Twi Bakamonyi Kimye Kyonse
1. Twakonsha kufunjilako ka ku jishimikila ja kwa Yesu ja kusapwila mwanamukazhi ku mushima?
1 Yesu waingijile pa kimye kyabaya, wakokele bingi kabiji wafwile kilaka. Baana banji ba bwanga sabakiya na kupota kajo, washajile waikala ku mushima wajinga kwapela muzhi wa Samaliya. Yesu kechi waile mu Samaliya na kusapwila ne, wapichilengatu kuya ku Ngalilea na kutwajijila mwingilo wanji. Nangwa byonkabyo wasapwijile mwanamukazhi waishile na kutapula mema. (Yoa. 4:5-14) Mambo ka? Yesu kimye kyonse wajinga “kamonyi wa kishinka ne wa kine.” (Lum. 3:14) Tulonda Yesu kupichila mu kwikala Bakamonyi kimye kyonse.—1 Pe. 2:21
2. Twakonsha kwinengezha byepi kusapwila busapwishi bwa kushukilwa?
2 Inengezhai: Twinengezha kusapwila busapwishi bwa kushukilwa umvwe ketusende mabuku. Basapwishi bamo basenda matalakiti a kushila bapotesha mu mashitolo, bapotesha maanyi a mu myotoka, ne bakwabotu bo bakonsha kumonañana nabo jojo juba. (Sapwi. 11:6) Nyenga umo watemwa kwenda javula usenda Baibolo mucheche ne buku wa Baibolo Ufunjisha mu kyola, javula utendeka misambo na bo aikala nabo kipona kimo.
3. Twakonsha kutendeka byepi mwisambo?
3 Tendekai mwisambo: Umvwe tubena kukeba kusapwila busapwishi bwa kushukilwa kechi twafwainwa kutendeka na byaamba Binembelo pa kyo kyo kintu ne. Yesu kechi wamubujile mwanamukazhi amba ye Mesiasa pa kutendekatu mwisambo ku mushima ne. Pa kumulengela kutako muchima, wamulombele mema. (Yoa. 4:7-9) Kwisamba na bantu mu jino jishinda kukwasha nyenga umo kukumbula bamwipwizha kyo abujila kusekelela moba a kukokoloka. Mu kifulo kya kukumbula’mba kyo abujila kusekelela moba a kukokoloka mambo Kamonyi wa kwa Yehoba, wamba’mba: “Nasalapo amiwa mwine kubula kusekelela.” Bantu javula bamushikisha’mba mambo ka, kino kilengela nyenga kusapwila.
4. Mambo ka kinembelo kya Mateo 28:18-20 o kitutundaikila?
4 Nangwa kya kuba wapwishishe mwingilo wanji wa kusapwila ye aingilanga na kizaku panopantanda, Yesu watako bingi muchima ku mwingilo wa kusapwila ubena kwingilwa byonka byo a mwingilanga. (Mat. 28:18-20) Onkao mambo, byonka byajinga wa Kumwenako wetu aye Yesu, netuwa twi Bakamonyi bepanza kusolola lwitabilo lwetu.—Hebe. 10:23.