo. Kwakonsha kukwasha muntu kuya mujishinda jiya ku bumi bwa myaka ne myaka.