Nanchi Mwinengezha Kwingila Busapwishi bwa Kushukilwa Nyi?
1. Kya kumwenako ka kimwesha’mba busapwishi bwa kushukilwa bwawama?
1 Busapwishi bwa kushukilwa bwawama bingi. Mu Baibolo muji bya kumwenako byavula bya busapwishi bwa kushukilwa byawama bingi. (Yoa. 4:7-15) Ki ka kyo twakonsha kuba pa kunengezha buno busapwishi?
2. Mvwajilo ne mwekelo yetu byakonsha kwitukwasha byepi kwinengezha kwingila busapwishi bwa kushukilwa?
2 Mvwajilo ne Mwekelo: Kuvwala ne kumwekana bulongo kimye kyonse kuketulengelanga kwamba saka twakasuluka pa lwitabilo lwetu ku bakwetu. (1 Timo. 2:9, 10) Umvwe mvwajilo yetu kechi yawama ne, yakonsha kwitulengela kukankalwa kusapwila. Pano bino mwekelo yawama yakonsha kulengela bakwetu kukeba kuyuka kyo twavwajila bulongo. Kya kumwenako, Bakamonyi bamulume ne mukazhi bavwajile bulongo baikele pa kipona kimo na Mozilemu kimye kyo bajinga pa lwendo. Byo amwene’mba bavwala bulongo wibepwizhe umvwe bajinga bena Kilishitu. Kino kyalengejile kwisamba pa maawala asatu pa Baibolo.
3. Kulondela kya kumwenako kya kwa Yesu mwatatwile byepi mwisambo?
3 Kutatula Misambo: Yesu byo bamutaine ku mushima wa kwa Yakoba ku mwanamukazhi mwina Samaliya, watatwile kwisamba nanji kupichila mu kumulomba mema a kutoma. Ne atweba twakonsha kutatula mwisambo na byambotu bicheche nangwa bwipuzho bwapela. Kimo kimye twakonsha kukankazhama, pano bino na bukwasho bwa Yehoba twakonsha ‘kuchinchika’ ne kutatula mwisambo.—1 Tesa. 2:2.
4. Twakonsha kwinengezha byepi kusapwila busapwishi bwa kushukilwa?
4 Monaingapo Tubimye twa Kusapwila: Basapwishi bavula bamonapo tubimye tumo twakubilamo busapwishi bwa kushukilwa. Langulukaipo tubimye tumo to mwakonsha kushukilwa ne kulanguluka pa bantu bo mumonañana nabo pa juba pa juba. Sendai mabuku o mwamona’mba bantu bakonsha kwiatemwa ne Baibolo. Talatalainga ne kuta bantu muchima. Umvwe mwalangulukilapo jimo tubimye to mwakonsha kushukilwa pa jojo juba, mukanengezha kusapwila bulongo.—Fili. 1:12-14; 1 Pe. 3:15.
5. Mambo ka o twafwainwa kutela muchima ku busapwishi bwa kushukilwa?
5 Tuji na bishinka bibiji bitulengela kuta muchima ku busapwishi bwa kushukilwa. Bino bishinka ke kutemwa Lesa ne kutemwa bakwetu. (Mat. 22:37-39) Byo kiji kuba’mba mwingilo ubena kukebwa kumwingila bukiji, tuteko muchima ku busapwishi bwa kushukilwa. Twafwainwa kwinengezhanga kusapwila mambo awama a Bufumu kimye kyonse lonka luno lo kukiji kimye.—Loma 10:13, 14; 2 Timo. 4:2.