Kuwamishako Busendwe Bwetu bwa Kusapwila—Bya Kutendeka Mwisambo mu Busapwishi bwa Kushukilwa

Ene Mambo o Kyanemena: Inge tuji mu busapwishi bwa ku nzubo ku nzubo, javula kechi tutana bantu pa mazubo abo ne. Nangwa byonkabyo, tusambakana bano bena mazubo mu mapuzha apusana pusana, nabiji mu sakya, pa kipatela, ku nkito, ne ku sukulu. Yehoba ukeba’mba bantu bonse bomvwe mambo awama a Bufumu. (1 Timo. 2:3, 4) Javula pa kuba’mba tusapwile, twafwainwa kutanapo jishinda ja kutendekelamo mwisambo.

Byo Mwafwainwa Kuba:

Salainga ba kwisamba nabo. Nanchi muntu ye mukeba kwisamba nanji ubena kumweka’mba wakasuluka kwisamba nanji nyi? Kulanguluka pa mpunzha po muji ne byo abena kuba awo muntu, nanchi kijitu bulongo kutendeka mwisambo nyi? Basapwishi bamo batendekelapo kutala muntu ne kumwemwesela. Inge muntu naye wamwemwesela, batendeka kwisamba nanji.
Inge kimukatazha kwamba na kuchinchika, lombai lulombelo lwipi lwa mu muchima.—Ne. 2:4; Byu. 4:29.
Mwakonsha kutendekelapo na byambo bichechetu, nabiji kumwimunatu muntu. Yesu pa kwisamba na mwana mukazhi mwina Samaliya kechi wafikenejiletu watendeka kwamba pa Bufumu bwa Lesa ne. (Yoa. 4:7) Bimye bimo pa kutendeka kwisamba na muntu, mwakonsha kumwambila’mba: “Baana benu baji bingi na mushingi.” Nangwa kumwipuzha amba: “Nanchi mwaumvwineko sawakya ye bashimwine pa waileshi kesha nyi?”
Inge mwatendeka kwisamba, esekai kumonapo jishinda ja kuletelamo mambo awama mu mwisambo. Bino kange munyemene kuletamo mambo awama ne. Patanshi lekai mwisambo akasuluke bulongo, apa bino mambo awama alondelepo. Mwakonsha kwambapo bimo byakonsha kulengela muntu kukeba kuyukilapo byavula. Kya kumwenako, inge mwaji kwisambanga pa bya kisemi, mwakonsha kwamba’mba: “Natainepo byambo bimo bikwashañana bingi mu kukomesha baana.” Inge mubesambenga pa masawakya a bibena kumweka mu ntanda, mwakonsha kwamba’mba: “Juba jimo natangilepo mambo awama bingi apusanako na byatama bibena kumweka mu ntanda.” Bino kange mulefulwe ne inge mwisambo wachibika saka mukyangye kusapwila mambo awama.
Sendainga matalakiti nangwa mabuku akwabo o mwafwainwa kupa muntu ubena kumwesha lusekelo.

Esekai Kuba Bino mu uno Ñondo:

Pa mulungu pa mulungu, esekai kutendekapo mwisambo umo mu busapwishi bwa kushukilwa.